Chin Ram Kulh Chung Ah Ralkap Nih Ttuan Vo An Pek Mi Pu Ngun San Aung Cu, Mual A Pho Cik Cek Cang.

Chin ramkulh Administrative Council Chairman Pu Ngun San Aung nih Ralhrang uknak tang ah rianttuan ve ding in Pu Thla Bik rian a khinhmi cu Pu Thla Bik nih a cohlang lo, tiah nihin ah kan theih.

Mah Pum Pak Ca lawng a ruat mi Pu Ngun San Aung cu ninghngal tukin a cawlcang i a Mualpho cikcek bak ko hih, Amah duhnak te bakin Rian a Khinhmi Pu Thla Bik nih a Cohlang ve ti lo. Minung pa 6 a khinh mi chungin aho hmanh nih an Cohlang lo tinak asi a Mualpho cikcek bak ko cang.

“Pu Ngun San Aung nih rian a ka khinhmi hi ka thei bak lo. Ahlanken in theihternak zong zeihmanh a um lo. Ka um lo kar ah ca an rak ka pek i zei hmanh ka thei lo,” tiah Pu Thla Bik nih The Chin Journal ah a chim.

Kan rammipi nih hi tluk hin an duh lo bu ah zeitindah ralkap kut tang ah cun rian kan ttuan hnga, tiah a chim chap.“Mah an ka khinhmi rian hi ttuan ka tim lo. USDP chan zong ah khan mah rian hi an rak ka fial cang.

Cun, NLD lio zong ah an ka fial bal cang. Asinain, ka ra rak al hna. Mah lio hmanh ah ka ttuan khawh lomi cu zeitindah atu mah tluk in kan rammi nih an duh lomi ralkap kut tang ah cun rian cu ka ttuan hnga,” tiah a chim.

Kawl ram pumpi uknak a ramh i, thla 2 fai chung ah rammi 700 leng ruru hranghrang in a thattu Ralhrang kut tang ah Hakha khua tthanchonak rian ttuan ding in Pu Ngun Sang Aung nih Hakha khua i bochanmi upa 6 cu committee chungtel ah rian a khinh hna nain ahohmanh nih cu rian cu an cohlang lo, theih asi.

Source: The Chin Journal-April 18, Hakha

Be the first to comment

Leave a Reply

Your email address will not be published.