Khah A Hlei In Nu Nih Ralrin Ding Hi Nu Thil Tawnmi Kong Lam Theih Cu Thinlung Nih A Celh Hrimhrim Loh Mu Share Ve

Hi ti ka thil ton mi hi cattial thiam mi ka si lo caah zeitin fiangfai deuh in vun ttial daan zong ka thiam lo i nan ka theihthiam naak lai kan nawl hna. Cun ka ton mi thil ka pasal le a nu nih zei ah an ka rel lo ning le kut a kan thlaak daan le an ka nihsawh daan hi phone in ka type caah a rau deuh i ka harsatnaak chung i ka tuar khun deuh naak lawng ka rak i phuang lai.

Social media ah phuan lo hin cun a ho sin hmanh ah phuan naak ka ngei lo i la thinlung fah a dam deuh naak hnga le keimah kong a rel i a thei tu hna nih hin nupi pasal kongah raalrin zia nan thiam chin naak hnga tiin ningzak bu piin ka rak ttial mi a si tihi nan ka theihthiam naak lai kan nawl hna.

kan nih chungkhar hi minung pa 4 kan si i, kei le ka upa le ka nu le ka pa hi khuasa mi kan si hna. kei hi kan hngakchiat lio tein cawlcangh a huam mi le pa bantuk in zeithil poh a tuah mi ka si i ka nu nih hin Nu deuh dingin a ka cawnpiak tawn. ka nu hi chungril lei damlo naak a ngeih caah zeihmanh a ttuan kho ti lo i,kan innchungkhar a kan zohkhenh tu bik cu ka pa le ka upa hi an si.

ka pa hi a kumkhua cu a upa ngai cang nain chungkhar caah ttuan loin um awk a tthat lo caah ttuan awk le hlawh awk a um mi poh a ttuan mi  a si i kan khua hi khuate a si caah Ka pa le ka u nih cun Lo hi ttin 3 hmun hrawng an tuah i kan lo ahcun sianginn khar caan te te ah ka u le ka pa cu ka va zulh tawn hna.

kum 14 ka si cun zeirian poh ttuan a huam mi le pa nih an tuah khawh mi poh cu ka tuah khawh ve lai tiin rianttuan a zenh lo mi ka si i ka u le ka pa cu sianginn kan khar caan ah lo thlawh cu ka bomh tawn hna i kan pathum in hmunkhat te ah lo kan thlawh cun kan i nuam hna i tha baat zong kan hngal tawn lo.

Vaanchiat ah kum 2014 ahkhan ka nu nih cun chungril lei damlo naak in a kan thih taak i kan pafa rual cun ka nu zuun cu sau tuk chung kan tuar i ka upa hi zu le riit naak phun pawl hi a tawng bal lo mi a si nain ka nu nih a kan liam taak hnu cun zu din a hmang i hawikom ttha lo a komh hna.

ka pa he hin cu ti ka u a um cu poi kan ti tuk i a nemnaak tein ka u cu na tuahmi thil hi a ttha lo tiah kan chimh tawn. Ka u hi a tthat ve naak cu zu an riit zongah buainaak siam a duh lo mi le nu le pa a ttihzah mi a si caah kan innchungkhar ah hin buainaak zeihmanh a siam bal loh.

Ka u cu kum 30 a si cang i ka pa he nupi ngei dingin kan forh tawn i nupi ngei cang seh ti kan duh piak mi cu a theih caah kan khua nungak lak i bochan ngai mi pakhat cu nupi ah a tthit i cu caah inndang ah an kan chuah taak i kei le ka pa lawng nih kan ruun inn cu kan hngak.

A caan ahcun ka pa he kan pahnih te cun kan lung zong a leng ngai tawn. kum 15 ka si ahkhan tang 10 ka awng i 2017 kum ahkhan tang 12 ka kai ve. Ka sianginn kai naak ahcun tlangval pakhat nih hin a ka ngiat deuh peng i kei hi ka thinlung ah tlangval ngeih duhnaak zong hi ka ngei lem lo i sianginn ttha tein kai i rian ttha ttuan i ka pa keimah cu lunglawm tein khuasak hi kai tinh bik mi cu a si.

Kan khaan cung ahcun tlangval pakhat nih cun a ka helh hum peng i an chungkhar sining ka hlathlai i mirum ngai mi chungkhar an si ti cu ka hngalh i cu pin ah hngakchia cem a si ti zong ka theih chap fawn. Cu ti nichiar in kan i hmuh caah le thil phun phun in a ka duhdawt naak a langhter lengmang caah kei zong nih cun darling caah ka duh naak kong cu ka chimh ve.

cu ticun thla 3 chung hrawng kan i duh hnu ahcun kan hawinu birthday lomhnaak ah kan pa 2 cun an kan sawm ve i kan va kal ve, Birthday lomhnaak cu zaan ah kan tuah hna i kan hawi nu i a chungle hna le a nu le a pa nih cun hna kan hnawh sual hna lai an ti caah inn cung ah an kan ih taak i inntang ahcun kan hawinu birthday cu kan lawm hna i pa pawl hi zuu an ding deuh ngawt hna i ka darling zong cu a ding ve i a za in a kai ngai ngai.

