Atulio Yangon Laimi COVID-19 Sining le LCB Cawlcanghnak

Atulio Yangon Laimi COVID-19 Sining le LCB Cawlcanghnak
————
July 13 thawk in COVID-19 Third Wave nih Yangon khuachung lawng ah ni khat ah minung nunnak zaleng lengmang in a lak i, July 20 a hun phak cun ni khat ah minung 500 cung in an nunnak a liam.
Yangon ramtthen chung hmun kip ah Laimi khua kan sak ve bang in COVID-19 Third Wave nih fak piin a kan hnorsuan ve.

Atulio Yangon Laimi (abikin, Hakha le Thantlang) COVID-19 in a zawmi hna pumpek in a zohkhenhtu hna cu Lai Chiatthat Bu (LCB) hi an si. LCB nih chungtel 13 in COVID-19 Response Committee a ser i nitin in Yangon ramtthen chung Laimi COVID-19 mizaw hna sin ah bawmhchannak an pek hna.

LCB Secretary Pu Peng Hu nih nitin a hmuhtonmi thil sining cung ah hngetchan in atulio Yangon Laimi COVID-19 sining pawl a chim. ∎ Laimi COVID-19 Mizaw le a Nunnak a Liammi Atulio Yangon ramtthen chung Laimi zatuak in 70% hrawng nih hin COVID-19 zawtnak kan ngei cang lai, tiah Pu Peng Hu nih a ruahdamh.

July 26 tiang ah Laimi (Hakha le Thantlang) chung in COVID-19 in a nunnak a liammi minung 20 hrawng an um cang. Cun, Laimi COVID-19 mizaw hna lak ah a zualhmami hi atulio ah minung 12 hrawng an um fawn. Hi pin ah hin LCB nih a phak lomi Yangon khuachung Laimi mizaw le mithi zong an um kho rih.

Zawtnak ruang ah ahopaoh lung buai ngaiin cawlcangh a si tikah LCB zong nih Yangon ramtthen chung Laimi COVID-19 mithi/mizaw cazin aa chiah kho rih lo. ∎ Nitin LCB Cawlcangh Ningcang
COVID-19 Third Wave a chuah hnu in LCB chungtel pawl Yangon ramtthen hmun kip ah manh lo ngaiin an cawlcaang. “Oxygen pek lawng si loin a dangdang sii-ai le eidin pawl zong caan tampi ah kan damhkhaanpiak hna,” tiah Pu Peng Hu nih a chim.

∎ Oxygen Damhkhaannak Atu COVID-19 Third Wave ah ahlan COVID-19 zawtnak bantuk si loin zawtnak ciruang aa thlengmi Delta Variant nih Yangon ramtthen a den tik ah mizaw tampi thaw dawpchuah har in um a si i, Oxygen i hmuh khawh lo ruang ah a nunnak a liammi an tampi.

LCB zong nih abikin Laimi mizaw han sin ah Oxygen tlamtling in phakter khawh biatak tein aa zuam. Pu Peng Hu nih, “LCB nih hin Oxygen dur hi 100 hrawng cu kan i chiah. A voi khatnak Oxygen rawn ciami kan pek dih cang hna tik ah a dur lawng in an taang. Volunteer minung 6 hrawng nih zaankhuadai le suimilam 24 chung Oxygen rawn ding in an vung i tlar ve hmanh ah dur khat lawng hna kan rawn khawh tawn,” tiah a chim.

“Atu tiang ah Yangon Laimi COVID-19 mizaw hna sin ah oxygen dur 250 hrawng kan phakter khawh cang,” tiah a chim chap. Shan ramkulh lei ah LCB nih Oxygen ting 600 MMK man a cahmi zong a um i, ni khat ah dur 2 hrawng in Yangon ah a rak phan tawn.

Yangon khuasa Laimi, COVID-19 mizaw chungkhar hna zong nih LCB sin ah oxygen dur man lo tein hlan khawh a si i, oxygen rawnnak lei ah chungkhar nih mah tein thazaang chuahnak in kan bawm ve hram u, tiah nawlnak zong an tuah.

∎ Yangon Laimi sin LCB Secretary Biacah “Laimi sin ah biacah kan duhmi hna cu atulio khuaci kan muih lio ah hin oxygen hi kenret ah i chiah loin a herh deuhmi hna sin ah bawmhnak pek i zuam cio usih law LCB sin zong ah oxygen kan ngei, tiah thawngthanhnak in pakhat le pakhat i bawm cio hna u sih.”

“Cun, a pahnihnak ah LCB nih oxygen dur a lawngmi kan ngei len ko nain kan volunteer pawl hi minung 6 lawng an si caah oxygen rawn kan i har deuh ngaingai. A si khawh ahcun LCB nih a dur hi free in kan in hlanh hna lai i, nanmah chungkhar ca ah oxygen i rawnnak lei in rak kan bawm ve u ti kan duh ko.”

“A pathumnak ah atulio LCB upate hi mipi he pehtlaihnak kan tuah khawh peng nakhnga kan phone hi kan on peng. Zaan ah suimilam pathum chung lawng kan ih caan zong a tampi. Cucaah, nan herhmi paoh a um a si ahcun LCB ah rak kan pehtlai u law a si khawh chung in bawmh kan in zuam hna lai.” “Cun, atu Shanram lei ah Oxygen dur 200 hrawng (Ting 600 MMK man) kan cah i dur khat ah 350,000 hrawng a si. Cu zong cu chungkhar pakhat nih dur khat man (350,000) cio nan hlut khawh ahcun kan rianttuannak a tlamtling khun lai ti hi chim ka vun duhmi a si.” ◆ The Chin Journal

Be the first to comment

Leave a Reply

Your email address will not be published.


*