Kawlram Buai Nak Ah Hin Ram Dang I Rawlh Hna Sehlaw, A Cang Hna Ding Mi Cu.?

Kawlram buainak ahhin ASEAN, EU le UNO hnakhaw tiang a phan dih cang. Vawleicung Political Platform ah Democracy le Communist idohnak ai thoknak zong si khawh a si. Social Media hmangin mipi tampi nih US le UN ttanpinak an hal. Protester hna nih Embassy kutka hram ah khattthup in an dir peng fawn. Kan ram ah ralkap le CRPH cu an isual cuahmah. A hodah ai tei lai? Mipi le ram tthithruainak mumal tak a um lo.

Mipi tampi nih 1988 thok khan ramdang ralkap rak lut dingin an iruahchan cang.Rak irawlh taktak hna sehlaw, zeitindah a si lai? Ka zumhning he a vai khat lo ve. UN irawlh in ralkap van thlah hna sehlaw, a si lo le US le a hawikom ram pawl nih thahrum hmangin rak kan luhhnawh hna sehlaw, kan dirhmun ding kan fiang maw? Ralthuam hmangin UN ralkap le tualchung Arm group pawl idohnak ning kan thei bal cang maw? Thil si kho phun nga in ka van chim lai-

1.UN a rak luh rual in ralkap nih noh a sauh colh lo ahcun ral ram kan si colh lai. Raltuknak nganpi kan hmaika ah a um colh lai tinak a si. UN nihhin ralkap bik a ngei lo. Ram kip ralkap, miphun kip cawh, misual le suallo he an rak lut lai. Mipi lakah ralkap lei ttang le Demo Activist an thleidang kho ti lai lo. Ram cheukhat bawmhnak rinhchan in kan ralkap zong an cangai khur chungah an ttan ve lai. Cu ruangah denlung le sobul kar ah khua kan s alai. Retheihnak le harsatnak phun kip vialte kan ton hna lai.

2.Tlangcung hriamtlai pawl cu hmaitli ah an hman hna lai. Annih nih ruahchannak nganpi nei in an rak domhtlaih hna lai. Federal duh le confederate duh, Independent si ai timmi kan um tthup rih fawn hna lai. Cu ahcun tualchung buainak a chuak rih lai. State ramri le miphun, biaknak ramri thleidan thiam a herh ngaingai lai. Kan ram Map cu kan iruahlo ningpi in ai dang kho.

3.Ralkap kuttang ah kunnak cun zei paoh cang seh, kan tu le fa hna ca kan zoh deuh lai” ti hi mipi tam deuh ruahnak a si zumh a um. Ramdang ralkap an rak luh ruang ah retheih harsatnak cu kan ihuam deuh tuk khawh men. Khuate mi, rethei harsa taktak hi cu ruah tuk awk an um lai lo. Khuapi mi, mirum le mi lian pawl nuam cen in khua a sa tawnmi pawl hrem hmun an tluk a hau lai.

4.Vawleicung hmun kip ah cuhlan ah UN le ttangrual pawl ralkap an luhning cu Terrorist le ram ralkap buainak hi a si tawn. Kannih ram cu ralkap le mipi kar, Democracy le Dictator idohnak a si fawn lai. Cu ruangah ramleng ralkap a rak lutmi hna zong nih ruahnak ttha ngei in, mipi humhalnak tim in le Politics buainak lawng cinfel tim in anmah hlawknak um loin an cawlcang kho men ko.

5.Kan pule pawl nih thil tampi cu an ruah ve lai tiah hei ruat ve hna usihlaw, A chia bik dirhmun zong huam in an tuah cia cangmi thil ah chawntalol in hnukir loin an um kho ve. Cuti a si ahcun kan Pi bik le a mipi bochan deuh pawl hna hi cu kan sung ve kho men mi an si. Hi ti van ruah hrim ahhin an caah thinphang ngaingai a si colh. Vengtu ralkap an ingeih ve lo.

CDM hi hlawhtling hram seh, ralkap lei hi ilet thut hna she, Democracy ram thar dirh dingin tlangcung mi vialte lungrual kho ve hna sehlaw, tualchuang buainak neuhneuh pawl dih fawn sehlaw, Pathian zeizong te kan sersiam piak hram seh ti hi ka thlacamnak a si.

Be the first to comment

Leave a Reply

Your email address will not be published.