Kawl Ralkap Ralhrang Hna Cu May Thla Chung An Ni Do Nak Ah,200 leng lo An Thi Cang.

Nihin May 26 tiang kahdohnak 100 leng a chuak, ralhrang bu lei 100 deng an thi tiah KNU Brigade 5 chimhnak nawlngeitu Lt.Col. Saw Kale Doe nih hiti hin a chim. “Anmah lei BGF hna he fonh in kanmah lei ah thazaang an rak i chap caah kan karah buainak zong a zual, i kahnak zong a fak chin lengmang, A dai cang ti hrim a um lo. May thla thawkin nihin tiang voi 193 kan i kap cang” tiah a ti.

Voi 100 leng i kahnak ah ralhrang bu 128 an thi, 180 hriamhma an pu, Mawtaw 9 kan hrawh, thil phorhnak ah an hman mi Raang 12 a thi. Kanmah lei pahnih an nunnak a liam ve, Minung pakua hma kan pu tiah Lt.Col. Saw Kale Doe nih a ti. Ralhrangbu lei nih khuachung le Dum/lo ah meithal ngan lung 98 an kah, inn 5 an hrawh, Takawtha khua ah inndong 40 leng mei in an khangh i thilri le facang hna an lak piak hna tiah theih a si.

KNU Brigade 5 ah a cawlcang mi ralhrangbu hna cu “MOC 5 tang LIB 405, 407, 408 le BGF battalion 1103, 1014, 1011, 1018 le 1019 hna an si. Atu ah LID 44 tang battalion pawl zong Bilin leiin an rak kai tiah kan theih, minung le tatyin pawl tu cu fiangin kan chim kho rih lo tiah KNU nih a chim. May 24 le 25 ah zong BGF pawl he i kahnak a um than. BGF lei an hruaitu he minung 3 an thi, 11 hma an pu tiah theih a si. | Credit: The Chin Post

Hlanchan tein ngeih mi Pupa Ro Lai Meithal chuh cu ka ngaithiam kho lai lo: Laipa: Chinram ah Chin miphun nih hlan kan pupa chan in rak ngeih mi rosung, Lai Meithal chuh le laakpiak cu zeitihmanh in ka ngaithiam kho lai lo, tiah Chinram le Mizoram ramri khuasa Laipa pakhat nih a chim. SAC phu nih nawlngeihnak an laak hnu Chin Ramkulh khuapi le khuate ah meithal le hriamnaam dangdang chuh le laak a um ca ah atu bantuk in upa pakhat nih a chim hi a si.

“Kan hngalh cio bang, kannih Chin miphun cu midang kha an thinhunter le i sikvelh tik ah hriamnaam, chai, fei le naam, meithal tibantuk a baan (la) mi kan si lo. Ramvaihnak ah kan hman mi a si. Cun, hlanchan ah Chinram tuupi chung hna ah sahraang an rak tam i mah pum i vennak zong ah hriamnaam hman a si. Midang harnak pek nakding ah hman mi a si lo. Ro a si caah felfai tein kan kenkawi mi a si. Cucaah, kan khuaram tiang ra in an hung kan chuh ahcun ka ngaithiam kho hna lai lo,” tiah upa pakhat nih The Hakha Times ah a chim.

Hlanchan zong ah meithal chuh hi a rak um lo i cheukhat cu license zong tuahpiak a rak si. 2021 May 25 zong ah Falam Peng Lumbang khuami meithal zuun 20 tluk cu SAC ralkap nih an inn luhhnawh in an laakpiak hna, tiah kan theih.

Be the first to comment

Leave a Reply

Your email address will not be published.