Caan Karlak Sianginn Ding 300 Leng Hon A Si Na In

Sagaing Ramṭhen Chung Ah Caan Karlak Sianginn Ding 300 Leng Hon A Si. Sagaing ramṭhen, chung ah NUG hruainak in onmi caan karlak fimcawnnak sianginn cu 300 leng hon a si cang, tiah Takhin, fimcawnnak phu hruaitu nih an chim.

Nawlngeihnak latu SAC ralkap hna le tualchung hriamtlai phu karlak nitin ngawt in kahdohnak a chuah caah, ngakchia hna cu ca cawng kho lo le sianginn phan kho lo in kum 2 tluk an um cang.

Ngakchia nih fimnak an cawn khawhnak ding caah a thar in timhlamhnak ngeih a si i, sianginn 300 leng cu onnak tuah khawh a si cang. Cu chungin ca cawng kho mi siangngakchia dihlak hi singkhat leng an si cang, tiah Takhin fimcawnnak lei hruaitu committee in ṭuanvo ngeitu pakhat nih a chim.

Takhin fimcawnnak cu NUG Ministry of Education nih a tuah mi caan karlak fimcawnnak curriculum ning in an cawnpi hna. CDM cawlcanghnak a tuahtu siangcachim (saya, sayamah te) le volunteers hna i fonh in ca chimhnak a tuahtu Takhin fimcawnnak sianginn cu tualchung hriamtlai phu hna nih an kilven hna, tiah theih a si.

SAC ralkap nih rallam an sial ruangah kahdohnak a chuah nak hmun Tanintharyi peng Taku khua ah SAC ralkap nih ngakchia pakhat tel in khuami 2 an kahthah hna tiah khuami hna nih an chim.

May 20 ah kum 10 hrawng a si mi thluaklei tlamtling lo ngakchia pakhat le khuami pakhat cu SAC ralkap nih meital in an kahthah tiah theih a si.

SAC ralkap hna nih Taku khua le a pawngkam khua hna cu hriamngan in an kah hna caah khuami a thong leng in an zaam tiah theih a si.Thualchung mi cheukhat hna cu SAC ralkap nih an tlaih hna tiah tualchung mi hna sin in theih a si.Nihin zingkaa zongah SAC ralkap nih rallam an sial leng ah Taku khua le Theindaw  khua hna cu internet line hna an phih piak hna tiah theih a si.

MinChian Sianginn Ah Umhmun Khua Mi SAC Ralkap Hna Cu Kah An Tong, 2 An Thi

Mandalay ramtthen, Minchian khua sianginn ah umhmun a khuar i mipi hnahnawh nak a petu SAC ralkap hna cu kan kah hna i 2 an thi tiah Nuatogyi PDF nih cathanh an chuah.

May 19 ah Minchian khuapi Hight School No. 2 ah umhmun a khuarmi SAC ralkap hna nih an luhchuah pah ah mipi hna cu a phun phun in hnahnawh nak an pek hna caah Natogyi People Defense Force nih ralrin peknak in kan kah hna i SAC ralkap 2 an thi tiah Nuatogyi People Defense Force sin in theih a si.