Hi Ban Tuk Thawng Theih Hi Cu Thinlung Nih A Celh Kho Hrim Loh E Kan Pasaltha 3 An Nunnak A Liam Than

Anmah he hmunkhat ah ram vaih in a kirti mi hna cu hmai ah an kalchung caah an luat, Lai meithal he an si caah CDF in an ruah hna i tlaih an ton hi a si, inn an phanhlo caah hlathlainak tuah hnu lawng ah an nunnak a liam cang tiah theih an si. An pahnih in CDF chungtel tiin ruah an si caah SAC ralkal nih an thah hna tiah a chim.

Khuachung mi pahnih thah an tonnak kong he pehtlai in SAC ralkal lei media nih cun cu khuami pahnih hna cu CDF chungtel an si tiah an tial.SAC ralkap kut in nunnak a liammi hna he neihniam in a ummi hna nihcun anmah cu mi sawhsawh an si, ramvaih in a paw ai cawm mi an si tiah an chim. Nunnak liammi Salai Pawng Za Mawng cu kum 29 a si i, Salai Pawng Sun Thang cu kum 21 a si.

Cazin kan lak khawh ning ah SAC ralkap nih hramhram uknak an lak hnu ah SAC ralkap kut in Chin ramkulh chungah nunnak liam mi 200 tluk hrawng an si cang, cu chung in minung 6 cu Tedim khuami an si tiah RFA nih an tial.

Thawngdang, Sagaing ramtthen , Yinmapin peng Mukawng khuachung phungki sianginn ah umhmun khuarmi SAC ralkap 100 hrawng cu tualchung hriamtlai phu hna nih May 23 zinglei ah hramngan le hriamhme he an kahdoh hna i SAC ralkap lei ralbawi pakhat telh in 4 an thi tiah theih a si.

SAC ralkap nih umhmun an khuarnak hmunhma cu tualchung hriamtlai phu hna le Yinmapin peng hriamtlai phu, Monywa pengkomh battalion 2 hriamtlai phufonh hna nih bomb ah puahhnawh in an kahdoh hna caah SAC ralkap lei 4 an thih leng ah hliamhma tuarmi zong an tam tiah theih a si.

Bomb puahhnawh in kahdoh a tongmi SAC ralkap hna nih kahdoh an ton hnu ah Mukawng khuachung mipi umnak inn 20 leng cu an khangh hnu ah, umhmun an khuarnak phungki sianginn in an zaam tiah tualchung hriamtlai phu nih an thanh.

Yesakyo Peng Sinchawng Pawng Kahdohnak Ah SAC Ralkap 3 An Thi, Magway ramtthen, Yesakyo peng Sinchawng ti khamnak pawng ah May 23 ah kahdohnak a chuak i, cu kahdohnak ah cun SAC ralkap lei 3 an thi tiah tualchung hriamtlai phu Young Force-UG nih an thanh.

May 23, zinglei suimilam 11:00 hrawngah thazaang 60 hrawng he rallam a sialtu SAC ralkal hna cu Sinchawng ti khamnak pawngah tualchung hriamtlai phu hna nih an kahdoh hna.

Hriamngan le hriamhme hmang in kaphnihkar kahdohnak a chuak i cu kahdohnak ah cun SAC ralkap 3 an thi, hliamhma tuarmi zong an um, Kaphnihkar kahdohnak ah tualchung hriamtlai phu lei hliamhma tuarnak umlo in hnu an tolhkho tiah theihternak an tuah.