Kan Ram NUG Riantuan Nak Fiang Tein An Langhter Mipawl- An Rak Men Hna Lo

NUG nih bawmh a herhmi mizapi hna caah 1.35 billion ka bawmhchanh tiah a chim: (NUG)cozah nih Myanmar ram chungah bawmhchanh a herhmi mipi hna cu tukum April 16 ni in September 20 tiang ah bawmhchanh mi dihlak hi 1.35 billion bawmhchanhnak a pek tiah October 1 ah cathanh an chuah.

NUG nih minung hawidang zawnruahnak le,pawngkam ral zohkhenhnak vuanci in ralzaam, ramkhel ruang thongtla chungkhar hna le, nunnak liammi hna chungkhar, khuacaan ruangah harnak tongmi hna le hliamtuar mi hna, eidin riahcaw harnak a tongmi mipi hna cu bawmhchanh an si tiah cathanh ahcun a langhter.

United nations in Myanmar ram kong ceihhmainak zung(UNOCHA) nih cathanh a chuah ning ah ralhrang phu hna uknak an lak hnu in September 13 tiang ah Sagaing ramthen ah minung 63000, Magway ramthen in minung 12000 luan, Chin ramkulh in 12000 hrawng le Shan/Kaya ramri hrawng kahdohnak ruangah Kaya ramkulh ah 142000 hrawng nih an umnak hmun kaltak in an zaam tiah theih a si.

Myanmar ram chungah ralhrang phu hna nih nawlngeihnak an lak hnu ah ralhrang kut in nunnak liammi minung 1147 an si cang,minung 7022 cu thongtla dirhmun ah an phan i, minung 1989 cu tlaihding in ca chuahmi an si tiah AAPP nih October ni 1 cathanh ah a langhter. The Irrawaddy.

Capar Dang Rel Nuam Tak Mi Relduh Mi Ca Lawngah Rel Ding Na Rel Huam Lo Cun Lanhtak Ko. ( Hringtu Pa Santlai Lo (Part 1) : Khuasik thla a si bantuk in zingka ni ceu a chuak hlan caan ah hin cun chum nih zeizong vialte cu a zelh dih i a ho hmanh hi a lam hlat nawn in  cun i fiah kho cio a si loh. Lam ah ai chawkletmi zong an um lo khan a si i rian herh taktak dah a um ti loin cun a ho hmanh hi an ihkhun cungin an tho huam cio hna loh. Cu  bantuk in a lam hlat in zoh tikah a hring dildelmi khuate pakhat cu mah bantuk khuasik thla ah a zammi zingka chum nih a zelh ciammam ve i mah hi khuate ah a kal bal lomi caah cun lam tlau a fawite lai tiah chim khawh a si. A ruang cu zingka chum nih inn le lam hna cu a phenh dih hna caah a si. Cu caah fawi tein mah hi inn hi a ho inn dah a si  timi kha theih khawh a si loh i tlau a fawite! Mah cu khuate cu zingka ah hin cun a thawngpang a dai ngaingai i a caan caan ah uico an bo thawng dah ti loin cun zei  thawngpang hmanh hi a um lo khan a si. Hi bantuk in a dai i a kikmi zingka ah hin a ho hmanh leng chuak an huam cio hna loh i an ihkhun ah cun khuaiseng bang an i benh ko hna. Mi thinlung zaang der caah lebangah cun hi bantuk a daimi le a kikmi le mi chawklet an um lo lio caan ah hin cun mah lawng in leng chuak ding timi hi ning a ttih lehlam ding in a um. A sinain a zeimaw  mi cheukhat caah cun a tu bantuk zingka hi an caah caan ttha ah an i ser ve hna i an paw cawmnak caah si seh an mah pumpak ngandamnak caah si seh lengah chuak in hawi  nakin ka tlai sual lai maw tiah an i rianranh ngaingai ve hna. A caan caan ah cun zingka ah a tlimi la a kalmi kedenh thawng cu ai thei i cu ticun mah le sining hoih cio in an  cawlcang hna. A sinain mi cheukhat caah cun hi bantuk zingka a kikmi hi thawh taak siang lo dingin a um ve.

