Hakha CDF Le Ralhrang Kahdohnak Asang Chin Ahnu Bik Update.

Hakha-Gangaw Lam Ral Sining a Linsa, Khua 6 an Zaam;  March 17 thawk in SAC ralhrang pawl cu Gangaw lam lei ah an kal i nihin March 26 tiang ah Hakha-Gangaw lamkam i a ummi khua 6 nih an khua an chuahtak, tiah thawngpang kan theih. March 17 ah Hakha he meng 6 a hlatnak Nipi ah SAC ralhrang an phan i khuami 200 hrawng an zaam dih.

March 21 ah Zokhua pawng ah kahdohnak a chuak i Zokhua mi 800 hrawng an zaam hna. March 22 ah ralhrang pawl Zokhua ah an lut i zaan khat an riak. Zokhua upa pakhat nih, Kan khua hi milu 800 hrawng kan si i kan zaam dih ti awk a si ko. A zaam lomi Khuathar ah inn 5 hrawng le Khuahlun ah inn 20 hrawng lawng an taang, tiah The Chin Journal ah a chim.

SAC ralhrang pawl cu Zokhua in Tinam lei ah an lan tthan i, Ruavan, Malsawm, Hrawngvun le Tinam khuami cheukhat zong an zaam hna. Acheu hi Hakha lei panh in an zaam hna i acheu cu ramlak ah an zaam ve hna, tiah a cunglei upa nih a chim.

Hakha in SAC ralhrang 150 hrawng an kal i, Gangaw lei zong nih ralhrang 250 hrawng an rak kai i CDF,CNA karlak ceh in kah an timh hna, tiah miphun ralkap he naihniam cheukhat nih online ah an ttial.  Credit; The Chin Journal