Hniar Lawn Khua USDP Hruai Tu A Si Mi,Pu Phir Mawng In Cu Ni Zan Ah Hau Si Ti Theih Lo Mi Nih Bomb In An Puah.

Min Aung Hlaing te phu ttanh tu le dirpi tu pawl hna hi cu an caah lam pit thluahmah cang ko lai, Chin ramkulh, Hakha peng, Hniarlawn khua ah ummi Pu Phir Mawng inn cu nizan May ni 11, kum 2021 zan suimilam 100:00PM May ni 12, kum 2021 suimilam 12:00AM kar ah a ho ti theih lomi nih bomb an puah tiah thawngpaang theih a si.

Pu Phir Mawng hi USDP in Hlutdaw palai aa rak cuh vemi si nain a hlawh tling lomi si i a tu bantuk in a umnak inn bomb an puah ruangah a mah zong faak ngai in hliamhma pu, Chin ramkulh chungah Min Aung Hlaing te phu ttanh le dirpi hi cu a si kho ti lomi rian si ko cang hih!

Hi kong he pehtlai in Pu Phir Mawng nih bomb a puak hi zinglei suiilam 12:00AM hrawngah si, thil cu a dik ning tein ka chim ko lai, hi bomb puah ruangah lunghrinhmi cu ka neih ko hna, kei mah hi a tu buainak kong he pehtlai in tthim tia te zong sualnak le palhnak a neimi ka si lo.

A si nain kei mah a ka duh lomi pawl nih a tu hi caan ttha ah an rak i laak i si ko, a ho dah an si timi le an minung zong hi Pathian nih phorzaar te ko lai lai tiah The Hakha Post ah chim. Bomb an puah hnawh ruangah a motorcycle pahnih an rawk, a motor hmun 7 in a pem hlei ah a mah zong a cal tleek.

Kei mah hi cu ho he poah aa daw vemi ka si tik ah Pathian nih a ka pekmi chiattha thleidannak thluak hi ralring tein a hmangmi le a cawlcaangmi ka si, zei ruangah ah dah an ka puah hnawh ti bel ka thei lo, kei mah leikap cun Pathian hmai lei minung hmai ah sual ningzah ding ka nei lo, hi bomb puah hnawh ruangah ka cal a tleek i hmunhnih in an ka tthit tiah Pu Phir Mawng nih cun a chim chap.

Be the first to comment

Leave a Reply

Your email address will not be published.


*