CNA Ahhin Cun A Zei Tihmanh In An Um Kho Lai Lo. Na Chawva Tu Kha Khoika Ah Ka Pek Lai Ti Tu Rak I Ruat Ko

CNF/A ah luh thlu ding a har Aruang cu… CDF kuttang hmanh ah um kho loin Hakha siseh Thantlang siseh a chuak mi kan tam tuk cang. Ralkap sining le phunlelam in aa uk taktak mi CNA ahhin cun a zei tihmanh in an um kho lai lo. Na chawva tu kha khoika ah ka pek lai ti tu rak i ruat ko Meithal tlaih ruang ah Miphun dawt ram dawt a si thlu lo… a umnak hmun a dik taktak maw ti hi ruahpiak a hau ve. Credit: Salai Tluang Te

Relchap,Chin ramkulh, Matupi in Mindat lei a kal mi SAC ralkap mawṭaw cu CDF-Mindat nih Nihin May 4 zanlei suimilam 3:30 hrawng in 5:30 tiang an kah hna caah SAC ralkap 5 an thi, tiah CDF- Mindat nih cathanh an chuah. CDF- Mindat in a thi mi le hliamtuar mi um lo tein hnu an kir kho.

SAC ralkap pawl cu meng 45 aa hlatnak hmun ah tuzan an riak lai, tiah zumh a si. A luancia April 22 zong ah Matupi peng ah SAC ralkap le CDF- Matupi kar kahdohnak a rak chuak i SAC ralkap 6 an rak thi, 7 nak tlawm lo hliamhma an pu, tiah CDF-Matupi nih cathanh an rak chuah.

April 20, Mindat-Matupi lam ah SAC ralkap le CDF- Matupi kar kahdohnak a rak chuak i, cu kahdohnak ah cun SAC ralkap bu-gyi telh in 8 an thi, 5 nak tlawm lo hliamhma an rak tuar. Matupi Brigade ah eidin chanding in a kal mi SAC ralkap mawṭaw thluan cu Mindat khua in March 24 ah an rak i thawh i, Mindat ramchung ah CDF-Mindat nih an kah lengmang hna caah SAC ralkap 20 leng an rak thi cang.

Russian President Putin cu khensar(Cancer) nat a tuar ruangah thlingthlatu hotubik hnenah ṭuanvo a pe sung tiah nitlaknak lam thuthangpawlin an ngan. Russian Ralbawi Nganbik Hliamhma Fak Atuar. Russian ralkap bawi ngambik Chief of the General Staff Valery Gerasimov, cu Ukraine ralkap bomb ci nih a kee le a keng ah faktuk in an hliamh, tiah Ukraine nawlngeitu hna nih an chim i cucu media tampi nih an tial cio. Credit: Meifar Thuthang

Hi kongah Russia lei nih zeihmanh ah chim rih lo. General Staff Valery Gerasimov hi Putin nih Ukraine ral a tei khawh tilo caah Ukraine la dingin a ralkap nganbik a vun kuat i Kharkiv pengkulh chung i Russia military base nganbik an vun chiahnak Izium ah Ukraine bomb nih thalolak in an hliamhnak hi asi. Russia hi lunghrin ding an umlo, thlahnih chungah Ukraine an hnin kho ti lo i eastern leiah an i thial i cuka hmun zong ahcun zeipipa hmasawnnak ngaingai an hmu kho hleilo. US President Biden nih lei tuhi Ukraine bawmhnak caah $33 billion Congress ah a hal cuahmah i, NATO ram tampi nih hriamngam in an bawmh chin lengmang tikah Putin caah cun economic crisis he ai kemh tikah lu i muai leng khi a rian ko cang lai. Nuclear hna dah a hman ti lo ahcun ruahpiak ngam ding asi tuk ti lomi a lo ko cang.

