Apoi Tuk E, SAC Ralkap Hna Nih Cun, Nungak Palhat Cu Nupi Caah Tiah An Tleih.

Wabutaw, palik sakhan checkgate cu KNLA phufonh nih an kah hna caah palik 6 an thi i, meithal 3 kan lak khawh, tiah KNU Doe Tathon nih nihin April 20 ah an thanh. Nizaan April 19, zinglei suimilam 8:30 hrawng ah KNU-Hpa-an peng hmunhma si mi Wabutaw,lamtonnak hmun ah a um mi.

SAC ralkap checkgate um mi hna le KNLA brigade 1 phufonh cu an i kap i, cu kahdohnak ah cun SAC palik 6 an thi, KNLA lei hliamh tuar an um lo, tiah KNU Hpa-an peng tualchung media nih a langhter.

Nihin April 20, zinglei suimilam 9:00 hrawng ah SAC ralkap kuttang um Hpa-an peng duh- myone-hmu le a minung hna nih Wabutaw,Gamahmaung,lamkam um mi dawr hna le lampi cu an bitkauh an tah, tiah tualchung media nih an ṭial.

Cu thil an tuah mi kong ah zeibantuk ruahnak in an tuah le Zeidah tuah an timh ti cu theih a si rih lo caah tualchung mipi hna cu thinphang in an um, tiah KNU Doe Tathon,media nih a thanh.

Malaysia ram chaklei Penang ramkulh, mipemvak mi chiahnak camp ah mibu buainak a chuak i, Rohingya 6 an thi, tiah The Writer news nih a thanh. Nihin April 20 zingka teah a chuak mi buainak ruangah minung a za in palik nih an hren mi hna.

Rohingya pawl cu camp in an zaam i Highway lampi an phak ah motor nih minung 6 a pah hna i an thi, tiah Malaysia Immigration Department in rianngeitu pakhat nih a chim.

Northern Penang ah a um mi Sungai Bakap ti mi camp ah Rohingya 582 cu chiah an si i, Rohingya pawl nih cun camp kutka an kham mi pawl cu an baoh i an zaam. Cu lak ah minung 362 cu an tlaih khawh ṭhan hna, tiah a chim chap.

Myanmar le Bangladesh ram ralzaam camp in Rohingya pawl cu Malaysia ram ah an zaam hna i Malaysia nawlngeitu hna nih 2020 thok in Rhingya minung thong leng cu covid-19 an i chawnh lo nakhnga camp ah an hren hna.

Sungai Bakap camp ah hin zei ruangah dah mibu buainak a chuah ti cu nawlngeitu hna nih an hlathlai lio a si i, camp in a zaam manh mi Rohingya pawl zong cu an kawl cuahmah lio hna a si, tiah ṭuanvo ngeitu nih an chim.

Sri Lanka chawhlehnak a tlakchiat tuk ruang ah mipi tampi nih cozah duhlonak an langhter in lam an zawh. Nizaan April 19 ah lamzawh mipi le palek kar buainak fak ngai a chuak i palek nih meithal in an kah hna caah minung pakhat a nunnak liam i, 24 hliam an tuar, hihi tutan buainak ah a hmasa bik a nunnak liam mi a si.

Kum 1948 ah zalonnak,independence, an hmuh hnu in chawlehnak ah an tlakchiat bik lio caan an phan i, Electric zong atu le atu in a mit, Patrol le Diesel man a fah pinah din ei le a dang thilman a a har tuk caah mizapi cu cozah cungah an thin a hung i mitampi nih cozah duhlonak lam an zawh.

Patrol le Diesel man a kai tuk caah khualipi Colombo le Kandy i tlawnnak mawṭaw lampi le tlanglawng lam phit in mipi nih lam an zawh i cozah an duhlonak an langhter caah palek nih lamzawhtu mipi cu meithal kuan tak in an kah hna i mitampi hliam an tuar pinah pakhat a nunnak a liam hi a si.

Sri Lanka khualipi Colombo in 95 km ai hlatnak Rambakanna khua zong ah lamzawhtu mizapi nih Diesel phurhnak mawṭaw an khangh caah palek nih tear gas in an kah hna i mibu an ṭhenṭhek hna, tiah theih a si.Crd: The Chin Post.