Apoi Tuk E Kan Unau A Si Mi Ralzam Hna Cu, SAC Ralhrang Nih An Um Nak Ah Kal Hnawh In, Pa 9 An Thah Hna Nu 5 An Tleih

Magwe ramṭhen, Pauk peng ah SAC ralkap nih April 12 zaanlei sang ah an kah mi hriamngan 60mm kuan nih khen hna ruangah Tasu khua ralzaam 9 an nunnak a rak liam, tiah tualchung mi hna sin in theih a si.

Hriamngan kahnak in a nunnak liam mi hna cu Daw Tan Saw, Daw Tin Moe Hlaing, Daw Hte Wa, Daw San Khui, Ma Hka Myo Nwe, Ma Hla Myo Cuai, Ma Khin Tan Nu, Ma Zin Zin Aung le U Myint Po an si i, hmunkhat teah a bu in an thi, tiah theih a si.

Cu lengah mipi hna nih ramlak le burbuk lak ah an i thuh mi hrukaih hnipuan, cycle 5, tidawpnak seh le facang pung 400 tuk an khangh piak hna, tiah tualchung mi hna sin in theih a si. Tualchung mi hna nih an i khon chung mi sii-ai, eidin tiirawl hna le minung herh mi hmanrua pawl cu SAC ralkap nih an hrawh dih caah mipi hna cu bawmh an herh ngai, tiah theih a si.

Burmese People’s Liberation Army(BPLA) Dirh Kumkhat Tlin Caan hmannak Tuah A Si: Ramkhel Cawlcanghnak ah ṭangrual ding in dirh mi Burmese People’s Liberation Army(BPLA) kumkhat a tlin lawmhnak ah NUG, AA, TNLA le MNDAA nih BNLA sinah lawmhpinak roca  an kuat.

BPLA cu mizapi vengtu ralkap PDF he dirṭi in hramhram nawlngeihnak latu SAC ralkap uknak cu dohnak a tuah lai, tiah zumhnak kan ngei tiin NUG Defence Minister U Yee Mon nih lawmhpinak caṭial  ah a telh chih.

BPLA kumkhat tlin caan hmannak ah cun KNLA in duh-bu-choh-gyi Saw Baw Kyaw Hae zong aa tel i, Rakhine ralkap AA zong an i tel, tiah theih a si. BPLA cu tlangcung hriamtlai phu hna he hmunkhat ah i fonh in SAC ralkap a dohtu Burma hriamtlai phu pakhat a si.

Relchap, Mandalay ramthen, Meiktila peng chung ah um mi Paukchaung tiva ah kholh aa tim mi SAC Ralhrang police telh in minung pahnih cu Ti nih a fenh hna caah an thi tiah theih asi. Hi thil hi nizaan April 16, 2022 zaanlei suimilam 4:00PM hrawng ah a cang mi asi.

Nizaan a thi mi Police Zin Min Hteih hi caan karlak leave in khua lei a kal karlak ah a tu bantuk in Ti kholh nak ah a thih hi asi tiah an chim.

Meiktila ah a um mi Tiva pi hi kumkhat ah voikhat lengmang mithi an um i, kumkhat ah voikhat lengmang misung sa a ei mi a si tiah an chim phah tawn mi asi. Nizaan ah ti an i kholh hi a si i cu ahcun minung pahtum cu Tiva pi chung ah cun an pil. A si nain pawngkam mi nih an zuan hnawh colh hna caah pakhat cu an khamh khawh tthan i pahnih tu an thih hi asi tiah Mizzima News nih langhter.

Tiva pi ah a tla i a thi mi SAC ralhrang telh in minung pahnih hna cu an ruak tha tein zohfel a herh an ti than caah an mah police nih nih an lak hna, Sizung ah tha tein an zohfel hna lai i a lenglei hliamhma, tukvelhnak a um lo timi fehternak an tuah hnu ah an vui te hna lai ti asi.