Good news; Min Aung Hliang ralkap hna karlak ah lungrual lonak le kahdohnak a chuah ve cang

Min Aung Hliang ralkap hna karlak ah lungrual lonak le kahdohnak a chuah ve cang
=================

Ragoon-Naypyidaw Highway, mengtung 146, furlong 7, Taungngu lei luhnak check-gate ah Sept 21, zan suimilam 10 hrawngah gate hngaktu ralhrang pakhat le a cung bawi cu bia an i el i gate hngaktu ralhrang nih a cung ralbawi pa cu meithal in a kah i a zam tiah theih a si.

Cuka i a um vemi khuami pakhat nih “An chimning ahcun ralbawi pa kha fak ngai in hliam a si ko nain a thi lo. A fiang tukmi cu ralhrangbu chungah buainak a um cang ti hi a si” tiah a chim. Ralbawipa a kap i meithal he a zaammi ralhrang cu ralhrangbu nih biatak tein an kawl cuahmah. A kiangkap khua vialte cu minung an i then i an kawl viar nain an hmu lo tiah theih a si.

Hriamnam Tha Bik CDM (Capar)! Tutan i mipi nih Civil Disobedience Movement (CDM) an tuahmi hi hramhrma in nawlngeihnak a lami ralkap cozah thlak khawhnak dingah hriamnam tha bik a si. Salai Lai Ram Thang nih cun “CDM cu cozah a thahripi chah bantuk khi a si ko” tiah a chim. CDM hi ramdang zongah an hman lengmangmi a si. Tahchunnak ah Tunisia (2011) le Sudan (2018)!

88 lio CDM: Kum 1988 i ralkap nih nawlngeihnak an lak lioah cozah riantuan hna nih CDM hi an rak tuah. Hmual a rak ngei taktak. Asinain thongtla tampi an rak chuah i hna i cu hna nih cun CDM pelzulh kho lo dingin an rak tuaitam hna. Cucaah 88 lio CDM a hlawhtling lo.
Lungsau a hau: CDM hi a tha tuk nain lungsau lo ahcun theipar chuah hlanah ngol than a fawite! CDM ruangah rian in chuah le harnak dangdang tampi ton khawh a si, a tongmi cu an um len cang. Harnak ton pah cuahmah bu zongin lungsau tein CDM hi pehzulh khawh i zuam a hau.

I bawmh cio a biapi: CDM ruangah harnak a tongmi, rian in chuahmi hna kha ramchung ramleng in bawmh le dirkamh a hau. Nan thachia hlah u, tiin a langhlat in forh le thazaang pek lawng a za lo. Harnak an ton taktak tikah i zuanhnawh le i bawmh cio a biapi tuk. Kachin ramkulh, Phakanh khuapi i peng uknak zung (Myone GAD) riantuantu minung 10 hna zong an rian in an chuah cang hna. Laimi nih rian in chuah hi kan ton te lai, a tong cangmi zong an um kho! Hi bantuk a tongmi an um ahcun i zuanhnawh cio a herh.

Cun minung pakhat maw, pahnih maw an chuah hna ahcun tuanti hawi dang le zung dang i a tuanmi hna zong nih nan chuah hna ahcun kannih zong kan chuak ve i ngam usihlaw CDM hi hmual a ngei chinchin hnga! A thahripi chah cangmi Pawpi cu duhsah in a thi ko lai, a suttung khiah cangmi innpi cu a rauh hlanah a pur/tlu ko lai. A riantuan piak ti lomi cozah cu a duh lo bu tein a rawk/thi ko lai. Ralkap cozah an tlak i a dikmi Democracy kan hmuh hlan tiang! Crd; The Chin Post

Be the first to comment

Leave a Reply

Your email address will not be published.


*