Cu ti zu a kai pah ruangah cun kan hawinu sinah cun an inntang i room pakhat ahcun keimah le a mah lawng caan hman a duh naak cu a va chim i ka hawinu zong cu mi thinlung ttha ngai a si caah ihnaak khaan pakhat ahcun ka darling he cun caan ttha an kan pek. Cu ti kan mah pahnih lawng kan um caah kan tuah bal lo mi thil cu a voikhat naak cu nuam ngai in kan tuah. Cu ti nupa nun kan hman mi cu a kan lem caah nupa nun cu caan ttha ka ngeih caan poh ah kan tuah leng mang.

Cu ti thil kan tuah lengmang ruangah nau ka pawi ti cu kai theih. Cu hnu cun ka um daan ai dang thut i rawl le meh ka duh tawn mi zong a fih in ka fih hna i cu ti ka um cu ka pa a lunghring i nau maw na pawi tiin a ka hal i chim lo awk a tthat lo caah ka pa cu thil sining cu fiang tein ka chimh dih i ka pa nih cun Vawleicung ah a um mi lio mi kan si caah hi bantuk thil cu kan ton awk a si ko tiin aw nem tein a ka hnemh.

Thla hnih ka si hnu ah ka darling cu nau ka pawi thlahnih a tling cang tiah ka chimh tik ahcun cikkhat te cu keimah fa a si lai loh tiin a ka leh nain a hnu ahcun a fa ka pawi ti cu a pom in a cohlaan ve tthan. Cu ti nau ka pawi lio a thla 3 naak ahcun vaanchiat ah ka pa nih hin mual a ka liam taak ve i kai hngakchan ding cu ka u lawng a taang cang i ka ule nupi fale he khuasa mi a si caah zeihmanh hna hnawh naak pek ka duh lo i cu caah nau ka pawi ti cu ka darling a chung le sinah theih ter dingin ka darling cu ka nawl.

Naute thla 4 chung a luh lio ah ka darling te inn ahcun kan va kal i a nu le a pa an rak um lio te a si i nau ka pawi ti cu kan chimh hna tik ah lunglom tein an ka cohlaan i palai an thlah hna hnu ah puai cu an kan tuah piak. Ka u hi ka nu thih siseh,ka pa thih naak le keimah ka thil ton mi kongah a lungfaak in a ngaih chia tuk i zu lawngte a rak ding i pasal ka neih ni zongah hin rak raa kho loin thonginn chungah a rak um.

ka pasal le chungkhar i nu pa 2 le pa 3 an si hna i kan pa hi a hngakchia cem a si i a u le nu 2 cu pasal an ngei cang i inndangah ah an chuak cang hna.pa lak i upa bik zong cu nupi a ngei mi asi i a nu le a pa sinah hin an um ve hna. kan i umh ka thlakhat chung hrawng cu a nu nih hin pa ngai in a ka zoh i a ka dawt nain thla 1 hnu ahcun ka nu cu ka cungah a ziaza ai dang i nikhat ah voikhat voihnih cu a ka sik i a la hrocer deuh peng. Ka pasal a pa hi cu mi ttha le mifel a si.

A si nain a nupi hi a ttih caah keimah hi chanh a ka duh ko nain zeihmanh a chim ngam loh. kan pa hi le hngakchia cem a si caah a thinlung hi a puitling kho lo i cu ti a nu nih a ka sik i kut a ka thlaak lengmang zong cu a nih nih cun a thei rih loh. zaankhat cu kan ih pah in a nu nih a ka nihsawh ning le kut a ka thlaak tawn ti cu ka chimh i cu cu a thaizing ah a zurit lung in a nu kong ka chimh mi cu a nu le a pa sinah a va chim viar.

