Breaking News; KIA/PDF-Katha le Ralhrang kahdohnak ah Ralhrang 40 an thi tiah NUG nih thawng a thanh

KIA/PDF-Katha le Ralhrang kahdohnak ah Ralhrang 40 an thi tiah NUG nih thawng a thanh
================

Sagaing Ramthen, Katha(ကသာ) peng Moedar Titene(မိုးဒါတိုက်နယ်) ah September thla ni 20 zanlei ah PDF-Katha/KIA fonhti le Ralhrangbu hna kahdohnak a chuak i Ralhrangbu lei in a thi mi cu ralhrang 40 hrawng a si lai tiah National Unity Government(NUG) Acozah nih cathanhnak a tuah tiah theih a si.

Atulio ah Magwe vanlei ralkap Sakhan in raltuknak vanlawng pa 5 nak tlawm lo, September ni 20, tuzan sml. 9:00 hrawng ah an zuang tiah khuami hna sin in thawng kan lak kho i mah vanlawng hna cu a thimi tam ngai nak Katha lei ah a chuak i a kahdoh kho men tiah khuami cheukhat nih an chim. Crd; Khit Thit Media

Sept 7 ah NUG nih ram pumpi huap kahdohnak ni (D-Day) a thanh hnuin ralhrang le mipi vengtu ralkap hna kahdohnak a fak chin lengmang. Sept 20, tuni ah cun “Dothlennak dothnihnak a phan cang lai (တော်လှန်ရေးနောက်တဆင့် လာတော့မယ်)” tiah NUG Defense Minister U Yee Mon nih a thanh.

D-Day thanh hnuah Mandalay, Rangoon le ramhcung hmunkip ah nifatin in kahdohnak le puahkehnak a um peng. Ralhrang nih an thatlonak le sualnak an chuah chin lengmang bantukin mipi vengtu ralkap zong nih ralhrang le an lei ttang hna cu fak chinchin in an doh ve hna.

Ralhrang nih an khanhmi khua/sang bawi hna zong nifatin in thah an tong. Cucaah khua/sang bawi cheukhat cu an rian in an i ngol. NUG Denfense Minister U Yee Mon nih cun “Dothlennak tuah chung i inn le lo a rawkmi hna cu mipi cozah nih tuanvo a lak ko lai” tiah a chim fawn.

Karen National Union (KNU)tthit hruainak tang ah ummi KNDO Battalion (1) nih ni 20 chung ah ralhrang 35 kahthah tiah KNU nih a thanh.
‘KNDO Battalion (1) le SAC ralhrang karlak ah September 1-20 ah voi 45 kahdohnak a chuak i ralhrang lei in minung 35 an thi i 51 hliam an hmu’ KNU nih cu a langhter.

Thailand- Myanmar ramri Thanlwin tiva kuanghrawn ummi ralhrang Camp hna cu KNLA le KNDO hna i bawm in an lak hna hnu in cu an camp hlun hna cu lakkhawh tthan ding ah ralhrang lei nih biatak tein ttan an la than tiah KNDO Tawngmangham Saw BoMi nihcun a chim. Cun KNU Tatmaha(5) ramchung ah ralhrang kuttang simi ramri veng ralkap ‘BGF’ nih ralser in an um caah nichiar te i kahnak a chuak tiah KNU nih a thanh. Crd; The Chin Post

Be the first to comment

Leave a Reply

Your email address will not be published.


*