Cun caan tlawmpal a van i her cun innchungkhar nu cem hna nih an fale an sik thawng hna le an fale hngakchia sin in si seh an bawhte sin in si seh an ttap thawng cu a theih  khawh a hung si i an fale kha sianginn kai dingah an tho kho lo buin an thawh hna timi cu a fiang. Cun a zeimaw inn sin in an sattil an hro thawng le lung sau lo ngaiin an  vualhpamh thawng te hna cu theih khawh a si i cu lioah an uico hna nih cun an sattil cu nan thawh a tlai tuk tiah an mawhphurh ve hna i an boh len ve hna. Cu ticun caan cu  duhsah in a hung i mer i khuate cungah a zammi chum zong a hung ttian deuh deuh cang bantuk in innchungkhar cio sin in coka lei chumhchuan lei bel kheng thawngpang hna zong an hung i thei ngaingai hna. A sinain a zeimaw inn sin in cun zei thawngpang hmanh ai thei hlei loh i dai tein a ummi zong tampi an rak um ve hna.  Cun khuate lam laifang ah ai chawkletmi hna an hung tam deuh deuh hna i ke in a kal na bicycle in a kal na le motorcylce in a kal na le caw/naa leng in a kal na in khua  laifang lam cu manh lo ngaiin an umter cang. Tha tho ngaiin a um kalmi an um hna bantuk in huamnak a zor ngaimi muisam he a umkalmi hna zong an tampi hna i an dirhmun  cio cu an i khat hna loh. Cu ti ai chawkletmi khuami hna lakah cun bicycle(set-bing) a chia ngai cangmi pakhat he buri a ngan ngaimi hna cu phurh pah in tha tho ngai muiam he

a kal vemi pa pakhat a um. Cu cu mi dang si loin khuate a taw lei ah fangvui(kawm) dum a tuah i a ummi Pu Anderson Thang Lian a si. khuami hna nih cun Pu Lian tiah an auhmi a si. A tung a sang nawnmi le der lem lo thau lem lo zoh dawh tawk khi a si. A kum in cun kum 42 a si cang nain a thei lomi nih cun kum 33 hrawng si lo le kum 35 hrawng mino nawn ah rel dingin a um. A ruang cu a mah hi zukhmawm a tawng ve loh i a nuhrin chuahkehnak hrimhrim in mi titvun dawh a si caah a si. Cun a rian a simi dum tuah nih hin nitin exercise tuah bantuk kha a si caah a vun hi an i dawh i no a hlawhter. A bicycle in a phurhmi buri chungah a ummi cu fangvui(kawm) an si hna i a bicycle a lai he a phirhnak he a tthutnak he a kawm phurhmi buri hna cu an khat dih caah a mah cu  tthutnak hmunhma a ting ti loh i a bicycle cu a hruai tu in a hruai. A konglam van chim chap a si ahcun Pu Lian hi nupi a rak ngei balmi a si i a nupi nih tuan teah a rak liam  taakmi a si. Fanu pakhat an ngeih hnu ah a nupi nih a rak liam taakmi a si i a fanu a min ah Anna a si.

A tu ah cun a fanu cu kum 24 chung hmanh ah a lut cang i nu caah cun  pasal ngeih cu kumkhua a phan cang ti khawh a si. A sinain Pu Lian nih a dawt tuk tikah hngakchia bantuk in ai hnoh ngaingai rih ko. Pu Lian a rian a simi fangvui dum tuah cu a fanu nih a sianginn ai dinh caan paoh ah a bawmtu fanu fim le fanu fel ngai a si. Ca zong ai zuam i a tu hi college a kum donghnak a kai lio a si cang. A sinain a poinak cu  Pu Lian a rian a ttuanmi hlawh nih a fanu sianginn pehzulhnak caah a harsa chin lengmang cang. A sinain hi kong hi Pu Lian nih a fanu cu a chim bal loh i a lungretheihnak cu a thli tein ai thuhnawh ziar ko hna. A fanu ni ca a duh timi a theih tikah le a rian ttuanmi nih le dumtuah rian a si bantuk in a fanu caah a sianginn kai man a chuak kho lai lo timi hi a tutan tikah zan khua a,

