Apoituk E Ralhrang He Kahdohnak Ah Kan Pasaltha, Salai Sang Kung Thang Nih Mual An Kan Liamtak

Nizaan, May 9 Kalay Peng Yeshin le Donwe pawng kahdohnak Salai Alexander Sang Kung Thang (kum 17) zong a nunnak liam tiah theih asi. Nizaan, May 9 zinglei suimilam 8:00 in zaanlei suimilam 4:00 tiang Yeshin khua pawng kahdohnak ah SAC ralkap 4 an thi i, PDF Kalay in 2 an nunnak a liam tiah PDF Kalay nih cathanh chuah.

Kahdohnak ah a nunnak liammi hna cu Salai Alexander Sang Kung Thang le Stephen Biak Tha Thawng an si i Salai Stephen Biak Tha Thawng tu cu a ruak an char khawh nain,Salai Alexander Sang Kung Thang tucu kan hmai deuh a si caah zeitihmanh in a ruak kan lak khawh lo caah, kan lung a ttha lo kan ngeih a chia, A nih hi mino te a si i kum 17 a tling kate a si  tiah amah he ral a doh tti hawi pakhat nih The Chin Post ah a chim.

Thawngdang, Minung hi puicimhnak, zawttlaknak le vansannak nih a kan tlunh tikah, kanmah nakin a thawng deuh mi, a si kho deuh mi le thil ti kho deuh mi a fuhpanh mi kan si. Nihin vawlei ah biaknak 4,200 fai a umnak zong hi tihphannak in a chuak mi an si. Phundang in kan chim ahcun, Biaknak kan timi cu minung nakin a thawng deuhmi a um ti zumh i amah biak le thang`hat kha a si.

A fawinak in Pathian le pathian a um ti zumhnak, biaknak le thangthat kha a si. Laiphung biaknak Khuahrum biaknak zong kha tihphannak ruangah an rak biak mi a si. Tihphannak in kan biak cu, an that lo tuk ruangah si lem loin, kanmah nakin thil ti kho, a thawng deuh mi le nawlngeitu an si ca tu ah a si.

Kanmahle biaknak hoih ning cio in thil ti khawhnak ngeitu, nawlngeitu le chanhchuahtu pathian/Pathian cu kan biak cio hna i ngatchannak hram vialte kan thlak dih. Sinain kan bochan tukmi, kan i ngatchat tuk mi Pathian/pathian nih vansang in kan um lio, puicimhnak le zawtfahnak, zawttlak, ngaihchiatnak kan ton lio caan i kan aunak a kan leh lo tikah biaknak kaltak a fawite, a kaltak cang mi zong rel cawk lo. Cucu nihin kan vawlei ah siseh, bible chung tuanbia zong ah hmuh khawh a si. Cu kong he pehtlai in tlawmpal le forhfialnak ka van com.

December, 2019 in Tuluk ram, Wuhan chuak COVID-19 nih vawleipi a denning a fah tuk caah, minung 3,405,997 an thi cang ti si. Tulio hi India ram fak tuk in a den lio si i minung 278,751 an thi cang (Worldometer tarning). India cu a temtuar ning a fak tuk i mualpho in a um. Delhi khuachung um sizung ihnak le oxygen nih a zat ti hna lo, cucaah mithi an karhnak zong a si.

Khuacimui dirhmun in an um, an vansang, an awlokchong, vawlei cung ram kip theih in bawmh an hal. Chun lailing ah chunmui nih a tlunh hna tikah van an zoh ah a sang i lei an zoh ah a pit; bawmchantu herh in an au i an i bochan mi le biak mi pathian (Hindu mi) hna nih an aunak, an thlacamnak a leh hna lo tikah, zei bantuk pathian dah kan biak ti an hun hngalh. Naihrawng cu Indian Hindu nih an biakmi pathian le pathian nu 33 million milem an hlonhnak le an dennak video le hmanthlak zong a hung lar.

Anmah India hrambunh Thawngzamh ngan pipi zong nih an van pho len. An chimmi cu, “Hi pathian/milem hmai ah kun in kan ngeihchiat le kan caan vialte kan pek hlei ah, raithawinak tampi zong kan pek, kanmah zong kan i pumpe i thinlung tak in kan biak. Atu COVID-19 zawtnak in a kan khamh khawh lai zumhnak he raithawinak zong kan pek, thlacam zong kan nenh; sihmanhsehlaw kan thlacamnak le kan tahaihramnak vialte a kan leh khawh lo caah, santlaihnak an ngei ti lo.

Cucaah zatlang lam ah siseh, tiva luang ah siseh hrawh le hlonh a sinak a si an ti. An i ruahchanning in an biak pathian rian a tuan lo tikah an biaknak hlawt in Muslim biaknak ah tampi an lut ti si. A tawinak in chim ahcun, a nung kan biak Pathian nih COVID-19 hmang in Indian Hindu milem pathian a zuamcawh.

