Hi Ban Tuk Thawng Theih Hi Cu Poi Tuk E Chungkhar Pa Cem Cu Chungkhar Zawn Ruah Ah Ti In

Mizoram, kawnpui Bangla Veng ah Thih naak an tong. Kawnpui bangla Veng ah khuasa mi Pu Lalduhkima cu thing ah i an riah naak ah an thing ah ding mi thing tum lian pi nih a denh caah a hmun ah a nunnaak a liam tiah thawng theih a si. Hi ti bangla veng i thihnaak an ton naak kong he pehtlaiin Branch YMA president Pu F.Vanlalhruaia nihcun hi tihin a chim.

Nizaan cacawn ningani chuun suimilam 10:30AM hrawngah khan thil hi a cang mi a si i, Pu Lalduhkima le a hawipa hi thing at dingin an kal i an thing ah ding hi feet 12 in an tan i an thing ah dingmi hi a lian ngai mi a si i minung pakhat lawng nih cun tthial kaam khawh phun a si lo.

Cu ti an thing ah ding mi hri hrual in ttheng cungah an hlaan hnu i a um daang a fek cang ruah tiah an ruah hnu ah hin ruahlo piin thing tum hi a pelh i thing tum nih hin Pu lalduhkima hi a tlaak hnawh caah a ke ah a danh hma sa i cu hnu ah thing tum nih cun pu lalduhkkima hi a keng ah a va nenh.

A hawipa nih hin a thazaang dihlak chuah in thingtum hi tthial kaam ai zuam nain a mah lawng nih cun zeiti hmanh in a thawn khawhlo caah a rian ran naak in khua ah a va kal i mipi a va chimh hna i a rianran naak in anva kal cawlh nain pu Lalduhkima hi a nunnaak a rak dih cang tiah a chim. taantaak mi chungkhar Bawipa nih hnem ko hna seh.

Thawngdang relchap, Tangka Le Chungkhat Ngeihlo Ruangah Sikhan Te Hmanh A Kal Kholo Mi Malaysia Khuasa Myanmar Nu Inn Ah A Nunnak A Liam. Malaysia ram Port Klang khua ah hlawhfa in khua a sa mi Myanmar rammi nu cu an inn hlannak chungah a nunnak a liam. Hi Myanmar nu hi Daw Nwe Yi timi kum 52 minung a si.

Daw Nwe Yi hi zunthlum zawtnak in sau nawn a zaw cang mi a si i rian a ttuan khawhlo nak zong a sau ngaingai cang. Amah hi sikhan i piahnak tangka zong a ngeihlo pinah chungkhar naihniam Malaysia i a ngeih hnalo caah a celh na loin a zawtnak cu inn te ah a rak i in.

Cubantuk a zawtnak in cun nihnin June 2 ah a nunnak a liam hi a si. An um ttimi a hawile nih a ruak kongkau ah chiattthat zohkhenhnak phu bawmh an hal hna i cu hna phu nihcun a ruak cu an va vui. Daw Nwe Yi hi Rakhine ramkulh Yanbae peng May Pone khuami a si tiah theih a si. Credit:LH

Sakhaan lak kahdohnak ah SAC ralkap 10 an thi, 4 a nung in an tlaih hna, 2 nih bom an i lamh. KNU battalion 6 a ummnak Dupala pengkomh ah mipi hriamtlai phufonh hna kahdohnak an tuah hnu 2021 December 15 Laykaykaw kahdohnak thok in May 31 tiangah SAC ralkap sakhaan 3 le hriam tampi chuh khawh an si tiah NUG nih a thanh. Thaebawbo sakhaan a la khotu KNU/ KNLA, KNDO, PDF le a dang hawikomh phu hna sinah NUG Ministry of Defense nih a kuatmi ah atu bantuk in langhter a si.

Phufonh hna hi kahdohnak chungah a luancia May 18 ah ral nih kum 30 hrawng an rak lakmi Thaebawbo sakhaan cu an lak khawh lawng si loin hriam phun 15, kuan phun 7,000 leng fim khawh a si. Sakhaan lak kahdohnak ah SAC ralkap 10 an thi, 4 a nung in an tlaih hna, 2 nih bom an i lamh i hriamngan he hme he tampi fim khawh a si khawh tiah KNLA nih a chim.

