Breaking News: March 18 SAC Ralhrang Kut In CNDF Ralkap Rawlchuang Pakhat Nunnak A Liam

Chin National Defense Force (CNDF) Kalay camp an rawlchuang pakhat cu SAC ralhrang nih 2022 March 14 an tlaih i 2022 March 18 ah a ruak in an hmuh tiah theih a si.  CNDF ralkap rawlchuang pakhat a ruak an hmuhnak kong he pehtlai in, March 14 ahkhan khuachung lei ah thil cawk dingin a kal i SAC ralhrang nih an tlaih.

An tlaih ni nganak ah aruak in hmuh a si. A ruak zong kan laak khawh. Anih hi Kalay peng camp pakhat ah kan ralkap pawl ca ah rawlchuangtu a si,” tiah CNDF rian ngeitu pakhat sin in thawng kan theih.  Atu nunnak liam mi pa hi an tlaih hnu ah an thah mi a si. Cun a min le a kum fiang in theih a si rih lo. Tuzarh chung lawng ah CNDF mipi ralkap in ram le miphun ca ah nunnak a pemi minung pathum an si cang.Ralhrang ralkap mawtaw 100 tluk cun Magway ramthen Pakokku in Chin ramkulh lei an pan i, Chin ramkulh chung hi faktaktak in doh an timh a si cangko lai tiah mi cheukhat nih cun an chim. Ralhrang mawtaw 100 hrawng cu march 17, zinglam nazi 9 hrawngin a chuak i, Chin ramkulh lei panh in an kai dih ko. Atu bantuk in ralhrang mawtaw 100 tlukin Chin ramkulh lei an panh timi cu Mindat CDF nih an rak thei cia cang i, do dingin timtuahnak an rak ngei cawh ve.

Pakokku I sianghniak chia pakhat nih achim nak ah cun Ralhrang mawtaw 75 tluk cu hmai ah an kal hmasa i, an lakah hin ke 12 ngei ralhrang mawtaw zong a um. Cu hnuah ralhrang mawtaw 24 zong Chin ramkulh lei ah cun an kai chap. Ralhrang ralkap mawtaw hi adilak ah 100 tluk an si i raldo ding cu an lo bik ko. Atu i ankal ning in alanh asi ah cun Chin ramkulh, Yaw Le Pauk lam an pan, tin a chim.CDF Minat in biachim tu Salai Yaw Mang nih cun Kan mah lei panin ralhrang ralkap mawtaw pawl an rak kai timi theih tikah lungrethei ngai in a umchun cu kanmah Mindat CDF pawl lawng kan siko lai, tin a tarlang.

A tu lio te ah hin Chin ramkulh chungah Falam peng Rihkhawdar, Kanpetlet peng le Matupi peng hna ah ralhrang ralkap le mipi ralkap pawl fakpi in kahdoh nak achuak i Rihkhawdar ahcun March 5 thawk khan mipi ralkap pawl cun ralhrang ralkap an rak kah hna i, Tio mipi pawl zong hmunhim ah an rak I tthial ter hna.

Kanpetlet leiah cun ralhrang ralkap le mipi ralkap pawl cu March 11 khan an I kap ve cang i, an hriam aa thlauawk tuk caah le mipi zawnruah tuk ruangah CDF Kanpetlet cu an sakhan hmunpi tiang an chuah tak. Kanpetlet i kahdoh nak ruangah khua 12 in mipi 3000 tluk cu khua ah um ngam loin hmunhim ah an zam hna.Kanpetlet CDF in biachim tu nih cun Ralhrang minung 200 tluk nih an kan kah i, hruaimnam aa thlau tuk ruangah le mipi zawn kan ruat tuk ruangah kan sakhan hmunpi kan chuahtak. Tu ahcun kan sakhan pawngkam khua 4 ah ralhrang pawl umhmun an khuar. Curuangah , kiangkap khua 12 in minung 3000 tluk ralzam an um i, ramlak ah a sikhawh ning in umhmun an khuar.

March 15 hnu ahcun kan i kap ri lo. March 16 ah Mindat ralkap hmunpi le Kyauk Htu ralkap hmunpi in ralthuam ngan he khua mipi umnak an rak kah chih than. Cu ruangah khua mipi pawl cu hmunhim ah an zam cio. Tu ahcun ralzam pawl cu asi khawhchung in kan buaipi cuahmah i, zei lei paohah bawmh hau tuk dirhmun an si  tiah  a chim.