Innchungkhar Rothil Zuar In Hriamnam An Cawk

Innchungkhar Rothil Zuar In Hriamnam An Cawk – Magway ramthen Myaing myone PDF hotu nih atu tan dothlegnak caah ralhrang ralkap an do cuahmah mi ah hriamnam an herhbau tuk i, an inn chungkhar ngeihmi thilri tiang zuarin hriamnam cawl an timh tiah achim.

Myaing myone PDF hotu nih Ralhrang pawl cu kum 70 renglo a dir cang mi an si ruangah raltuknak hriamnam le minung zongin kan I thlau tluk kho ti lo. Hriamnam an ngei mi atha tuk i, kannih cu kanmah tein serchawm men in ralhrang cu kan dirh hnawh hna. Hriamnam ngeih khawhnak dingah kan sikhawh chung in kan cuah i, kan suithi le kan ngeihmi thilri kan zuar hna i ting 10 hrawng kan hmuh nain, hriamnam acaw kho lo.Cutikah kan chung le pawl kan cah hna i, pupa ro kan ngeihmi ka lo le hmunram pawl kan zuar hnuah ting 20 hrawng kan hmuh hna nain, hriamnam man ting 100 hrawng a si tikah kan duhmi hriamnam kan caw kho hlei lo. Ka nulepa cu lo riantuan an si tikah caw chinkhat an ngei i, cu caw chinkhat zong cu hriamnam cawknak caah kan zuar cang.

Caw pakhat ah ting 15 in kan zuar i, chinhnih ah cun ting 30 kan asi. Ka nulepa nih ram dirhmun an thei tuk i, buainak an tuah lo. Nan caah a si ahcun kan pum cungah kan I hrukmi thilpuan zong kan zuar dih ko lai  tiah an ti hna.Cutlukin nulepa nih an kan dirpi tikah kan lung athawng i, thazang kan laa tuk. Asinan, tu ahcun ralhrang pawl nih mipi an baa cang i, cu tikah PDF an um ruangah Khua pawl hi an khangh hi asi tiah khua kip ah an nawnnawk hna. Cutikah khua mipi cheukhat nih ralhrang pawl khua an khangh tikah hin PDF pawl nih an kham kho lo mawsi timi biahalnak a tam i, cu bantuk kan theih tikah kan lung atha hrim lo.

Kannih ramchung mipi ralkap hi kan zapi te fonh dih ah cun One Million cu kan tling ve ko lai. Mipi ralkap kan dilak chungah hin hmun 4 ah hmunkhat te lawng hi hriamnam kan pe kho hna she law cu ti te hmanh cun kan duhmi Democracy caah ralhrang kan doh lai I kan tei ko lai tiah  kan i ruat. Curuangah kannih Myaing myone PDF pawl nih NUG i pek dingmi hriamnam ruahchan in kan sikhawh tawak kan chuah ve rih.Dothlengnak hi kanmah pumpak pakhat lawng nih kan tuah mi a silo i, cun kan mah phukomh pawl ca lawng zong ah tuah kan silo. Dothlengnak i teinak kan co tikah ralhrang salin kan luat lai i, ralhrang uknak in kan luat lai. Kan duh cio mi Federal Democracy uknak kan hmuh lai, cutikah mipi kanmah tein khuankhan lai rel nak kan ngei kho ve lai cu caah Dothlengnak ah a phunphun in tel khawh asi i, kannih zong asi khawh lo ruangah hriamtlaih in aum kan si. Kan dihlak in dothlengnak hi tei  kan duh dih ruangah mipi kan pi tein dohtlengnak ah ka si khawh nak zawn cio in tel hna uh si tiah achi.

Ralhrang Pawl Remnak Tuahpi Khawh An Silo A Titu US Palai – Ralhrang ralkap nih rampi nawlngeihnak an lak tikah mipi lei in ruahnak phunphun a chuak. Thenkhat nih ralhrang pawl cu hriamnam he doh bak an herh, cu lo ah cun remnak tuahpi khawh an si lo an ti i, thenkhat nih cun hriamnam he doh tikah thihnak lawng aphan i, kahdoh nakin a adonghnak aphak ter kho lai lo. Curuangah remnak tu tuah deuh ding kan si an ti ve.Ruahning aa dang cio mi mipi lakin hriamtlai an um bangin, ralhrang pawl arak bia chawn lengmang tu phu zong an um ve. US palai hlun Scot Marciel  zong ralhrang kongah a chim ve i, annih cun ralhrang pawl cu remnak tuahpi khaw an silo tiah ati ve.

Scot marciel nih Hmasabik i kan chim dingmi cu Daw Aung San Suh Kyi a si. Suh Kyi cu hriamnam hmang in cawlcanghnak a duh lotu a si i thazaang hmang loin dothlengnak duhtu a si. Curuangah Myanmar mipi zong nih thazaang tel loin ralhrang uknak an rak do hmasa ve. CDM an tuah i, daiziar in lamzawh in duh lonak an tuah hmasa.Asinan, ralhrang pawlnih daiziar in lamzawh duhlonak tuahtu pawl cu hriamnam hmang in an then hna tikah mipi caah cun thim ding dang a um ti lo i, mipi zongnih hriamnam an tlaih ve. Ngeihchia tuk asi mi pakhat cu ralhrang hotu pawl kan zoh tikah cabuai cungah chawnh in men in remnak tuahpi khawh ding muihmai an keng lo. Curuangah a tu i thil si kho mi pakhat cu ramleng phukawm zate in le ramchung mipi dihlak  nih ralhrang hi phih dih si seh law, ralhrang pawl lam hi phit koin tuah dih  sehlaw cu lawngah an tha an thlah lai.

Ramleng nih ralhrang an hrem, an pom lo. Ramchung ah CDM cawlcanghnak le hriamnam hmangin ralhrang dohnak pawl cu ralhrang pawl phurrit peknak thabik a siko tiah ka pom. Hiti hlei in ralhrang doh  ningding dang a um lo. Cu caah zapi nih lungrual tein tuah dih khawi ding hi abiapi  bik a siko.

Myanmar ram chung ah hin nan lung aa rual khawh lo i, buainak phunphun, phukom phunphun nan um. Cu caah hi bantuk pawl atlangtla kho tu cu kanmah lawng kan si tiah ralhrang pawl nih cun an ti ve. Kanmah lawng nih buainak hi hriamnam hmangin kan deih terk khawh timi an ruah caah hin luar chin. Ralkap nawlngeihnak hi a ttum chuk ding an duh lo tuk.

Asinan, mipi nih Federal Democracy uknak nan duhmi a si i, ralhrang pawl nih kawl miphun long hi hotu an si lai timi an ruahnak cu mipi lei nih an pom kho ti lo. Tlangcung miphun pawl i sinak le herhbau mi pawl zong hmunrawn I um pawlnih an theithiam chinchin cang. Atu i Myanmar mipi pawl nih zuam cuahmah mi cu ralhrang uknak hloh ding le cunglei tlai tu um loin Federal Democracy uknak dirh ding cu a si tiah achim.US palai Scot Marciel nih cun ralhrang dohnak ah ramleng nih hremnak, pom lonak, CDM tuah le hriamnam tlai i doh nak in atha deuh mi thildang a um lo a ti. Asi nain Cucu ramleng nih lungrual tein ralhrang an hrem dih kho lo i, China, Russia le India pawlnih ralhrang an dirpi. Ramchung ah CDM tuah lo an tam deuh i, hriamnam hman ding ngei lo mipi ralkap tampi an um. Hi pawl hi tlamtling dih sehlaw ralhrang pawl an lam apit ko lai.