CRPH I Hruai Tu Pakhat A Si Ve Mi, Ko Zaw Myat Lin Cu Ralkap Nih An Thah Ve Cang.

Yangon Shwepyithar Myone, ‘Su’ Vocational Science School (Siang-inn) Tavuankhan Ko Zaw Myat Lin cu March 8 zaan ah khan Palik le Ralkap nih tlaih dingah Siang-inn ah an kal hnawh i, Siang-inn hauka in a zuang i, zaam ai tim nain a hlawh a tling lo. Palik le Ralkap nih an tlaih khawh thiamthiam.

March 9 chun hrawng ahcun Ko Zaw Myat Lin cu a thi cang tiah Shwepyithar Palik Sakhan nih a chungkhar cu thawng an thanh hna. Thawng an thanh hna hnu ah a nupi Ma Phyu Phyu Win nih BBC ah thawngthanhnak a tuah cawlh ve.“Chun hrawngah Palik pakhat nih a rak kan chimh.

Hlawka Palik Sakhan Hmu nih Shwepyithar Palik Sakhan Hmu thawng a thanh. Cu hnu lawngah a thi tiah thawng a kan thanh ve i, kan theih. Mingaladon Ralkap Siizung ihkhun 1000 ah a ruak nan lak lai an ti. An chim ning ahcun hauka in a zuannak ah a thi mi a si tiah an chim. Asinain, a zuannak hauka hi a niamte a si ko.

A thi kho ding a si lo. A tu hi Siizung ah kan kal lio, Siizung kan phak hnu ah fiangdeuh in kan theih lai tiah” a thi mi Ko Zaw Myat Lin a nupi Ma Phyu Phyu Win nih a chim.Ko Zaw Myat Lin hi ‘Su’ Vocational Science School Siang-inn Tavuankhan riantuan a si.

Cun CRPH nih mipi hruaitu dingah Myone Tavuankhan rian zong an pek mi a si i, Shwepyithar Sandah piah mi a bawmchantu zong a si tiah theih a si. Zaan an tlaih i, zinglei ah a ruak rak la u tiah an ti mi Panbetan Myone NLD Chairman U Khin Maung Lat he an thih ning ai khat ngaingai. Ngaih a chia hringhran ko e.
Ref: BBC

Be the first to comment

Leave a Reply

Your email address will not be published.