Even. Tluang Lian; Nihin Kan Tuhmi Hi Kan Hmailei Ca Lam Kan Ser A Si!

NIHIN KAN TUHMI HI KAN HMAI LEI CA LAM KAN SER A SI (Zeitluk indah na Ram le Miphun na dawt?)
=============
Nihin kan Ram le kan Miphun cu Emergency caan chungah kan um lio a si caah, Kan luat lai maw kan nung lai?, “kan lo tlau lai maw kan thi lai?,” tiin, kan nunnak caah Faro le Izipt rai kan do i pumpak in siseh, a bubu in siseh a lam kipin siseh, cawlcangh cio a si.

Ram leng um Chinmi hna nih thawhbur leiin heh tiah, nan hun thawh hna i a khua hawihin siseh, a peng tlang hawih in siseh, Miphun caah siseh, nan hun i zuam lulmalh cio hna! Hi bantukin an cawlcanghtertu hna le an hninhtu hna hi BAWIPA a si. BAWIPA kan PATHIAN nihcun nan Thluachuah Hrai cu țhan ter chin lengmang selaw, nan Thluachuah Hrai cu liamter zungzal ko seh.

A ZA RIH LO; Ramleng, ramțha ah a um lio mi hna, BAWIPA nih chawva hmuh khawhnak hmun lawngah silo in, ramrian țuanthiam, miphun fim pipi hna pawngah an țhutter cang hna. Atu i nan um cio nak ram kha, BAWIPA nih an peekmi hna nan ram a si lo. Nan Ram taktak cu nihin i hmai nan hawih i nan chawva tlawmpal tete siangngaiin nan hun bawmh mi ram hi a si.

Miphun dang ram ah, inn le lo țhațha i zalh awkah a ba thla i cham awkah nan i ot ngam cio hna i dollars a singsing man, inn nan i cawk hna. Sihmanhselaw na Ram taktak le na Miphun taktak ca tu ahcun, dollars a sawm tete le za tete le mitlawm te nih a thong tiang lawng nan pek rih hi mu!

A tamcem a tho mi hna nih dollars thong 10 hrawng nan thawh hna! Dollars thong 10 cu, sing 150 kyats hrawng a si i Ramlengin Chinram ah inn hmun a caw i a sami hna nih sing 300, 400, 500, 600, 700, 800, 900, 1000 kyats cu nan hman tawn ko!

Pumpak inn le lo cawknak hmanhah khi bantukin kan i sian i kan i hman a si ahcun, Zeitluk indah Ram le Miphun sersiamnak caahcun kan i sian i kan i hman chinchin awk a si hnga? Ruat țhan hmanh u! Na Ram le na Miphun ca i na pekmi hi zeitluk indah a tlawm rih? Na vuncuar lawngpei na pek ko rih hi? na Ram le na Miphun nihcun na vuncuar lawng si loin, na tit hrimhrim a herh! Na Ram le na Miphun cu na dawt taktak ko. Sihmanhselaw, zeitluk indah a tlawm ti le BAWIPA hmaiah chimawk a tlak a si lo zia cu, JESUH nihcun a vuncuar lawng siloin, a Thi le a Sa bak a kan pek kha mu!!!

CAAN ȚHA BIK; Nihin ram pumpi mi thinlung a hninh i a cawlcanghtertu hna hi, BAWIPA kan PATHIAN a si i, zungzal Faro kut in luatter awkah le atu caanah Ram Thluachuak bik le Miphun Thluachuak bik i sersiam awkah khuacaan le thil umtuning a mersan i, Faro lungthin a hah ter i, a dawtmi hna thinlung sersiamnak caah rai zong a tluntertu hi BAWIPA a si.

Cucaah, atu caan, Emergency caan chungah hin, na Ram le na Miphun sersiamnak caah, nan vun le nan cuar lawng siloin, ‘nan tit’ hrimhrim pe cio dingin kan BAWIPA JESUH KHRIH MIN in kan thanh hna. Thlarau lei hruaitu Bishop Dr. CK No Chum nih, “a tit thatnak” a pek cang i, zohchunh ding a kan chiahpiak cang!

BAWIPA Hmaiah i țhumh cikcek hna usih. BAWIPA Lam hmuhsak ningin kal hna usih. Kan ram le kan miphun hi kan Ram le kan Miphun ah ser hna usih law, kan vuncuarte lawng kan pek sianmi kan ram le miphun si ti loin, kan tit le kan sa dekmak kan pek sianmi kan Ram le Miphun siter cang hna usih.

BAWIPA nih Chin Miphun caah a ka thim ko ti na hngalh ahcun, na ngeihmi dihlak zong pe ko. Na inn zong zuar chung ko, do zong cawi chung ko, nupi kan țhitah do kan cawi tawn ko. Emergency caan chung ahcun, Khrihfabu zong nih Jerusalem kulh remhnak le thlarau biakinn hmun tlanhnak a si ti ruat u law, a herh ningin cheuhra cheukhat, thawhlawm hmang ko u.

Midang nih an pek ding kha hngak hlah. Abraham thawngin, David thawngin, nangmah thawngin Miphun Thluachuak kan si kho i Miphun caah pa ah na ser kho. Kan phungthlukah, “Mi pakhat thawng, sa pakhat thawng,” an ti bang, nangmah pakhat thawngin a hmunmi teinak le luatnak kan hmu kho i BAWIPA Thluachuah hi a hmun kho! (Hi ca ka țial ahhin, mithli he ka hun țial). Credit; Lamkaltu, Tluang Lian (Martar)

Be the first to comment

Leave a Reply

Your email address will not be published.