A pa retheihnak kha a lenglei thilri man fak cawknak ah cangter a duh loh i a hawile lakah i chim awk a ngei lo cem a si nain a pa cu zei hmanh cawk a hauh bal loh. A  sianginn kai tti hawi zeimaw nih cun an hmuh niam nain a zeimaw a hawikom hna nih cun ca a thiam ruangah le ai dawh ruangah le a fim ruangah an dawt tuk ve. Cu ticun hringtu pa teima le fanu fim cu an harsa nain khua an cuanh dan ai lo ngaingai caah hawi van hai lo tein nifatin an ni le caan cu nuam tein an liam tti lengmang ko hna.

Pu Lian nih a tu tiang a fanu hi phone a cawk piak kho rih loh i inn phone hri a ngeimi pakhat te cu an hmang tti. A sinain a tu tiangah a fanu nih cun phone cawk piak hi a hauh  loh i a duh tiah cun a duh tuk ve timi hi Pu Lian nih cun a hmuh khawh. Cu caah a lung thli tein ai timhmi cu phaisa hi a thli tein i khawn i mah cu a khawnmi phaisa in cun ka fanu caah phone cawk piak ding hi a si. Cu caah a tu ni zingka hi a fanu caah phone cawknak phaisa a khawnmi a tling lai zing a si ruangah a mithmai cu a tha a tho ngaimi a lonak hi a si. A tu a phurh liomi fangvui hna hi a va zuar lai i a hmuhmi phaisa cu a fanu sianginn kainak man le an khuasaktintuknak caah a zuh hna lai. Cun a tangmi tlawmpal  te kha fanu caah phone cawknak phaisa a khawnmi he a fonh lai i phone cawknak khim a chuak cang ding a si. A fanu hi ai dawh i lengkai tu tlangval a ngei kho ngai. A zeimaw a rak lengkaitu a hawikom le a sianginn kai tti tlangval hna nih hin laksawng zeimaw an rak pek tawn,  asinain cu laksawng an pekmi hna cu Pu Lian nih a thaizing ah a va khirh tthan hna. Nu na si le an laksawng al hi a fawi loh. A sinain pa ruahnak cu pa lawng nih kan theih khawh.

A hnu ah caan ttha laknak ah hi laksawng an i pekmi hi an hman khawhmi a si. Na par ai dawhnak a duh sawhsawhtu men an si hna tiah a fanu cu a chimhhrin tawn. Pu Lian cu a fanu a veng tuk tiah thawngpang a thang ngaingai nain hi hi Pu Lian nih cun a zei hmanh a poi loh i ka fanu cu vennak nawl ka ngei tiah tiah ai seh chihmi a si. Cu  caah tlangval zeimaw hna cu Pu Lian ttih ah a fanu cu an rak leng ngam ti loh. Cun phone a ngei fawn lo tikah pehtlaihnak an tuah kho ti loh i an sivang ko cang hna. Pu Lian hi zukhmawm lei a tawng ve lomi a si tikah le tlang lo dum tuah rian a ttuan pengmi a si tikah a taksa cu an tthawng tuk rih i a tu chan mino tampi nih thazaang in an tei rih lai loh timi cu zohnak ah a lang. Cu caah mino tlangval hna nih an ttih ngainak zong a si. A zeimaw caan ahcun a fanu he dum ah an kal tti an lawi tti caan ah hin nuva ko  khi an lo i a thei lomi caah cun nuva ah rel an fawi te! A ruang cu a fanu zong hi pumrua chuak thiam ngai a si i a kum rup loin a pumrua cu a nutling. Cu caah Pu Lian he an i tia  nacha nawn i an umkal tti liioah hin cun ai tlak ngaimi nuva ko khi an lo. Cu ticun zanlei cu a hung phan i Pu Lian cu a fangvui zuarnak hmun lei in tha tho ngaiin a bicycle a  chia ngai cangmi cu ai cuan i rang taktak in a mawngh ko. A mithmai cu a ceu bakin a ceu i a mirh lawngte a chuak ko cang. A ruang cu harsa tuar in a fanu theih lo tein kum khat dengmang caan saupi chung phaisa a khawnmi cu phone cawknak khim a chuak cang caah a si. Cun hi kong hi a fanu a  chimh lai kha ai ngeih tuk ca zongah a hmai cu a mirh peng cangnak cu a si. Cu ticun an inn lei hoih in kal ti loin an khua he khuapa a simi khua lei hoih in a kalmi nelrawn ram lak lam bite cungah cun a bicycle a lamhnak hna cu a rang khawh chungin a lamh hna i a kal thluahmah ko. Haaa woo tiah a au pah i a ni pah len ko.

