Chinland, Lungler Sakhan cu Mirang(British) Chan bak in a rak um mi a si cang

Chinland, Lungler Sakhan cu Mirang(British) Chan bak in a rak um bak mi a si cang
=============

Mirang nih Kawlram an rak uk lio ah atu i Telenor Tower tung pi a dirnak hmun ah khin Mirang Ralkap Sakhan nganpi an rak chiah i Bihar Camp ti a rak si. Bihar cu India i Bihar khi an si. Cun Kawlram Independence an lak hnu in Lungler ah June 17, 1965 ah ralkap sakhan an rak chiah. Ralkap Sakhan cu March 10, 1967 ah Palik Sakhan ah an thlen.

1968 June 8 ahhin Sakhahmu cu Lal Thang a rak si i Thantlang ah meeting a tuah caah Mang Tial (senhnih) nih sakhanhmu tuanvo a lak lio a si. Cu caan lio theng te zing sml pakua in Mizo tapung nih an hung kah hna. Palik Tawk Zam cu mortar bomb nih a tlak i a thi colh. Sakhanhmu Mang Tial cu a khel ah an khen ve.

Palik Rual Cung nih kan i kap ti lai lo a ti le mizo tapung pawl cu an hung lut. Palik minung 16 hrawng an rak um. Cutin zing sml 11 tluk ah an rak lak khawh. Mizo tapung nih nan pheikhok le thilthuam(kedan le thilthuam) vialte kan pe dih uh an ti hna i an pek dih hna. An hrem hna lo. Hrang Kio Pa inn ah an pumh hna i Mizo tapung bawi Pu Cuao Dinga nih bia a chim, “Kan ram a si, nan duh le kan sin ah hung uh, nan duh lo si le Kawl cozah sinah kal u,” a ti hna.

Palik an zapi tein muikhumnak Pu That Nawn nih a rak tuahpiak hna hnu ah Thantlang lei tlun an i thawh. Sihhmuh ah an riak, a thaizing Sopum ah an riah hnu ah Thantlang an phan. Ralkap Khah Lah Yah 23 Ralbawi Seing Maung le a naule pawl an phanh he an itong. Rual Cung le Mang Biak le Kil Mang nih an zulh hna i Thantlang ah riak loin an kir than i Sopum ah an va riak tthan.

Cun Sihhmuh khuahlun ah an riak. Mizo tapung hi Sihhmuh khuathar atu Sihhmuh khua khi an rak phan ve cang. Zing lei suimilam 7 ah Mizo tapung cu an kah hna. Lungler Sakhan an lakmi Thilri le meithal an lakmi vialte an zaam tak dih. Sihhmuh in Thangzang ah tiva hor hrawn buin ralkap le palik pawl cu an phan. Thangzang in Lungler ah an hei lan. Khah Lah Yah 23 pawl nih Sakhan cu an hngah. Khan Lah Yah 42, Kalaymyo ummi nih an hun thlen hna.

A tawinak in- An i kah ni June 8,1968- Muikhum ni June 9,1968- Sihhmuh riah ni June 10,1968- Sopum riah ni, June 11,1968- Thantlang an phanh in Ralkap he Sopum ah an kir than i June 11,1968 hi an riak than. ihhmuh Khua hlun phanh ni June 12,1968 Mizo tapung he kah ni June 13,1968( Sihhmuh Dar Bu hngakchia nute a rak ihliam) Thangzang riah ni June 14,1968 Lungler phak ni June 15,1968 a si. Cu thok cun Ralkap hi an um thai.
Crd. Rev.Tial Uk, Pu Kil Mang (Palik pension mi) cinken ning in a fapa Ptr Ca Cung Bik tialmi ka hun remh chapmi a si.

Be the first to comment

Leave a Reply

Your email address will not be published.


*