Australia Luh Khawh Nak Innkaa Aa Ong Cang

Nihin 22 November 2021 ah Australia PM nih thawngpaang tha ngai a hun kan thanh. 2019 December chuak pulrai ruangah kumpi kum 2 chung ramri innka fek thup in a khar hnu ah atuceo hi kaupi in a hun si. Kanmah Lai/Chinmi chungin Humanitarian VISA (Sub. 2001, 202), Refugee VISA (Sub.200), Emergency Rescue VISA (Sub.203) le Woman at Risk VISA (Sub.204) aa tlaihmi tampi, ramri innka khar ruangah taartahaak in a ummi kan tam. Harsatnak tampi chungin kan thlacamnak Pathian nih a kan leh cang i 1 December 2021 thok in VISA hmu cia paoh hnangam tein Australia ram chung nan lut kho cang lai. Cucaah VISA aa tlaih cang mi na si ahcun, na umnak ram chung Australia Embassy pehtlaih na rak i zuam awk hrimhrim a si lai.

Kan hngalh awk belte cu, ramri innka a hun cang kan ti rualrual in, rikhiah a um zungzal ti ruahchih a herh. Tutan ramri a hunmi hi minung 200,000 fai ca lawngah a si i December 2021 – January 2022 chung lut ding an si. Cun hi minung 200,000 hna cu: Refuges VISA (Sub.200), In-country Special Humanitarian Visa (Sub.202), Emergency Rescue Visa (Sub.203), Woman at Risk Visa (Sub.204), Prospective Marriage Visa (Sub.300), Temporary Work visa (Sub.400, 403), Training visa (Sub.407), Temporary Activity Visa (Sub. 408), Working holiday Visa (Sub.417),

Humanitarian Stay (Temporary) visa (Sub.449), Work and holiday Visa (Sub.462), Skilled- recognized graduate visa (Sub.476), Temporary Skill shortage visa (Sub.482), Temporary Graduate Visa (Sub.485), Skilled-regional (provisional) visa (Sub.489, 491), Skilled Employer Sponsored Regional (provisional) visa (Sub.494), International Student Visa (Sub.500), Student guardian visa (mithar caah an khar chung – Sub.580), Temporary Protection Visa (Sub.785), Safe Haven Enterprise Visa (Sub.790), Sponsored Parent (Temporary) visa (Sub.870) le Maritime Crew visa (Sub.988) hna aa tlaihmi caah si lai.

Theih Ding; A cunglei kan langhtermi VISA aa tlaihmi si ko zongah Rai-sii voihnih aa chunmi na si hrimhrim hau lai. Australia cozah nih sii-ai lei tuanvo pekmi Therapeutic Goods Administration (TGA) a cohlanmi i ramchung le ramleng ah chunhmi- AstraZeneca Vaxzevria, AstraZeneca Covishield, Pfizer/Biontech Comirnaty, Moderna Spikevax, Sinovac Coronavac, Bharat Biotech Covaxin, Sinopharm BBIBP- CorV, Johnson & Johnson/Janssen-Cilag na chunh a herh lai. Ngakchia kum 12 tang cu aa chun lomi an si zongah chunmi in pom an si lai. Mah kong hi tlamtling deuh in nan rak hlat hau fawn lai.

Rai-sii na chunhnak certificate ah: Min, chuah nithla (DOB) or passport No., na chunhmi rai-sii min le nawlngei sibawi min a cuan hrim herh fawn lai. Cun Australia ramchung pengkulh cozah nih a ngeihmi pulrai zulhphung an i lawh cio lo caah, na luhnak ding khua le ram cozah zulhphung na hlat hmasa hau lai. Quarantine chiah na duh lo a si ahcun, NSW, Victoria le ACT hna pengkulh vanlawng bual ah tum na tim lai. Mah pengkulh pathum chung um thai ding na si lo ahcun, na kal duhnak (final destination) khua-ram zulhphung le na tumnak pengkulh zulhphung na zohchih a hau lai.

Tutan ramri innka hunnak hi 1 November lio he dannak tete a um. Hlan ah Travel Exemption sok a rak hau, atu cu a herh ti lai lo. Kan langhtermi VISA aa tlaihmi na si ahcun, travel exemption sok hau lote in na rak lut kho tinak si. Amahbelte, nan i thawh (departure) hlan nithum chung (72 hrs) ah CPR test nan i tuah a herh lai. Nan CPR test kha Negative a si hrimhrim lai. Hi pin ah, Australia Travel Declaration le International Arrival Permit sok nan hauh le hauh lo zong, felfai tein nan hlat hmasa a herh te lai. Pulrai ruangah hlan bantukin khualtlawn lai tuah ding tete a tam caah, na umnak ram Australia Embassy na pehtlaih hna in na tuah herhmi vialte na hal hmasa hna awk a si lai. Laimi tam deuh nih tlaihmi VISA (200, 201, 202, 203 le 204) pawl zong, nanmah nih Embassy nan pehtlaih hna a tha. A hlei in VISA 202 aa tlaihmi. Zeicahtiah, nanmah nih vanlawng ticket i buaipi a herh caah, ticket lak hlan ah tuah ding thil tampi a um caah, nangmah ruahnak le lung in cawlcangh kha ping na su kho. Rff: Cerson Twintwin Fb ca hmai

 

Be the first to comment

Leave a Reply

Your email address will not be published.