CDF-Hakha Council Hmunhma Chung Kilvennak, Humhimnak Ah Cun

CDF-Hakha nih cun hmailei zeitindah kar kan hlan lai i hmual a ngei mi dothlennak a um khawh chin lengmang nak lai mizapi nih zulh a herh mi le theihternak cathanh an chuah.A tanglei ca hi CDF-Hakha nih an langhter mi cu a si.

Zapi Sin Thawngthanhnak. Thawngthanhnak No. 1/2022. Hakha peng dothlennak cu Chinland Defense Force – Hakha Council in kalpi ding tiah Hakha peng dothlennak minung zapi tonnak le lungtlinnak in 2022 May 1 ni ah biachahnak tuah a si cang.

CDF-Hakha kumkhat tlin camtuak (March 21) le a voi (1)nak CDF-Hakha Council, EC le OC meeting zong CDF-Hakha chungtel dihlak minung 400 leng Hakha peng hmun pakhat ah 2022 May 26-30 tiang hlunghlai ngai in kan tuah i a tanglei bantukin zapi sinah thawngthanhnak kan hun tuah.

CDF-Hakha Council cu MiE, Senthang, Zokhua peng le Hakha khuapi chung dihlak fonh in dothlennak caah tuahmi a si bantukin cu Hakha peng ahcun CDF-Hakha Council lawnglawng do a tlami dothlennak bu a si.

CDF-Hakha Council hmunhma chung kilvennak, humhimnak, phungsernak, zatlang uknak le biaceihnak kong vialte ah dothlennak caan chung cu CNF/A dirpinak he CDF-Hakha Council nih tuanvo a lak cang lai.
Min Aung Hlaing le a ralhrang ralkap hna cu ralhrang an si caah mizapi sin in uknak an kan chuh ni 2021 February 1 ni thok in an tuahmi vialte cu dotla an si lo.

2021 February 1 in mizapi kut ah nawlngeihnak a phak hlan tiang ralhrang cozah (SAC) nih a tuahmi vialte cu dotla lo an si caah hrawh le hnawn a si lai lengah 2022 June 1 ni thokin ralhrang cozah SAC riantuannak siseh, cu riantuannak ah aa telmi le tha a pemi vialte cu mizapi, ram le miphun caah tih a nungmi ralhrang le an riantuannak a si tiah dantatnak tuah nan si cang lai.

Dothlennak caan chungah mizapi zulh awk (order) hna zong Council nih a herhning in a chuah lengmang cang lai caah nan zulh cio naklai thawng kan in thanh hna. Cu bantukin mizapi theih awk vialte cu Chinland Defense Force – Hakha timi le Hakha Campaign for Justice timi Facebook Page ah zoh khawh lengmang a si lai. CDF-Hakha Council
Pehtlaihnak – 09453724463CDF-Hakha

Thawngdang, Cikhat te chung ah vawleipi a lauter dihtu thawngpang cu, kan hnungzarh ah Texas, Uvalde Robb Elementary school ah kum 18 sianghakchia pa pakhat nih sianghakchia minung 19 le saya te pahnih arak kah thah hna nak kha a si.

Mah vialte siangakchia thihnak kongkau cu Texas palek nih hlathlai nak an tuah cuahmah i cu hlathlai nak an tuah cuahmah nak ahcun khuaruahhar ngai thil pakhat an hmuh. Mah cucu, kan hnung zarhte nih ah khan Lee County Sherif nih kum 10 nghakchia pate nih hi bantuk meithal kah a chuak khawh nak ding ah a rak fuihporh tiah an theih. Mah caah cun kum 10 nghakchia pate cu palek nih an tlaih.

Mah caah Texas, Uvalde Robb Elementary school ah nghakchia minung panga hliam an tuarnak le mi 19 le saya pahnih an rak thihnak kongkau ah kum 10 nghakchia pa Isaak Danieal Marguez cu pehtlaihnak a nei tiah palek nih an tlaih. Lee County Sheff Office nih an langhter nak ahcun Daniel Marguez hi Grace 5 kai lio mi asi tiah an chim.

Daniel Marguez hi Cape Coral, Florida, Patriot Elementtarry school ah a lut mi asi. Nawl ngeitu nih bia an hal nak ah Daniel nih a chim mi cu chung in an hmuh khawh mi cu hi bantuk sianghakchia kah thah an si nak ding ah hrocer nak ca a rak kuat hna tiah theih asi.

Mah thawngpang an theih le cangka Patriot elementary sianginn cu The School Threat Enforcemennt Team le Youth Services Criminal Investigation Division Threat Enforcement Team le Youth Services Criminal nihcun hlathlai nak an tuah colh.

Sheriff Carmine Marcino zong nih biachimnak a nei ve i a chim mi cu Florida hngakchia an tthut to ning le an cawlcangh cu ttihnung taktak an si tiah a chim. Vawleicung ram rum/ ram tthawng/ ram nuam kan tihmi US rampi cu a himlo taktak mi ram dirhmun ah a dir cang.