Covid Mizaw nih Tuah Hrimhrim Dingmi (8)

Covid Mizaw nih Tuah Hrimhrim Dingmi (8)
———
1. Din Ei i Hnek; Midam hmanh kan ei kel ning in rawl kan ei lo tik ah kan tha a di, kan lung a mit, zei tuah hmanh kan zuam lo. Cucaah atu lio zawtnak in kan zawt chinchin ahcun ei le din kan i hnek khun awk a si. Kan pum nih zawtnak a doh khawh nakhnga kan pum thawnter hrimhrim a hau. Micheu cu kan kaa nih rawl a hlam lo tiah ei loin kan um i kan pum nih zawtnak a do kho ti lo.

Hnar zong i phih, mit zong i chinh i pum chung ah rawl lutter i zuam ding a si. Rawl kel kan ei khawh lo zong ah sup te hna, sanpioh te hna dolh a fawimi kha i hnek le ei ding a si. Mah tik ah kan pum a thawng i oxygen luhchuah zong tha ten rian a tuan kho. Cun ti tampi in din piak lengmang ding a si, ni khat ah 2-3l hrawng. Zunthlum thithlum le thikai zawtnak ngeih lo ahcun datsa zong din piak lengmang ding a si.

2. Boktakhup Ih; Boktakhup in ih nih hin kan cuap tha a thawnter caah Covid in zawt lecangka caan tam deuh cu boktakhup in um ah a tha bik. Kan celh lo tiah kanmah siarem ning paoh in um awk a si lo.

3. Thawhcangh Lo in Um; Kan tha a um lo lio a si caah thawhcangh i raltin ding a si, Zunpi zunte hmanh hi zunput i mahte kal nakin ihnak hmun i fintawl ah a tha deuh. Rawl zong hi thawhcangh lem loin mah ihnak hmun i ei ah a tha.

4.Thaw Dawp Lengmang Ding; Thaw dawp hi mah tein tuah lengmang ding a si. Dawp tik ah chuah colh lo in voi 1 voi 2 tiah rel i voi 10 a tlin tiang hrawng, mah hnu ah chuah ding si. Sau nawn dawp tikah cuap nih oxygen then cheunak caan a ngei kho i kan pum caah a tha.

5. Mitkuh Vuai Tein ih; Kan pum a thawn i zawtnak a doh khawh nakhnga mitkuh vuai ten ih piak ding a si. Hi hi si-ai thatha nak hmanh in a tha deuh. Cucaah tangka dih lo tein zawtnak tei khawhnak ah mitkuh vuai ten ih piak ding a si.

6. Sibawi he Pehtlaihnak Ngeih; Na zawt lecangka sibawi he pehtlaih khawh i zuam. Nangmah nih na pehtlaih khawh lo tal ah aan pehtlaih piak khotu minung pakhat khat i kawl. Cun nangmah ten na ningcang i cingchiah law sibawi kha theihter. Tahchunhnak oxygen tumkai, na taklinh ning, na thi tumkai ti bantuk kha sibawi theihter khawh i zuam.

7. A Hlankanh Ralrin Ding; Covid in a zawmi hi 80% cu an zual lo nain 20% cu an zual tawn. Cucaah sichunh hau dirhmun na phanh sual ah sibawi theng a si lo zong ah sichunh a thiammi i kawl cia ah tha. Oximeter, thitahnak, zunthlum tahnak ti bantuk pawl zong. Cun herh sual ah oxygen zong i ralrin cu a sualnak um lo.

8. Mah le Mah i Zohkhenh; Hi hi mizaw caah a si lo. A dammi mizaw a cawngtu caah a si. Dam le thawn lawng ah mizaw cawngh khawh le bawmhchanh khawh a si caah mitkuh vuai ten ih, eidin thami ei, le thutdir i ralring ve kha mizaw a cawngtu a dammi caah a biapi tuk hringhran. Crd. PT

Be the first to comment

Leave a Reply

Your email address will not be published.


*