Kachin independence KIA Nih Cun An Ral Donak Ah Pathian Nih A Bawmh Nak Hna Cu Fiang Tein An Chim Cang.

KIA nih an kawl ralkap hna sin i an lak tthan mi, Alaw Bum sakhan cu Min Aung Hlaing te phu nih laak tthan an duh tuk ruangah chun he zan he bak in lam hlaat bom kahnak siseh raltuknak vanlawng le helicopter hna hmang in an tthuat chih lengmang ko hna, a si nain nihi tiang cu an la kho hlei rih lo i an mah lei ralkap thimi tu an karh chih thluahmah.

Hi kong he pehtlai in Kachin Idependent Army (KIA) nih mipi hna sin ah bia cahnak an tuah, Alaw Bum tlaang pi cu a ngandam rih ko, nan thinphang tuk hlah uh, Min Aung Hlaing te phu nih laak an duh hmasa bikmi cu Myothit, Kunglaw Tower tung bunhnak pawng i kan sakhan pawl hi an si (Myothit, Kunglaw timi hi Kachin ramkulh Bamaw district, Moe Moh peng chungah ummi si).

Min Aung Hlaing te phu nih hin laak tthan an duh tuk ruangah chun he zan he hriamnaam hme le ngan hna phur in Bamaw lei in an rak kai peng ko i ral dohnak ca i timhlamhnak an neihnak hi a thla leng in si cang, tu lio kan dirhmun fiang deuh in vun chim ah cun Alaw Bum tlangcung sakhan la ding in Min Aung Hlaing ralkap cheukhat pawl cu ral doh ding hrim hi an ttih tuk cang.

A si nain cunglei in an pekmi hna nawl an al khawh lo ruangah an chang chih ve i si, zei tik ni, zei tik caan ah dah zei bantuk thazaang he an kan doh te lai ti cu kan thei lo nain kan nih KIA lei cun ready tein kan um peng ko, tu lio hi Alaw Bum tlang pawngkam le Myothit Kunglaw hrawng ah hin lamhlaat bom kahnak le cung lei in bom thlaaknak dah ti lo meithal thawng kan theih lonak hmanh ni 6 hrawng si cang.

Nizan May ni 6, kum 2021 zinglei suimilam 3:00AM khan Myothit Kunglaw i KIA ralkap pawl hmunhma khuarnak pawngkam hrawng cu cunglei in voi tam ngai bom an rak thlah caah kan mah lei zong nih faak ngai in kan kah ve hna, vanlawng in cun voi tampi bom an thlaak khawh ko nain an vanlawng nih ttum khawhnak ke a neih lo lo.

KIA ralkap lei nih Min Aung Hlaing te phu ral tuknak helicopter an kahnak kong zong kha vawlei pi theih ding in tehte kan langhter khawh cang, tuzan (May ni 6 zan) suimilam 7:20PM tiang kha vanlawng cun bom an kan thlah hnawh cuahmah ko rih, mah thawngpaang kan ttial lio zongah hin bomb kahnak in kaphnih kar kan i phomh cuahmah ko.

Myothit Kunglaw Tower tung bunhnak pawng kah dohnak cu Giawn ral dohnak a voihnihnak bantuk in a faak chin thluahmah kho men, cu ruangah Min Aung Hlaing te phu a do tu KIA ralkap hna caah mipi lei nih thlacamnak tuin rak kan bawm hraam ko uh, hriamnaam le ralkap thazaang lei cun an kan tei tuk ko nain kan nih lei ah cun a nungmi Pathian nih a kan vennak thawngin le Myanmar ram chung mipi nan thlacam piaknak thawng te hin ral ka doh khawh rihmi si ko.

Be the first to comment

Leave a Reply

Your email address will not be published.


*