A nu cu ka cungah a letkhat in a thinhun a zual i ka pasal hi le a duh poh in a nu nih a control khawh mi a si caah keimah lei ah ttanglo in a nu lei ahcun a ttang peng i, an nu fa hin a thli in kut an ka thlaak lengmang i a ho hnemtu ka ngeih lo caah keimah te cun nichiar ka ttap zungzal.

ka pasal i a u ciah pa hi nupi a tthi ve i a nupi hi Nurse a si caah ka pasal nu nihcun a ka nek chin chin i kei zeihmanh thiam mi a ngei lo mi le a fapa nupi Nurse he cun a ka tah tthimh tawn i a ka hmuhsit lengmang. asi nain an monu thar hi mifel le mittha a si caah caan tampi cu na ngaihchia hlah thil hi that lei panh in ai thleng ve te ko lai tiah a ka hnemh tawn. ka pasal le a nu nih cun an chung le midang theih loin kut cu an ka thlaak lengmang.

zeihmanh thiam mi ngei lo inn lei rian zong zeihmanh tlaam tlinh lo tiin an ka nih sawh i diriam tak in bia ttha lo lo in an ka ti lengmang.Zaankhat cu kan ih lio ah kan pa cu bia ka hal i zeiruangah dah na nu nih hin hi tluk in a ka huat i nangmah zong nih hi tluk in na ttanh tiin ka hal i ka nu hi zunthlum zawtnaak a ngeih ruangah a thintawi mi si i ngaithiam ko tiin zei poi lo nawn khin a ka leh.

ka lungfah naak le ka hrasat naak cu kan pa hmanh nih a ka ngaih piak duh lo caah a ho sin hmanh ah chimphuan naak ka ngei ti lo i cu caah ka lungfah naak le ka tuar naak le ka pasal a nu nih ka nihsawh naak cu ca tlaap in ka ttial i ka chanhtling tang ah ka chiah. ka cattial mi cu kan pa nih a rak hmuh i a nu le a pa sinah cun a va rel piak dih hna, ka ttial mi a tam u cu a nu tthat lo naak le a ka nihsawh naak deuh lawnngte a si caah a thinhun a zual tuk i an inn chung cun lengah a ka chuah.

Cu ti a ka tthawl caah kan inn tthing ahcun keimah lawng khua ka sa i kan pa nih hin a rak ka zulh ve i ka sinah cun a rak um ve. A si nain a nu nih hin a phun phun in a thlem i n arak lawi ahcun motor kan cawk piak lai, Bike thar kan cawkpiak lai ti bantuk pawl in a lem sawi caah kan pa nih cun a ka chuah taak tthaan.

nau hi thla sarih a tlin ah ka neih i fapa te ka hrin caah ka pasal i a pa cu a rak i lawm tuk i kan inn ahcun a rak kan leng i ka fapa cu heh tiah a rak pom cawi i a rak lomh tawn. Cu ti cun nau te ka ngeih piak hna caah an inn lei ahcun rakkir tthan dingin an rak kan laak  i ka pasal le inn ahcun kan lawi tthan. hi lio ahhin ka upa hi zu a din tuk naak ah a nunnaak a rak liam i a nupi hi pasal dang a ngei cawlh.

An fapa te cu kan mah sinah a rak chiah i ka u fapa kan sinah um ve cu an duhlo caah fa ngeikho lo mi nuva hna nih an rak kan hal i kan pek hna. Cu ti ka pasal le inn ah kan kir hnu cun kan pa hi zu a ding zungzal i kei zong ka lungfah tuk ah zu cu a thli tein ka ding ve lengmang i ka pasal nih hin a ka duh lo ka fapa lawng hi an chungkhar dihlak in an duh mi cu a si ti cu ka fiang chin lengmang i, ka thinlung fah celh lo ah naute cu an sinah chiah i kei cu hmundang pi ah i tthial i ka nun cu a thar in sersiam tthan cu ka duh caah ka pasal le a chungkhar hna sinah cun naute cu ka chiah i rianttuan awk a um an ti i ka va zoh ta lai tiin ka chimh hna.

Rianttuan naak kong a si caah an pitar cem nih cun rian ka ttuan cu a duh tuk caah va kal zawk ding cun a ka fial.Athli tein ka bag chungah cun ka thilpuan ttha deuh cu ka khumh i inn cu ka chuah taak i zeitik hmanh ah an sinah rak kir thaa n ti lo ding in le ka sianlo tuk mi ka fapa zong hmuh tthan ding ruahchannaak zeihmanh ngei loin mitthli tla le lungkuai in an ka hmuh khawh ti lo naak hmun dang ah kai tthial.

Cu ka ahcun ka nun cu a thar in ka vun i sersiam i ka lungfah naak le ka fapa k angeih naak cu nikhat hnu nikhat in an reh ve lengmang i a tu ahcun kan ca hrangah a ttha bik mi pasal ka ngei ve cang i fa zong pakhat kan ngei cang. Hi ka ton mi ka harsatnaak hmang hin nupi le pasal nan kawl tik ah raalring tein rak kawl ding in le nupi ttha pasal ttha ngei dingin nan dihlak duhsak naak he. Crd:Nunui Cinzah