Ukraine War: International News & Politics (Adong tiang rel khawh i zuam ve te) Russia nih a ningpi in lak a duhmi Donbas pengkulh ah Russia ralkap nih heh tiah thazaang an i chuahsek ko nain, Ukraine ralkap nih an kham khawh ngaingai hna. Cucaah Russia hi ai ruahnak nakin a hma a sawt ruam lo, tiah US defense official nih a chim. Friday i a cheukhat khuapi bomb in heh tiah an kah lio ah cun, faktuk in ai rawkmi Mariupol in mipi chanhchuah dingin UN nih broker (puaisa) an hlan. Steel plant zong a dirhmun a chiakha ngaingai cang, tiah city Mayor nih a chim.

Kan citizen khamh an herh. A ni in hngahngan awk a tha lo. Suimilam tlawmte chungah an herh, tiin Mayor Vadym Boichenko nih a chim. Kremlin cung i phihkharnak an tuahmi nih rampi a tlakchiatter tuk cang. Tu kum chung ah Russia economy hi 10% tiang a tla lai, a phichuak zeitluk a chiatkhat lai chim awk a tha rih lo, tiah Russia Central Bank nih a chim. Ukraine nichuah lei hi vanlawng le miakpi in faktuk in an kah caah thawnglatu pawl thitha in an va phan kho ti lo i, an sining a dikdiar in theih khawh a si lo. Cun, raltuknak hmunhma ah thawngpang lak tuk lo dingin Ukraine le Russia a tanhtu hriamtlaiphu nih phung an chuah.

Nihin tiang ko rih ah cun, Russia le anmah a tanhtu pawl hi thitha in an hlawh a tling kho naisai lo. Ukraine hi a rak thawntuk ve caah, Russia hi ai ruahnak nakin tampi a khual a nuar, tiah US senior defense official nih a chim. Chaklei ah a ummi Ukraine ralkap pawl vung lak an duh cang hna caah, Mariupol in Russia ralkap pawl an i thial cang. Duhning in an hlawh a tling kho lo, tiah official nih a chim. Ukraine i ral a tumi Russia ralkap pawl hi lungdongh phun in an um cang. Ralkap phu pakhat nih ai ngeih hngami thiamsannak taktak zong an i ngeih lo pinah, vanlawng lei in bomhchanhnak zong thitha in an ngei lo, tiah British Defense Ministry nih a chim.

Ukraine northeast lei i sungh lawngte a rianmi Russia units cu tharchuah than i ralram ah kuat than ding dirhmun an phan cang, tiah British Defense ministry nih a chim. Mariupol i tartahak in a ummi mipi 100,000 hrawng hi tirawl, dinti le siai tlawmte lawng an i ngeih cang. Azovstal steel plant ah a um rihmi hi Ukraine ralkap 2,000 le mipi 1,000 hrawng an si, tu asi. Hi steel plant hi Soviet chan lio ta a si i, vawleitang ah khin khur tha a um caah vanlawng in kah khawh a si theng lo. Asinain, vawleitang khur pawl chim khotu bomb ngangan cu Russia nih heh tiah a thlak hnawh hna caah, an zawnzam theih khawh a si thlu ve lo.

Mariupol a chuahtak khomi mipi nih an chim ningah Mariupol cu Hell bantuk a si ko. Asinain, kan i dornak hmun kan chuahtak hnu ko ah hin kan ram dirhmun a zualhmat khunnak kan hmuh, tiin an mayor nih a chim. Himtein khuapi chuahtak khawhnak lam sialpiak awkah Moscow le Kyiv hruaitu hna he biaruahnak kan ngeih cuahmah lio pi a si, tiah UN palai Farhan Haq nih a chim. Kan ral hna cungah tlampal te tal minunghawi zawn i ruahnak lungthin vun ngeih khawhnak lam um kho seh, ti kan i ruahchan ngaingai, tiah major nih a chim. Russia nih pehzulh in bomb a thlak peng hna ruang i cuhlan i mipi chanchuahnak rian tlolh a si mi kongah Ukraine nih a thangchiat ngaingai hna.

Mipi chanhchuahnak lam a khamtu taktak hi anmah Ukraine minung lila pei an si cu. An mipi pawl hi phaw ah hman an duh hna caah khuapi chuahtak lo dingin an kham hna hi a si, tiin Russia foreign minister Sergey Lavrov nih Saudi TV Al-Arabiya ah a chim. Donbas pengkulh ah a ummi Kramatorsk in Sloviansk khuapi pahnih tiang kahdohnak a um. Sloviansk khua cung le kiangkap khuapi pawl an cung cu meikhu in a khat. Bomb nih minung pakhat a hlemh, ti a si.