Rang tukin a mawnghnak ah a thlan nih a pum ning piin a ciah dih cang. A sinain a hmai cu a panh peng ko i a ni pah in a bicycle cu phone an zuarnak dawr lei panh in rang taktak in a mawngh peng  ko. Zanlei cu a hung luan cang i khua cu a mui lei a hung panh cang. A fanu cu inn ah a mah lawng a rak um i a pa a lawi lai caan cu hngak in zanriah zong timh cia tein a rak  chumhchuan dih cang hna lai. Aaphone um maw? Aaphone? tiah Pu Lian nih cun a thlan nih a peihmi a muisam he cun phone dawr hngak cu a hal. Phone dawr hngak nih cun Pu Lian cu a zoh i a ar ko. Ka nau aaphone dah ngai ka theih bal lo e tiah a leh. Cun Pu Lian nih ka nau a tu chan mino pawl nih an uar ngaimi aaphone an ti lengmangmi cu hme teh tiah tha tho ngaiin a hal tthan. Cun phone dawr hngak nih cun um rih na ka nau hnga maw eih? 38 pei ka lut cang cu na bia chim i zoh tthan tuah na u ding ka si deuh lo maw tiah phone dawr hngak  nih cun saya i ti ngaiin Pu Lian cu a ti. Pu Lian cu a ttah chuak i a nih chuak tthan. Phone dawr tiah cun hi phone dawr hi an khua he ai neih cemmi phone dawr a si caah phone  dawr dang ah kalnak a um ti hlei loh. Cu caah a lu cu ai kheuh pah in sorry ka naupa, e sorry ka upa heee.

Aaphone an timi cu mu a hnu lei ah apple thingthei ei bangmi lem bantuk ai cuangmi kha hme teh tiah phone dawr hngak cu a ti tthan. Cu bakin cun phone dawr hngak cu a van ai cau i thang taktak in a ni thluahmah ko. Zei a si paoh ah a donghnak ah cun a cawk duhmi a tu chan mino nih an duh tuk tiah thawngpang a theihmi iPhone le a fanu nih a uar phun a si lai tiah a zumhmi iPhone cu a  cawk khawh. A cawkmi iPhone a bawm cu a kut khat lei in ai keng pah in a bicycle cu a kut khat lei in a mawngh pah. Cu ticun an khua lei kalnak lam thluan chuak chung cu a kut cung iPhone a bawm cu hmai panh ngaiin a zoh pah lengmang i rang ngaiin a bicycle cu a mawngh. Khua cu a mui ngai cang i an inn lam pialnak lam a phanh cun a bicycle cungin a ttum i a bicycle cu a hruai in a hruai. Inn chung cu a rak dai ngaingai i meikhuat ai vangmi a ceu nih thlalangawng in leng lei an chuak hna caah inn chungah a fanu a um timi cu a theih khawh. A sinain an inn tual a phanh lai teah ai ruah lo ning ngaiin thil a cangmi cu a hei hmuh i a hruaimi a bicycle a brake cu a hmeh.(To Be Continue)

Be the first to comment

Leave a Reply

Your email address will not be published.


*