Israel Le Palestine An Ni Do Nak Nih Cun Zual Lei A Panh Chin Chin Cang Caah Israel Prime Minister Nih Cun Palestine Hna Nih An Kan Kah Lengmang Siah Cun, A Tuk Nak In Fak Deuh In Leh an Silai Tiah A Chim Cang.

Israel le Palestine an ni kah nak nih cun, nikhat hnu nikhat in a faak chin thluahmah cang, tuzing thawngthar a hung chuakmi ah cun Israel le Palestine kar kah dohnak ruangah minung 70 nak tlawm lo an thi cang ti si, Isreal lei in a thimi hi pa 5 an si i Palestine lei in a thimi hi 65 nak tlawm lo an si.

Israel nih hin Palestine palik le ralkap pawl an umnak hmun pawl nizan May ni 13, kum 2021 zing ah khan cunglei in a phomh tthan hna, Israel lamhlaat bomb kahnak hmang in a kah hnanak ah zung ah an hmanmi inn dot saangpi pakhat cu a cim bak in cim dih, Isreal bomb kahmi ruangah hngakchia 16 bak telh in minung 65 an thi tiah Bgaza Health Ministry lei nih thawng an thanh.

A luan ciami May ni 11, kum 2021 ah Isreal lei nih cunglei in an rak kah hna ruangah Hamas ralhraang hna umnak inn sang pakhat zong a rak cim cang, nizan i an kahnak ah a cim mi inn chungah hin minung an um rih le um lo theih a si lo, bomb an thlaak hlaan deuh ah hin mah ka inn ah ummi vialte cu i tthial dih uh tiah ralrin an rak peng cang hna.

Hamas lei zong nih lamhlaat bomb kahnak 100 leng hmang in a kah ve hna ruangah Israel ram Ashkelon khuami pa 2 telh in minung pa 5 an thi cang ve, tutan ah Israel le Palestine kar ah a chuakmi kah dohnak hi a luan ciami kum 2014 lio ah a rak chuakmi kah dohnak hnu ah a faak bikmi dohnak si.

Israel Prime Minister Benjamin Netajanhu nih cun,Palestine hna nih an kan kah lengmang rih siah cun,a tunak in faktuk in leh rih an si lai tiah a chim.Credit : The Jeruslem Post

Be the first to comment

Leave a Reply

Your email address will not be published.


*