CDF nih Tangka Ting 20 Man Hrawng SAC Ralhrang Drone an Kahthlak

CDF nih Tangka Ting 20 Man Hrawng SAC Ralhrang Drone an Kahthlak
——–
Nizaan tihni (August 11) zaan ah Laikua in meng 16 a hlatnak hmun ah CDF nih SAC ralhrang drone pakhat an kahthlak.
CDF nih an kahmi Drone hi Myanmar tangka in 2,000,000 ($1,200) man hrawng a si i, Tuluk ser DJI Mavic Pro Platinum Drone a si.

1.6 pounds a rit i, 4K Resolution le Zoom 100-400mm tiang a ngahmi camera an tarh chihmi a si. Falam, Hakha le Thantlang karlak Laikua Tidil in meng 16 zawn hrawng ah CDF nih tla lak in an kahpiak hna hi a si.

Hakhalay Khuami Pu Sum Lian Thawng SAC Ralhrang nih an Thlah Than. Nizaan (August 12) ah Hakhalay khua kiangkap ah SAC ralhrang nih an tlaihmi fa 2 ngei Pu Sum Lian Thawng cu nihin zinglei ah him tein an thlah tthan, tiah thawng kan theih.

Kahdohnak a chuah lio ah Pu Sum Lian Thawng hi Lo in a tlun lio a si i, SAC ralhrang nih an rak tlaih. Khuami pakhat nih, “Pu Sum Lian Thawng hi mipumrua fate a si. Miping ngai zong a si i, an tlaih lio ah hin a kut hri in an ttem i cuticun Natchawng lei ah an kalpi. A sining le a konglam pawl zong SAC ralhrang a chimh hna i ka thlah tthan ko u tiah a nawl lengmang hna hnu ah nihin zinglei ah an thlah tthan,” tiah a chim.

Pu Sum Lian Thawng te unau hi ngakttah an si pin ah a fale pahnih le a naule a cawmkengtu fa upa a si caah SAC ralhrang nih an zaangfah i an thlah tthan zong a si kho, tiah a cunglei khuami nih a chim chap. Pu Sum Lian Thawng cu Hakhalay ah him tein a phan tthan cang.

SAC Ralhrang nih Panmunchawng Khuami Pu Joshua an Kah. Nizaan (August 12) ah a cangmi Kalay peng, Hakhalay, Chawngkhuah le Natchawng hrawnghrang kahdohnak ah Panmunchawng khuami Pu Joshua (kum 27) cu SAC ralhrang nih a lu ah meithal in an kah i a nunnak a liam, tiah thawng kan theih.

Natchawng pawngkam ah kahdohnak a um lio ah Pu Joshua hi SAC ralhrang he an i tong sual i an tlaih hnu ah meithal in a lu ah an kahmi a si. “Pu Joshua hi PDF zong a si lo. Khuami sawhsawh a si. Ral zong a domi a si lo. Nihin zinglei ah Natchawng pawng tlanglawng lamkam ah a ruak kan vung char,” tiah khuami pakhat nih The Chin Journal ah a chim.

Pu Joshua hi fa pathum a ngeimi a si. A ruak cu nihin zinglei sml. 10:00 ah an khua ah vui cang. Panmunchawng khua cu Hakhalay khua he aa pehmi Laitlang lei kap ah a ummi a si. Credit: The Chin Journal

Be the first to comment

Leave a Reply

Your email address will not be published.


*