Even. Tluang Lian; Zeiruang Ah Dah Mitha Le Bochanmi Hna An Chan A Tawi Tawn!

ZEIRUANG AHDAH MIȚHA LE BOCHANMI HNA AN CHAN A TAWI TAWN
=============
1. Vawlei ah mițha le bochanmi an chan a tawi cu vawleimi hna sual ruangah a si tawn. 2. Ramchung mițha le bochanmi hna an chan a tawi cu rammi sual ruangah a si tawn. 3. Miphun lakah mițha le bochanmi hna an chan a tawi cu miphun sual ruangah a si tawn. 4. Khuami mițha le bochanmi hna an chan a tawi cu khuami sual ruangah a si tawn.

5. Khrihfabu chung mițha le bochanmi hna an chan a tawi cu Khrihfabu sual ruangah a si tawn. 6. Chungkharah mițha le bochanmi an chan a tawi cu chungkhar sual ruangah a si tawn. 7. Mitha/miding le bochanmi JESUH KHRIH a chan a tawi cu minung sual ruangah a si.

Isaiah 57:1-2 Mițha kha an thi, Sihmanhselaw an thih cu ahohmanh nih zei ah an rel lo, a hngalh hmanh an hngal lo. Asinain an thih ah khan harnak nih fahnak a pek khawh ti hna lonak hmun ah an kal a si. Nuncan țha in a nungmi nihcun thihnak ah khan daihnak le dinhnak an hmuh.

BAWIPA PATHIAN nih Khi bantuk in mițha le bochan mi hna an chan a tawiter hna cu atangmi hna nih, zeimaw ti talin, AMAH leiah an i mer i BAWIPA an i bochan i, luatnak le khamhnak an hmuh khawhnak hnga caah a si. Nihin kan miphun lakah mițha le bochan mi hna an chan a tawi hi, a faak takmi le a ngan takmi BAWIPA kawh auhnak a si. PATHIAN hi țih hna usih, hngalh i zuam hna usih, a sinah kir hna usih. Thlacam hna usih.

Jeremiah 31:13 ” An mithi zunngaihnak cu Lunglawmhnak ah ka thlen lai, ka thin ka nemter lai i an ngaihchiatnak lonh in Lunglawmhnak ka pek hna lai. Tlangbawi hna cu hi ram thau kha ka vuaiter hna lai i ka mi hna cu ka țhatnak in an khim lai,” tiah BAWIPA nih a ti.

BAWIPA NIH A RAK CHIM MI HNA LE TU LIO BORUAK HE ZOH CHIH DING. 1. Tlangbawi hna zong a thleidang ti hna lo: Hosea 4:9 “Zapi nih dantatnak an hmuh dingmi kha tlangbawi hna cungah a tlung ve lai.” 2. Tlangbawi hna nih BAWIPA an ruat lo i an doh leh lam: Jeremiah 2:8 ” Phungbia aa tlaimi hna nih khan KEIMAH kha an ka ruat lo; Ka mi tuukhal hna nih khan KEIMAH cu an ka doh.” Hosea 4:7 “Tlangbawi nan tam chin lengmang paoh ah ka Cung i nan sualnak a tam chin lengmang ve.

3. BAWIPA kan sinah a um an ti dih: Mikah 3:11 “Khua uktu hna nih khan ziknawh ei in an uk hna. Tlangbawi hna nih khan a man hmuh awk lawngah phungbia kha an chimh hna. Profet hna nih khan tangka hmuhnak ding ca lawngah phuannak kha an chim; Cun an dihlakin BAWIPA cu kan sinah a um an ti dih.”

4. I titer men in BAWIPA sinah an kir: Jeremiah 3:10 “Hi vialte hnuah hin, Judah nih khan ka sinah lungthin taktak he si loin i titer men in a rak kir.” 5. Pumpak miaknak lawng an ruat: Ezekiel 33:31 “Ka mi hna cu, mi nih an tuah tawn cio bantukin, an ra hungmang lai i na hmaiah an țhu lai. Chimh awk na ngeihmi hna bia cu an theih lai, Sihmanhselaw an tuah lai lo. ‘Bia țha an si,’ an ti lai, sihmanhselaw an lung cu mah pumpak miaknak cio lawngah khan fek tein an bunh cang.”

6. BAWIPA nih a huat hna: Ezekiel 34:2 “Anmah zawn lawng aa ruatmi tuukhal hna hi ka hei hua hna dah!” 7. BAWIPA Lung a faak: Ezekiel 6:9 “Siasal duhah a pingah an kal ruangah, zeitluk in dah ka lungthin a fah kha an hngalh lai.” 8. BAWIPA a awlok a chawng: Ezekiel 16:43 “Na tuahmi thil vialte hin awlokchong in na ka tuah caah Kei Zong nih na tuahmi thil ruangah na cungah teirul chamnak kha ka tlunter ve.”

