Khah Ka Nunnak Hi Nangmah Caah Kan Pek Timi Thawngtheih Cu Uar Um Bak Ko

CDF ah ka lut. Ka lungchung in khua ka ruah mi pahnih a um. Cucu, kei cu ka nung in ka kir ti lai lo, ka thi ko lai ti le kan kan ral hi fawi ah kan tei lai lo, a tei zong kan tei lai lo khoi men, ti hi a si.A sinain miphun ai-awh in ka nunnak ka pek khawh i, dothlennak ah kan tel khawh hi van that ah ka ruah ko.

Caan tlawmpal ah kan hawi le CDF pawl cu Malaysia kal na leh, India lei ah kal na leh. Kei zong ka chungkhar nih CDF in chuah i hmun dangdang ah kal ding in an ka fial ve nain ka duh lo. A ruang cu, CDF ka luhka kuanfang hang din in bia ka kammi le ka lungfah tuk i CDF ka luhnak hi a sawhsawh si ter ka duh lo.

Kan ral hi kan tei lo hmanh ah ka nunnak dih ko seh tihi ka biakam a si. Cu biakamnak cu Ralhrang nih uknak an lak ka te i mipi hna nih ram pumpi i lam an zawh i duh lonak an langh ter lio ah, mi pakhat nih USA embassy hmai i, SAVE MYANMAR, WE PREFER DYING TO LIVING UNDER DICTORSHIP timi catar i ken i an auh lio ah, hihi ka hmui timhmi cu a rak si. Cu caah ka hawi le CDF vialte nih ka chuak tak hna in tlau viar hmanh hna sehlaw keimah pakhat lawng ka tang ko lai. Keimah pakhat lawng ka tang bal fawn lai lo. CNA an um ko caah ka hna ngam ko.

CDF hi kan tam ngaingai. Mi fel an um ban tuk in, mifel lo zong an um ve. Mi hrawlkhawl le eihmur hman an um ban tuk in midingfel le mittha an tam tuk thiamthiam ko. Soiselnak a tam ngaingai ko. Cucu nga pakhat nih nga zapi a thutpi timi kha a rak dik taktak hme hi ka ti. Ral tuk a ngamh lo an tam tuk ban tuk in thih ngamh in raltu kan tam tuk thiamthiam ko.

Cu caah sining aa khat lo mi nunnak lamthluang ah ram a khelmi kan si. Hihi mi zapi zong nih kan theithiam piak uh ti ah saduh kan that tawn. Cu caah kei ka nunnak cu kanram le kan miphun caah ka thap.Crd.. Global Chin Village News

Thawngdang, Tuchan cu a thangcho mi chan a si cang i ram sifak tete zong ah mino tampi nih ramdang (ram thangcho) nunning kan cawng cang hna i kum (18) ka tlin cun ka duh poah in ka nung lai keimah nun (it’s my life) ti rumro in ai la mi mino tampi kan um cang lio ah Mizoram i TV host tu pakhat asimi nungak Baryl nih a pasal ngeihlo nak kong a chim mi cu mipi thinlung a lak i thangthat a hlawh ngai ngai.

Mino tampi nih kum (18) ka tlin cun ka duh le pasal ka ngei lai i ka duh le living together in ka duhmi pa he poah ka um kho tiah nun zalen ngai in thinlung an pu i an nun lio ah Baryl nih cun kei cu ka duh poah in pasal ka ngei kho lo , a ruang a um i cu thil nih cun pasal ngei colh kholo in ka nun i a siam i ka thinlung hi a uk tiah a chim .

Baryl hi cawn nak lei zong ah Master degree tiang a la mi a si i, a mah hi atulio mizoram TV host ah mipi uar bik mi a si. TV host rian a tuan nak ah a rian felfai tein a tuan khawh pin ah biachim holhrel a thiam i a mui aa dawh fawn tik ah Tv host lawng silo in programe lian deuh a um caan poah ah cun a mah peng hi an sawm i an hman mi a si .

Baryl nih cun pasal a ngeih duh rihlo nak kong hi ti hin a chim.Kei cu keimah duh in hi vawlei cung ah hin a rak chuak mi ka si lo i a pakhat nak ah Pathian thawngin a si i a pahnih nak ah ka nulepa thawngin a si .Ka nu nih thla (9) chung harsa ngai in a ka pawi i thihnak tlang ah dir in a ka hrin .Cuhnu ah an ka cawmken i fimnak cawn nak lei ah phaisa chawva tampi dih in an ka cawnter.

Ka cung ah ruahchan nak tampi an ngei ve i ka cawnmi fimnak ka chuah khawh tiang a herhmi chawva in siseh nun cawnpiak nak in siseh, thazang peknak in siseh an ka dirpi .Ka cawn nak cu ka dih kho ve cang i ka hung puitling cang .Asinain ka kum a tling cang i ka puitling ve cang tiah keimah ca lawng i ruat in ka duhmi pa sin ah ka kal colh kho hrim lo.

A ruang cu pasal ka ngeih a si ah cun ka pasal le a chungkhar ca ka si cang i ka tuan khawh zong ah an mah ca a si cang lai .Cucaah cun a ka hringtu le a ka cawm kengtu , fimnak cawn nak ah phaisa tampi ka caah a dihtu ka nulepa caah hin thluachuah tampi a phurtu si ve ka duh rih i an ka dawtnak cu ka cham kho hna lailo nain ka lung diriam tein ka nulepa hi dawt ve i zohkhenh ka duh ve rih hna caah pasal ka ngeihlo nak hi a si tiah a chim.

Hi a chim mi bia hi mizoram mipi nih an uar chin chin i nu puitling taktak pei a rak si tak hi tiah an thangthat cio.Hi a thinlung put le a nunzia hi kanmah laimi zong nih i cawn awk tlak taktak a si ve fawn .Nulepa nih harsa ngai in a kan cawmken i a kan zohkhenh hnu ah kan mah duh in kan duh mi lam kan zul i kan nulepa hnu chit colh timi hi fakpin khua ruah ah cun a diklo ngaimi biakhiahnak a rak si timi a langhter ngai ngai .

hi ca hi na siaherh mi minung kha theihter ve na duh ah cun comment nak ah an min ten rak mention ve cio hna, an herh cio ko. Asikhawh cun rak share ve hram law mino tampi nih rel ve hna sehlaw hringtu nulepa le cawmkengtu nulepa hna nih hrinmi fale hmangin lomhnak hmu cio ko hna seh.