SAC ralkap nih vanlawng in kah a rak bawmh hna caah KNLA lei in hriamtlai 2 an nunnak a liam i 4 an i hliam tiah a thanh. Myanmar ram ah hramhram in uknak lak a si hi kum khat leng a rau cang i cu chungah ramkhel lei buainak he Sipuazi, Zatlang nun, Ngandamnak lei a lamkip in a ṭum chuk i SAC ralkap le mipi hriamtlai karlak ah kahdohnak a fak fawn.

Hramhram in uknak lak a si hnu kum khat leng caan chungah SAC ralkap 14,890 an thi i hliamhma a tuarmi 4,814 an si tiah NUG Ministry of Defense nih a thanh. Atu bantuk in langhtermi cazin hi 2021 June 1 in 2022 May 17 tiang lak khawhmi a si i a taktak ah a thimi an tam deuh lai tiah a langhter. the Chinland Post

Rel chap –  Kum 2 timi Zuamcawhnak (Kawl zumh ning) Ne Win Lucky No. 9 a si i Than Shwe Lucky Number cu 11. Kawl ralkap nih a tlang piin a tu in kum 2 ah thimnak ka tuah lai a ti. Thimnak tuah khawhnak ding caah Electoral system thimnak phung zong remh a timtuah cuahmah. NUG zong nih Bond a zuar i kumhnih ca long in a zuar. Kumhnih ahcun atu lio dohnak hi kan tei lai an ti ti khawh a si.

A caan a thawk ka long a si rih. A tlai tuk ti a um bak lo hih unau. Atu nai te long ah an zuar caah. NUG nih a thawkka long a si tinak a si. Kawl zumh ning. Kawl miphun hi nika thlapa arfi (astrology) le number (numerology) a zum ngaimi miphun an si. Atu tiang an zumh rih. Kawl hruaitu poh nih hmailei kong a chimtu (soothsayers) hna le thil a cang khomi tiah ruahmi thin damternak kha bia an ruah an kawl ton hna. Myanmar ram zalonnak zong arfi nika thlapa zohthiam hna nih.

January 4, 1948, zingka suimilam 4 le minute 20 ah nan kan pek ah a tha lai an rak ti hna. A voikhatnak PM U Nu zong nih 1961 kum ah thetseh kawl biaknak pagoas 60000 a rak ser. Daihan a um khawhnak caah. Number pakua 9 zoh chih in a tu bantuk in pagodas tampi a rak saknak a si an ti. Ne Win zong astrologers le numerologiests hna kha 1962 uknak a lak hnu ah ruahnak a rak hal ton lengmang ve hna.

Cucaah 1970 kum ah kawlram kha fak piin thlennak a rak tuah. Kawlram hi kehlei ah a kal tuk. Orhlei ah kal a hau ti a rak si. 1987 kum ah myanmar kyat 45 le 90 zong a rak chuah. Lucky Number a rak ti. Atu tiang a thi kho rih lomi Than Shwe zong a u le nawl a rak cawn lengmang ve. Naypyitaw khuapi na ser a hau an rak ti. A rak ser. 2005 bak ah na ser a hau an ti ning in a rak ser.

Astrologers ruahnak pek ning tein a sermi a si. Ne Win Lucky number cu 9 a si i Than Shwe lucky Number cu 11 a si. Kan nih Zumtu Khrihfami kan caah cun ni vialte hi nisunglawi an si dih. Cu ni a thiang deuh, cu ni a thur eh, cu ni long ah ti bantuk cu Kawl zumhnak nih kan thluak a kan tawl pah cangmi sidawh kan si ko rua. Cu vial. General Aung San hi a thluak kal ning hrimhrim hi a rak i dang ko rua.

Tlangcung mi le kawlrawn mi minsak he aa lo lem lo. A ruang cu theih a si ve lo. Zeitindah a si? Amah a min Aungsan kha min hmai ah a sak a benh hmasa lehlam dih hna. Tahchunhnak – Aung San Oo, Aungsan Suu Kyi tbt . Midang thluak le min pek he i lo sehlaw Suu Kyi Aungsan ti a si hnga cu mu… hehe.

Tlangcung le Kawlran poh cu hringtu an pa le an min kha a hnu bik ah an chiah dih. – Tahchunhnak – Hringtu pa kha Khauh Khauh sisehlaw fanu siseh fapa siseh – min ah Ms Liang Liang Khauh Khauh ti phun in an i sak dih. Aung San hi a fa le min umtu ning zoh ah phundang pi bak a si hrimhrim ko. Crd – Thawng Za Pum