9. BAWIPA nih a huat hna: Hosea 9:10 “An duhmi an siasal ka huat tluk khan anmah cu ka huat hna.” 10. BAWIPA nih a fih: Amos 6:8 “Jakob a ruamkainak cu ka fih hna. 11. BAWIPA a hrum ruangmang: Amos 2:13 “Leng cu thil khat tein an chonh tikah a awnh cuahmah bantukin Kei Zong, nan ka neh tuk caah ka hrum ve. 12. A ngaichihmi a chin chiah hna: Ezekiel 9:4 “Thil fihnung an tuahmi ruang i a țapmi hna le a ngaih a chiami hna kha an cal ah hmelchunhnak va khenh hna.”

JOSEP LE DAVID BANTUKIN CHINMI KAN THLUACHUAK LAI. 2000 kumthar zanah, BAWIPA Biathli chimh ka si i, cu Biathli cu, ” Nan KHAMHTU a țum cang! nan KHAMHTU a țum cang! MESSIAH cu!” tiin. Ka fianmi cu, Khrihfabu lawr le Second Comming caah a rat a si lo, Chin miphun luatter dingah, BAWIPA kan PATHIAN nih khuakhannak țha a ngei ko ti hi a si. Israel mi hna Izipt sal kum 400 renglo an tan cang tikah, Moses sinah ka mi hna khamh awkah, Exo 3:8 “Ka rung țum cang,” a ti mi bantuk a si kha ka hngalh.

Sihmanhselaw kan miphun cungah zeipipa luatnak a um hlei lo tikah ka hei philh diam ko cang! Sihmanhselaw, a kum 12nak, 2012 kum, Sihhmuh khua-in Thantlang lei kan tlunpah lampi ah, THIANG THLARAU nih ka philh cangmi Biathli hrilhfiah cu a hun ka chimh nolh țhan! “Josep le David bantukin Thluachuah kan pek hna lai,” ti le an ca i BAWIPA khua khaan an hmuh ning kum caan hna zong a ka hngalhter hna!

JOSEP LE DAVID THLUACHUAH AN HMUH NING; Josep nih mang a manhin kum 13 ah cawisan a hung si i, Mang a manhin kum 20 hnuah a Mangmanh mi kha tlin a hun i thok! David cu Samuel nih chiti a toihah kum 17 a si ( Hihi Bible ah a um lo, a țuanbia tialnak ah a um). David Chiti an toihnak in kum 13 ah, David cu Juda phun siangpahrang a hung si! Chitithuh a si kum 20nak ah Israel siangpahrang a hung si.

Josep le David ah kan hmuh mi cu BAWIPA PATHIAN nih an ca i a tinhpiakmi hna an sin i a phuannak in kum 13 le kum 20 hi biapi ngaimi cu an si. Biathli ka sin i chim a si hnu, Kum 13nak, 2013 kum ah kan miphun cungah zeibantuk remnak dah a hawng um kha! Mizeidah 13nak ah Josep le David bantukin luatnak a hmu hna kha! Blak lists tampi kan ram ah an hung kir kho hna kha!

2020 i thimnak a um tikah a thimmi hna Party le minung ka zoh hna i zeipi aa hlei tuk ding ka hmuh lo tikah, ” BAWIPA nih a ka chimhmi cu zeitindah si ne lai?” tiah kaa hal in ka ruat ngai manh. Sihmanhselaw 2021 February kan hung phan i, BAWIPA khuakhan a tlin khawhnak hnga thil a hun i mersan thliahmah!

A ngaingai ahcun Palewa peng kan ramri AA nih an kan det ahkhan BAWIPA khuakhan cu a rak i thok ko cang! Kha hnu khan, 2013 kum i luatnak a hmumi hna cu karh hram an hun i thok i kum 20 hnu 2021 ahcun, Khuaruahhar in BAWIPA nih a hote dah a umpi hna ti kha anmah hmanh Khuaruahhar tiangin an hung karh ko cu teh!

DAVID CU A NGAN CHIN LENGMANG LAI; 1 chan 11:9 “David cu, Ralkapbu BAWIPA kha a sinah a um caah, a ngan chin leng mang,” a ti bantuk hin, David bantukin Chin Miphun hruaitu, luattertu ding caah BAWIPA nih a timh hna i a thim cangmi hna kha an Țhawng chin leng mang ko lai. David, Joshua 10 khan na zumhnak rak i țhawnter law, rak i tlaih peng.

Cun, 2 Samuel 3:1 “Saul inchungkhar le David innchungkhar karlakah khan i dohnak saupi a um. David cu a Țhawng chin lengmang i Sihmanhselaw Saul innchungkhar cu an der chin lengmang,” a ti bantuk in, BAWIPA nih a umpimi David innchungkhar lei ah maw na țan lai, BAWIPA nih a hlawt i a kaltaak cangmi Saul innchungkhar lei ahdah na țan awk a si lai?

RAM LENG AH JOSEP, RAMCHUNG AH DAVID; Chinmi cu ramleng le ramchungah tiin kan um hna! Josep cu ramleng ah Thluachuah pek a si i David cu ramchung ah Thluachuah pek a si ve. U le nau hna, Kan Miphun ca i BAWIPA kan PATHIAN i a kan timhpiak ning hi amakin, Khuaruahhar lei khi a si ko. Cucaah nihin ah aman kan pekmi le nunnak a kan halmi zong hi a hlei khun ve ko! Cucaah nan lungțhumin, BAWIPA JESUH KHRIH he rem i zuam cio ko u.

