Bomb Lamh Sual In Pu Thang Lian Cu A Thi I Pakhat Hlim Fak Ngain A Tuar,

Chin ramkulh chaklei Tedim peng Laitui khua Linṭan tlang pawng ah May 2 ah Laitui khuami pahnih cu, bomb lamh sual ruangah Pu Thang Lian cu a thi i, a hawipa cu hliamhma a pu, tiah tualchung mi nih an chim.

Pu Thang Lian le Pu Suan Lian cu Sia tlaumi an kawlnak ah hiti bomb an i lamh sual hi a si, Pu Thang Lian cu a thi colh. Pu Suan Lian cu hliamhma fak ngai a tuar caah Mizoram ah thlop dingin an kalpi, tiah tualchung mi nih an chim.

Laitui khua kam Linṭan tlang pawng ah SAC ralkap nih chek gate an rak tuah i CNF he kahdohnak a rak fah ngainak hmun a si. Vawlei chung ah bomb an phumnak hmun zong a si, tiah an chimchap.

May 1 lio zong ah Falam, Rih lam kam ah tualchung mi mino pakhat cu bomb lamh sual ruang ah fak ngai in a rak i hliam cang. April thla chung ah Linṭan tlang kam ah Sia pakhat zong bomb nih a rak puah i a thi.

SAC ralkap nih hramhram uknak an lak hnu in Chinram chung ah, tualchung mi 9 bomb lamh sual ruang ah an thi, 19 nih hliam an tuar, tiah theih a si.

Thawng pang dang, Sagaing ramṭhen, Kalay peng Ashihshi khua le Shiaphu, khua kam ah SAC ralkap le CDF, PDF cu May 1 le 2 tiin nihnih chung an i kap i SAC ralkap 10 an thi, PDF -Kalay in ralkap 1 a nunnak a liam ve, Kum 15 hrawng nu pakhat cu hriamngan nih a khen caah a nunnak a liam, tiah CDF sin in theih a si.

Ashihshi khua kam hrawng ah May 1 zing sml 6:00 hrawng ah kahdohnak a chuak , cu hnu ah SAC ralkap le Pyusawthi cu rallam an sial lioah mizapi hriamtlai nih an kah hna caah SAC ralkap 5 an thi i, CDF(KKG) in 1 pakhat a nunnak a liam, tiah theih a si.

Shiaphu khua kam kahdohnak cu May 2 zinglei in aa thok i SAC ralkap pawl cu, AungMingalar khua in Shiaphu khua leiah rallam an sial caah chun nitlak kahdohnak a chuak. SAC ralkap 5 an thi i, meithal zun 4 an chuh hna, tiah theih a si.

Cu kahdohnak ah CDF-KKG၊ PDF(Kalay), VAKOK (CNDF)၊ Ringger (RKDF) le Pa Ka Pha phu an i fonh.

May 1 kahdohnak ah SAC ralkap hriamngan kuan cu Yeshin khua ah a tla i, khum 15 hrawng nu pakhat a khen caah a nunnak a liam. Kum 10 hrawng nu pakhat zong aa hliam, tiah theih a si.

#Htichaih Peng Ah SAC Ralakp Bomb Puah An Tong, 6 An Thi, 8 Hliam An Tuar

Sagaing ramṭhen, Kata pengkomh, Htichaih peng Indaungkone in tlhang leiah a kalmi SAC ralkap palwl cu, May 2 ah bomb in kan puahhnawh hna i SAC ralkap 6 an thi, 8 hrawng hliamhma an pu, tiah Eagles Army – HPDF nih cathanh an chuah.

SAC ralkap pawl cu Ayechanlwin khua in Indaung khua leiah rallam an sial i, Eagles Army – HPDF he sml 3 chung hrawng an i kap, tiah theih a si.

Indaung khua in an chuah lioah bomb lung hnih in voikhat an puahhnawh hna, Kutye, khua kam ah Eagles Army – HPDF le ṭangrual phu hna nih, an puah ṭhan hna i SAC ralkap 6 an thi colh, 8 hrawng hliamhma an pu, tiah Eagles Army-HPDF nih cathanh an chuah.

Cun, Mawleik peng Panthar khua um palik sakhan cu, PDF nih May 2 ah an va kah i palik bawi chang telh in 3 an thi i, sakhan chung ummi ralkap le palik tam ngai hliamhma an pu tiah theih a si.Crd: The chin post.