Breaking News: Ralkap Pawl Hakha Khuachunh An Lu

Falam – Hakha kar ah aa tap mi ralkap Hakha khuachung an lut

Falam le Hakha karlak ah zarhkhat tluk aa tap mi ralkap motor 40 fai, tank pahnih le JCB pakhat cu nihin zanlei sml 3: 15 tluk ah Hakha khua an lut kho cang tiah thawng kan theih.

Falam in October 13 ah Hakha lei aa thawh mi ralkap cu CNA, CNDF le CDF nih lam an kham hna i an kah hna caah zarhkhat fai lampi ah an i tap.

Chin ralkap nih SAC ralhrang a tlawm bik minung 20 an thah hna, 40 renglo an hliamh hna pin ah an motor 16 an hrawhpiak hna.

Ralhrang hna nih Rialti khua ah biakinn telh in inn 13 an khangh pin ah Thlanrawn khua inn 13 a khanghpiak rih hna. Cun an biakinn zong an hrawhpiak hna.

October 19 zan ah ramthlo biakinn pahnih (AG le Baptist) biakinn ah an riak i ramthlo khuami satil an thahpiak hna pin ah inn 100 tluk an baoh piak hna tiah kan theih.

Ralhrang hna nih Rialti, Thlanrawn, Lungrang le Ramthlo khua hna ah mipi thil tampi an firpiak rih hna.

Photo: Kalay an phanh lio le Falam in Hakha lei aa thawh mi Tank pahnih
The Chinland Post

A tangah Col.Solomon biahalnak le bialehbak rel khawh a si. Thazaang tampi na ngah ve hrim lai, nan hawile share chin ve hna.

Biahalnak(1) Kan ram nih a ton cuahmah mi dothlennak sining he pehtlai in mipi sin hrawmh na duh mi?

Bialehnak : Tu kan tuah lio mi dothlennak cu kan mah Chin miphun ca hrimhrim ah a biapi tuk mi asi. Kan Chinram le Chin miphun caah tutan dothlennak hi kan tei hrimhrim a hau. A tei zong kan tei hrimhrim lai. Cucaah mipi lei zong nih nan lungthin le nan thazang dih lak in rak kan dirpi u law thazang rak kan pek ko u tiah sawm ka duh hna.

Biahalnak(2) Raltuk nak kan kal tik ah zeibantuk lungput dah kan ngeih ding a si?

Bialehmi: Raltha ngai in hi ral hi kan tei hrimhrim lai timi lungput hi neih kan herh. Mah duh nak si lo in miphun caah raltuk kan kal timi lungput zong ngeih kan herh. Kan hruai tu upa pawl nih Order a kan pek mi kha pakhat hmant pel lo te in zulh duh nak thinlung ngeih kan herh.

Bialehmi: Raltuk timi cu a tlawm le tam cu tem in nak hi a um zungzal mi si. Vawlei cung tuanbia zoh zong ah raltuk poh cun tei a si ah mah lei kap temh in nak cu a um peng mi hi hmuh khawh a si. Cucaah raldoh kan i tim i tei kan i timh ah cun temh in nak kan ton ding zong hi kan pom ve hau. Mah cung zong ah kan lungthin le kan si khawh tawk in kan i timh cia a hau. Temh in nak kan ton mi zong hi a lak si lo in a pin lei ah kan tei khawh nak caah a si te lai.

Mah caah cun kan zapi ten lungrual te in tutan dothlennak kan tuah mi ah lungthawng te in tha i pek peng ko u sih. Thla i cam piak zungzal ko u si. Tutan dothlen nak kan tuah mi ah kan Pastor pawl le Khrihfa upa pawl tiang hriam an i tleih i an kan tel pi ve caah kan tei hrimhrim lai. Biaknak lei he ai pek kho deuh mi zong nih rawl ulh bak in thla na kan cam piak peng ding sawm kan duh hna.VOM

Be the first to comment

Leave a Reply

Your email address will not be published.


*