Hakhalay ah PDF le SAC Ralhrang an i Kap, Fa 2 Ngei Patung Pakhat a Tlau!

Hakhalay ah PDF le SAC Ralhrang an i Kap, Fa 2 Ngei Patung Pakhat a Tlau
——–
Kalaymyo peng le Chin ramkulh ramri ah a ummi Hakhalay khua ah nihin zaanlei sml. 4:00 in SAC ralhrang le PDF karlak kahdohnak a chuak, tiah thawng kan theih. Nihin ah SAC ralhrang pawl nih Natchaung ah meithal 3 le Panmuanchawng ah meithal pakhat an lakpiak hna hnu ah kahdohnak a chuah hi a si.

Hakhalay khua pawng i Panmuanchawng tiva kiangkap ah zaalei sml. 4:00 in kahdohnak a chuak i minute 30 hrawng a rau. SAC ralhrang pawl an zaam caah kahdohnak a dai tthan. Kahdohnak a chuah lio ah Lo in a rak tlungmi fa 2 ngei Pu Sum Lian Thawng hi atu tiang khua a hlam ti lo.

Khuami nih an Leikuang lei zong ah an vung kawl nain an lawng in an rak kir. Pu Sum Lian Thawng Lothlaam ral ah a ummi hna nih, “A tlun lei kha ralkap an hun lio he bak aa tong. Meithal thawng a thang i kan bok dih hna. Kan zoh tthan tik ah cun kan hmu ti lo. An tlaih caah a si kho men,” tiah an ruahnak an chim.

Hakhalay Believer Khrihfabu biakinn meithal kuan nih a khen pin ah khuahriang inn pakhat pawng zong ah RPG Rocket bomb a tla. Hakhalay kiangkap ah cun kahdohnak a dai cang i, Natchaung lei tu ah zaan sml. 8:00 tiang an i kap, tiah khuami nih an chim.

Kap hnih kahdohnak ah hliampu le mithi an um le um lo fiang in theih a si rih lo nain Pu Sum Lian Thawng cu atu ca kan ttial tiang ah an hmu rih lo. Credit: The Chin Journal

Be the first to comment

Leave a Reply

Your email address will not be published.


*