Gangaw lam ah Khualtlawng Motor Kah a Tong, Mi Kong Update

August 12 Chin ralkap CNA, CDF le SAC ralhrang karlak kahdohnak ah mipi chung in motor he khual a tlawng mi Mai Siang Hnem Cer le pa pahnih hna cu ralhrang nih an kah hna i Mai Siang Hnem Cer cu a nunnak a liam tiah kan theih.

Ral ram ah a ummi pakhat nih, Tuzing kha Hakha hrambunh 266 ralhrang he kahdohnak a chuak. Kahdohnak a vun daih hnu ah Pajero Motor he khual a tlawng mi nu pakhat le pa pahnih an motor cu ralhrang nih an kah hna. Hi an kah hna nak ah motor chung um khuami nu pakhat cu a nunnak a liam, tiah CCN ah a chim.

Nithaizing kahdohnak ah ralhrang lei in minung pakhat a thi i hliam a tuar mi bel an tam. Mipi ralkap lei an him dih tiah kan theih. Cun, mipi an kah mi chung in a nunnak a liam mi hi Mai Siang Hnem Cer a si i amah hi kum 27 a si. Amah he aa cit ti mi pa pahnih hna cu an him tiah an riak tial hma sa ahnu ah an atanglei bantuk in The Chin Journal nih an rak update than.

Nihin August 12, zinglei sml. 8:00 hrawng ah Hakha-Gangaw lam ah khualtlawng motor (Pajero) meithal in kah a ton caah nutung no pakhat a nunnak a liam, tiah ruak a bultawltu Hakha biaknak lei upa hna sin in thawngpang kan theih.

Nihin zinglei suimilam pariat hrawng ah khan hi thil hi a cang. Hakha-Gangaw lam mengtung 4 zawn hrawng khan a si. Annih hi hmai bik ah a kalmi motor an si. Meithal kah thawng an theih in an dir i an kun dih hna. Fa pakhat a ngeimi Pi Siang Hnem Cer hi meithal kuan nih a khen caah a nunnak a liam, tiah ttuanvo ngeitu upa pakhat nih The Chin Journal ah a chim.

Pi Siang Hnem Cer (kum 22) hi fa pakhat a ngeimi nutung no a si i, Falam peng Ral-lang khuami a si. Meithal kuan nih a lu ah a khen i a hmun ah a nunnak a liam colh.

Anih hi a lu ah meithal kuan nih a khen i a hmun ah a nunnak a liam. Cun, a dang pa pakhat Kap Tin Hre hi a phei ah an khen i a hma a fak ngai. Cun, Pi Siang Hnem Cer i a vapa Paul Lian hi a liang ah hliamhma fak lo a pu ve, tiah a cunglei upa nih a chim chap.

Meithal puah thawng a than lecangka in khualtlawng pawl an kum dih hna i, khoika lei in a rami meithal kuan nih a khen hna timi zong an fiang kho lo. Pi Siang Hnem Cer a rauk cu Falam peng an khua lei ah an tlunpi, tiah thawngpang kan theih.