Anmah lawng an si lo, Egypt ram sal-taang Israel luatnak ding ah a tlung mi rai phun hra (10) zong kha Pathian nih Pharaoh bochan mi pathian pawl zuamhcawhnak a si (Ex.7-12). Biakam Hlun cauk Siangpahrang pakhat rel tikah, Elijah le Baal profet pawl biaknak kongah an i zuamcawhnak na hmuh lai. 1Siangpahrang 18 chungah, Carmel tlang ah an kai i aho biakmi dah Pathian nung le Pathian dik a si hngalhnak ah raithawinak an tuah mi kong ai tial.

Baal profet pawl cu, zingka in chung tiang biaktheng velchum ah cun heh tiah an i hlok, an au i “Maw Baal kan leh tuah!” an ti. A leh hlei hna lo caah an phung bantukin fei le nam in anmah le anmah an thi pawt thluahmah in an i chun i an i at. Thla an cam, an hram, an au; sinain a let hlei hna lo, ti kha, 1Siangpahrang 18 chungah kan hmuh. Hi Baal profet pawl zong, an biakmi Baal nih khamh khawh lai, thlacamnak leh lai le van thluachuah le lei thluachuah pek lai kha an rak i ruahchih tuk ve.

Cucaah an biak mi Baal hlei cun biaknak dang cu zeihmanh ah an rel lo, an biakmi Baal lawnglawng kha a nung mi pathian, thil ti khotu pathian ah an rak ruah. Sinain Pathian nih a van zuamcawh hna tikah, zei bantuk Pathian dah a nung i thil ti khotu a si a fianh hna. Biakam Thar cauk chung zongah pathian deu sin in Pathian nung a langhnak kan hmuh. Lamkaltu (Acts) 17 chung ah Athens khuami nih Min hngalh lo pathian/Pathian tiah min an bunh mi a um.

Bible thiamsang hna chimnak ah, Athens khua hi pulrai nih rak tlunh dawh. Cu lio ah tlangbawi (priest) ah an hman mi pa nih pulrai kian nakding ah tlangpai ah kai in nifatin raithawinak a pek i pakhat hnu pakhat an pathian min a pek i ca a tar ti si. Pul zawtnak a thian hlei lo tikah lungdongh hnu ah tiphul thlacam rathawinak a va tuah than i zawtnak a tlau, sinain min pek ding a thei ti lo i Theih/hngalh lo mi pathian/Pathian tiah a tial an ti. Cucu Paul nih a char i Hihi Jesuh a si” ti’n Khrih Thawngtha chimnak chirhchan ah a hman. Mi tampi nih hrinthannak an hmuhphah.

A cung ka langhter mi hna ruah tikah, a Nung Pathian hi khuaruahhar a sinak a lang. Amah sunparnak langhter ding ah lungretheihnak, taamhalnak, zawtfahnak zong a tlunter ko. Zeicahtiah, cu puicimhnak in zei bantuk Pathian a si kha hngalhter a kan duh, taamhalnak chungin tumcop Pathian a sinak hmuhsak a kan duh; zawtfahnak chungin damtertu Pathian a sinak langhter a kan duh.

Egypt siangpahrang Pharaoh nih fanu fapa thluachuah a ka petu tiah ai bochan mi le a biak mi Utlak cu Pathian a si lo zia, thihnak, harsatnak petu ah a hman. Baal profet hna nih taamhal lo tein ei awk tirawl thluachuah petu, vanruahhaang petu ah an ruahmi Baal pathian zong hmualphohtu a sinak a hgalhter hna i, Athens mi nih zawtnak chiahru hmanh in a kan khamh khawh tiah an ruahmi pathian vialte, a thimi an si zia zong a langhter. Atu Indian mi nih an biak mi milem an hrawh hna le an hlonh duahmah mi hna zong hi, biak tlak an si lonak a langhter hna ca ah si kan ti khawh.

Zeitintiah, Amah Pathian hmai phentu a si mi thil paohpaoh hi a kan lakpiak tawn. Cucu kan nun ah Amah hi pakhatnak chiah a duh ca ah a si (Matt. 6:33). Timh mi ram phak hlan ah kum 400 chung ram caar chungah Israel mi a vaihpi ko hna. Khi hmun ah mana le nimte in a cawm hna, cucu Amah ah a dih ti a um lozia, tumcop Pathian a si zia langhter a duh caah si. Kannih zong caan tampi cu harsatnak ram caar chungah a kan hruai tawn i dohtu ral a kan thlahhnawh tawn.

Dohtu hna hi kan sunghnak ding ah pek mi an si dih lo, lam thar kan hmuh nakhnga le mit a dei nakhnga ca zong an rak si. Cucaah Min Aung Hlaing nih meithal hmang in uknak a lak mi zong hi Kawlram pumpi nih za-uk phung diktak kan hmuhnak ding lam a si kho ko. Zeicahtiah, a lianngan mi Pathian thil tinh ahonih kan hngal kho lo, cucu Khuruahhar Pathian a sinak cu a si.

Kan hngalh khawh mi tu cu, Pathian nih hin, amah a dawmi hna ca ah le amah nih aa tinhmi ningin a kawhmi hna ca ah cun, zeizong vialte hi a tha lei ah a serpiak ko hna ti kha kan hngalh, /Rom 8 28