Kawl Ralkap Caan Sau Pi A Rak Tuan Thing Mi MDF Mara Hruaitu Nih CDM Palik CDF-Mara Ralkap Meithal In An.

Kawl ralkap a rak ttuan balmi Maraland Defense Force MDFralkap haotu Pu Chhipa Thomas Chozah nih CDM palik CDF-Mara ralkap Salai Ma Hnei 25 cu March 25 zaan sml. 9:00 hrawng ah Ngaphaite khua ah meithal in a kah i a nunnak a liam, tiah Ngaphaite khua upa nih The Chin Journal ah a chim.

Meithal in a kaptu pa hi Kawl ralkap a rak ttuan tthingmi a si i atu MDF ah ralkap lei haotu a simi Pu Chhipa a si. Kawl ralkap a rak ttuan lio ah bomb nih a kee ah a puah hnawh i pension in aa dinmi a si,tiah a chim. Pu Chhipa nih CDF- Mara ralkap haotu pakhat zong a phei ah a kah ve caah hliamhma a pu.

Kan khua ah a rak phanmi MDF ralkap hi minung 9 an si. Hriamtlai cio kan si tik ah kan khua an rat ahcun thawng na kan thanh ta hmasa awk a si kan ti hna. Cu dih cun an hruaitu Pu Chhipa nih kan khuabawi inn ah meithal a kan puah hnawh len, tiah a cunglei upa nih a chim.

March 25 zaan ah khua sianginn ah khuami, MDF le CDF-Mara biaruahnak an ngei hna i biaruahnak a dih hnu ah hi thil a can hi a si. Tha tein biaruahnak ngeih ding kan ti caah kanmah CDF-Mara lei cu meithal zong an i ken lo. Biaruahnak zong an tuah dih cang ko. MDF haotu Pu Chhipa hi tlaih i ttha tein chimhrin biaruah ding an ti

A meithal chuh an timh ah CDF-Mara haotu pa cu Pu Chhipa nih a phei ah a kah. Cun, CDM palik a simi Salai Ma Hnei nih a zuan hnawh i a kah ve. Salai Ma Hnei cu a nunnak a liam. Cu dih cun meithal voi 60 hrawng a kan puah hnawh i an zaam, tiah thil sining a chim.

A nunnak a liammi Salai Ma Hnei cu nihin March 26 zaanlei sml. 4:00 hrawng ah an vui. Hi kong he pehtlai hin CDF-Mara nih CNF sin zong ah thawng an thanh hna i, CNF lei zong nih thil sining ttha tein kan hlathlai lai an ti, tiah a cunglei upa nih a chim chap.

“Atulio thil sining cun MDF le CDF-Mara cu dirhmun aa ralkah tuk tik ah biaruahnak ngeih zong a har ngaingai cang lai. Hi thil a can hnu ah MDF upate lei zong in CDF-Mara sin ah pehtlaih i chawnhbiak le ngaihthiam halnak zong a um rih lo,” tiah a chim.

MDF hi atulio ah thazang 60 hrawng an si lai tiah an zumh i AA sin ah raldoh a cawngmi an si. SAC ralhrang nih Myanmar uknak an chuh hnu in zapi theih in a langmi hriamtlai an si nain SAC ralhrang doh an tim lo, Mararam kong tu ah cawlcangh aa timmi an si, tiah MDF kong a theitu hna nih The Chin Journal ah an chim.

Mizoram, Saiha khua ah hram a bunhmi “Mara Administrative Territorial Council” (Mara Hmunram Uknak lei Council) le MDF hi pehtlai in rian an ttuan, tiah Mara upa pakhat nih a chim.

Thawng dang deuh Tinam Khua Inn 9 SAC Ralhrang nih an Khangh, Khuami 700 Hrawng an ZaamHakha he meng 36 a hlatnak hmun ah a ummi Tinam khua ah SAC ralhrang 100 hrawng zaan an riak i, inn 9 an khangh ta tiah ramlak ah a zaam vemi Tinam pastor nih The Chin Journal ah a chim.

Ralkap 100 hrawng an si lai dah. Kan khua Baptist biakinn le Believer biakinn ah an riak i, inn an bauhmi le an firmi zong a um len ko. Lamtuk lei an lanh lai ah inn an khangh ta i inn 9 an ciam,” tiah a chim. Inn a kaangmi hi bomb nih a tlakmi theng si loin an khangh hramhrammi a si ko, tiah a chim a chap.

Bomb tlak ruang ah a kaangmi cu a si lai lo. Khuachung an um hnu, khua in an chuah lai ah a kaangmi a si i, an khangh hramhrammi si dawh a si ko, tiah a chim.Lamtuk khua pawng ah miphun ralkap le ralhrang karlak kahdohnak fak ngaiin a chuak i SAC ralhrang lei in a thimi le hliam a pumi an um len tiah kan theih nain mithi/hliampu a zat fiang in theih a si lo.

Tinam khua ah inn 105 a um i, an khua ning in milu 700 hrawng cu bu 6 hrawng ah an i tthen hna i ramlak ah an zaam dih hna. SAC ralhrang pawl Lamtuk khua lei ah an kal caah Lamtuk khuami pawl zong nih an khua an chuahtak, tiah thawngpang kan theih.-Burmese