JOSEP LE DAVID CU BAWIPA MI AN SI; Khah! Miphun hawi hna, Josep le David cu BAWIPA a hngal i ațih bakmi, dawtnak le tlukruannak a duh bakmi PATHIAN Mi an si. Cucaah BAWIPA na hngalh i ațihtu na si a herh hrimhrim lai. Cu lo ahcun Thluachuah co loin na vaivuan sual ve ko hnga! Josep le David nih an ei hmuar i zu an ri ti zong kan thei lo i anmah chungkhar zawn lawng an i ruat fawn lo.

ATU KAN CAAN HI; BAWIPA nih kan Miphun Thluachuah a kan pek ning ding zeimawzat ka hun langhter cang. Ka langhtermi hi cu a tlangpi lawng a si i zeitluk tiangin dah kan Miphun le pumpak nih luatnak kan hmuh lai i Thluachuah kan co lai ti cu kan mah Lungput ning zong in tampi a kal te lai.

Atu kan caan hi inn le lo hmanh zuar riangmang in, ngeihmi dihlak hmanh pekin, docawi tiang hmanh zongin kan ram le Miphun caah pek a phu i, nunnak le thazaang dihlak chuah caan a si. Vawleicung Miphun vialte lakah kanmah Miphun tlukin atu lio caanah BAWIPA nih a ruahpiakmi, Miphun hi an um lai lo! Hi bantuk caan hna i na to ko, na țhut ko, na zoh ko ahcun, chiatserhmi na si caah a si ko lai.

EMERGENCY CAAN LE PATHIAN SIN PEKMI CHAW LE CHEU HRA CHEUKHAT HNA; David le a mi hna cu Saul țih i an zaam tikah, an caah Emergency caan a hung si. Ei awk ngei lo in an paw a hung țam tikah, tlangbawi lawng nih ei khawhmi changreu kha an nunnak i khamhnak caah an rak ei. Cukong ahcun Cheuhra cheukhat le PATHIAN sin pekmi kongah a ngeitu BAWIPA JESUH nih sual a phaw hna lo i thiam a coh lehlam hna!

JESUH nih cun, ” David le a hawile kha an rawl a țam tikah zeidah David nih a rak tuah; ti kha nan rel bal lo maw? PATHIAN inn chungah pei a lut i PATHIAN hunhmi changreu kha a lak i a ei i a hawi le zong a pek ve hna kha. Khati a tuahmi kha kan phung he aa ralchanhmi a si țung, Zeicahtiah cu changreu cu tlangbawi lawnglawng nih pei ei phung a si kha,” tiah a ti hna ( Luka 6:5 ). BAWI JESUH nih, “Cathiang nih, ‘ ka duhmi cu sa in tuahmi thawinak si loin, Zaangfahnak a si’ tiah a timi kha a sullam rak hngal u law cu, a sual lomi kha sual nan phaw hna hnga lo,” a ti ( Mt 12:7 ).

BAWIPA PATHIAN nihcun, nihin kan Miphun hi Emergency caan ah kan um lio a si le kan si a fah le kan nunkhawchuah khawhnak ding caah chawva kan țaam tuk ti a kan hmuh ko.Cucaah PATHIAN kan pekmi chaw hna le cheuhra cheukhat hna hi Bank i kan i khon ko nak hin cun, David bantukin ralțha tein kan ei ngam ding a si ko. BAWIPA nih na palh a kan ti lo ding cu Matthai. 12:3 le Luka 6:5 ah kan hmuh ko cang. Sihmanhselaw Emergency caan lio le kan țaamfah tuk caan lawngah hmanh ding a si hnga.

THAZAANG PEKNAK; Cucaah, Josep, David na ral hi țih hlah. Joshua dal 10 hi na caah hmelchunhnak a si lai. BAWIPA na sin ah a um kha hngal peng law, asinah thlacam tuah. Josep nih zeitin aa tangdor le a in khawh le a lungsau kha philh hlah. Nu a hrial zong philh hlah. David nih zeitin ral a tei kha philh hlah law nu i a tluk zong kha philh hlah.

Hruaitu cemcem, Moses hmanh kanaan phan kho loin a um kha philh sual hna hlah usih law, BAWIPA kan sinah a um caah, Jordan kan tan lai i Nefilim mingan pipi kan tei hna lai i Jeriko kulh zong, BAWIPA Țhawnnak nih a kan chimh piak dih ko lai. Cun, BAWIPA timhpiakmi kan kanaan ram cu kan “KHAMHTU MESSIAH” thawngin kan co khawh lai. Chin ram le Chin Miphun hi Khuachia le Faro kut in luatter awkah, Kan KHAMHTU MESSIAH nih zeidah a tuah lio le a tuah rih lai? Zeidah aan rinh ve i an hal ve zong kha ruat ulaw hngalh thiam i tim tuah u. BAWIPA JESUH Vel nan cungah um ko seh. Lamkaltu, Tluang Lian ( Martar)

Be the first to comment

Leave a Reply

Your email address will not be published.


*