Russia nih hin Donbas le a chung ummi mipi vialte thah dih a timh hna. Pehtlai thluahmah i a kahmi kan zoh tikah hi pengkulh hi a ningpi in lawngh (empty) tuah a duh ti a fiang. Russia nih an i tinhmi an kalpi taktak ko a si ah cun, Mariupol bantukin Donbas hi lungsabo pon bantuk ah an ser te lai, tiah Zelensky nih a chim. Donbas pengkulh chungum Luhansk khua ah Ukraine ralkap nih Russia vanralkap cu ceilak in an tuk hna i, an unit dihlak ti awk in an thah hna, tiah an governor nih a chim.

“An unit lakah minung 7 lawng an him,” tiah Gov. Serhiy Haidai nih Friday ah khan a chim. An i kahdohnak a hmun a langhter lo nain, Russia ralkap nih lak an i timhmi hmunhma cu Severodonetsk a si, tiin a chim. Russia nih a thapi chuah in heh tiah an kahdoh pengmi Kharkiv khua kihriang ah mipi pawl an inn le lo tang te ah khua an sa ko rih. An vanpang cu awng viar in kuanhma an pu. Mei le tii a um ti lo caah, lengah an chuak i rawl an chuang.

Kan building pawl cu Russia nih rockets, miakpi le tank in an kan kahpiak, tiah pakhat nih a chim. “Tank pakhat cu lamnaih nawn tiang a ra i, minung kan umnak inn pawl cu a zenkuan dih umek lakin a vun kah hna. Khuazei ka kah seh, ti zong a ruat huaha lo. Khuazei a kah lai, ti zong zawndamh awk hrim a tha lo. Hi kan sang ah hin minung umnak inn, sianginn le hngakchia mucu sianginn dah lo zeidang zeihmanh a um lo,” tiah Vladislav nih a chim.

Ral a thawh hlan tiang kha cu rian kan ngei cio hna i, Russia nih an kan luhhnawh le cangka hriam kan tlai colh ve” tiah reserve caah chiahmi Ihor nih a chim. Russia ralkap pawl duhning in ka doh khawh hna lo caah ka lung a tha lo ngaingai, tiah a dang reserve Malysh nih a chim. “Hriamnaam kai lak ve ko. Asinain a zuangmi bomb pawl cu ka kutro in van tlaih i lo vurmar in cun ka hlonh kho fam hna lo cu teh,” tiah Malysh nih a lungfahnak a chim.

Russia kut chungin Ruska Lozava khuate cu Ukraine nih an lak than cang i mipi a zaza in a khamh khawh hna, tiah regional governor nih a chim. Kharkiv a chuahtakmi hna nih an chim ningah, Russia kut tangah cun rawl, dinti le mei zong thitha in a um lo, ti a si. “Basement ah kan i thup hna. Tih a nungtuk. Bomb nih kan basement zong a hninh dih. Kan kio kan rak hna, kan tap, Pathian kan au hna,” tiah Ludmila Bocharnikova nih a chim.

US marine hlun Milly Joseph Cancel, 22, cu Monday ah khan Ukraine ah ral kut in a thi i, anih hi ralkap contract a tuahtu company nih Ukraine lei ah an kuatmi a si, tiah hringtu a nu Rebecca Cabrera nih CNN ah a chim. “Hi ral hi tei kan duh zeicahtiah Ukraine nih a dohmi cungah zumhnak a ngei i, cu an doh hnawhchan cu tinco ve a duh. Asinain a tu cu a caah cun a si kho ti lo. Amah bangin kan American ralkap hi si ve hram hna hlahseh, ti kan duh,” tiah a nu nih a chim. Cancel hi kum li Marine rian a tuan, asinain nawlngai lo in a um caah thla 5 dantat ai huah, tiah Marine Corps ni a chim. Ukraine he tangti in ral a tumi ramdang ralkap lakah 3 an thi cang. Britain le Denmark zong in an thi.