Hi Dohthlennak Ah Hin Ralbawi Pakhat Nih Chim Mi Cu Mipi Zong Nih Kan

Hi kong lam hi Zeitik ah dah a chim telai kan ti lengmang mi nizaan nai ah M.A.H nih tlangcung hriamtlai ai-awhtu minung pannih cio ra ulaw, keimah pumpak he kan itong lai tiah a chim taktak ko cang. Hihi thilthar a si lem loh. Kawl ralkap formula hlun pi a si. Kum 70 chung a hman mi formula. Hriamtlai phu lakah cungcuang phu pawl ahohmanh nih theihcia pi an ti diam ko khah.

M.A.H chim duh mi cu ka der cang hih, 50=50 kan si cang. Cu ca ah daihnak ser usihlaw remdaihnak lamthluan in in tei nolh hna ning ti khi a si ko. KNU nih petko in an leh. Ralkap kha ramkhel ah ai tel lo ding in bia an i kam khawh lawng ah bia kan i ruah lai ti a si. KIO/A nih cun a leh hmanh an huam theng lailo.

Atu cu ralhrang le mipi hriamtlai hi thazaang ah 50=50 kan si cang. A fiang mi cu ralhrang a pur ruangmang deng cang. Zei hmanh lo thalpak sawhsawh le kutro in i zuamnak nih mipi cu kumkhat ah 50 tiang kan kal kho. A dang 50 aa duh rih. A dang 50 cu kumkhat chung ah kan ngah kho lai maw tiah cun kan lungṭhawnnak le kan teirialnak cung ah aa hngat lai tiah a chim chap.

2022 chung ah a tu 50 hin a dang 30-40 kan kal khawh ahcun kan ṭhawng taktak lai. Lamzawhnak, CDM, hriamtlaihnak in nihin tiang mipi kan har taktak bu ah tei kan rialnak nih 50 a kan phakter khawh. Hi 50 ahhin i rawksawn sual hlah usih. Hi 50 lam canceo a si i a biapi taktak mi dirhmun a si.

Mizapi nih kan ruah ding mi cu dohthlennak ah thadorh lo a si. Dohthlennak a ṭhawn nakhnga tharengh caan a si. Kan khuasak tintuk bu hin ral kong le mipi ralkap ṭhawnnak hi kan ruah chin lengmang a hau ko.

Khuallam canceo ah cun kan i din tawn. Kan thlanti kan daihter i tikik te kan ding. Thlihir te kan dong. Kan cak maw kan fum, ni kan khuallam kan cuan ṭheo. Kan thi kih hlan ah kan pehṭhan. Thlandai hlan ah kan i thawh i khuallam kan peh tawn. Nerlawbok kan thil zong dinh caan ahcun kan liang thleng in hehmaw tiah kan i hne ṭhan. Cucu a tu lio te hi a si.

Kei hi Kawl ralkap kong hlathlai cu ka huam ngai. Ralhrang nih kum 70 chung ai ser mi instituition le hruainak hi umkal pah ah ka rel ṭheo. A bik in kanmah he ai pehtlai mi Northwestern Regional Military Command (နမခ) hna khi cu whiteboard ah by-heart in ṭial/suai khawh ding ah kai zuam. Ralhrang Command structure zong hi rel ka huam dom.

Kan ral an si tawp tiah a kahdoh sawhsawh lawng siti lo khin ka ruat. An konglam, command & control a feh khawhning te hna, zeitindah an ser hnga ti tiang khi ka ruat tawn. A fiang mi cu ramthar kan ser tikah ralkap bu ser cu kan herh telai i a tu kan ral sin in ṭhawnnak, thiamnak, cawnnak rak i hrambunh cia zong hi ṭhatnak a ngei ko lai ka ti. Chimduh mi cu raltuknak le ralṭhawnnak kong hi seihvuansa lak in kan miphun ningin ruah a hau ko cang.

M.A.H cu a thirphang ko cang. Rampi cozah a tlai kho tilo. A rauh hlan ah cun Naypyidaw cozah tiah thlen a si telai. A ram a bi ngaingai cang. Mipi ram a kau. A biapi mi tu cu, teinak ca ah siseh, raltuknak le ral teinak ca ah kan kalcia mi thazaang nak cak in kan kal a hau ko rih. Dohthlennak i a hrih a hram cu MIPI hi kan si ko.Sautuk a mui ti lailo. Mipi tu nih lungkhat tein na tan ti ah cun tei nak cu kan hmuh colh ko lai e. Salai Ṭial Hram Ling.

Relchap, SAC Ralkap Nih Pu Siang Mang Inn An Rak Hrenhmi An Hunpiak Ṭhan Cang.Chin ramkulh, Hakha khua ummi CNLD party in MP a rak i zuammi Pu Siang Mang a inn cu January 12 lioah SAC ralkap nih an rak chuh. Nizan May 10 ah Pu Siang Mang a fapa sinah an pek ṭhan tiah theih a si.

Pu Siang Mang cu 2020 CNLD party in MP a rak i zuam i, NLD party in Pu Sui Ṭhio a rak tei. Sagaing ramṭhen, Chindwin tiva thluan ah PDF nih hmunhma venhimnak an tuah lioah Monywa in Humalin, khua lei ah a kal ding tilawng 4 chungah SAC ralkap nih, an hman ding mi datsi an phurh caah PDF nih May 10 ah an tlaih, tiah theih a si.

Thilphur tilawng 4 cu SAC ralkap nih an hman mi datsi Tank 4 le Dissel Tank 4 an phurh caah DBTF၊ Yoma Fighter (Yinmarbin PDF)၊ Kani People Defense Force (KLG)၊ Spring Gurellia Platoon, (LPDF) le Bo-Miṭoh ṭangrual phu hna nih an tlaih hna, tiah theih a si.

SAC ralkap ca ah thil a phurtu tilawng 4 in ṭuanvo ngeitu hna cu hi hnuah SAC ralkap he pehtlaih ti lo ding le an thil zong phurhpiak ti lo ding biakamnak PDF nih, an tuahter hna hnuah an thlah ṭhan hna, tiah theih a si.