Khah Pasaltha Hna Nih Cun, SAC Ralhrang Hna Cu An Vun Teithluah Mah, Canghna Hih.

2022 April 11 – Myanmar ram hmunhma 10 cu mipi hriamtlai phu PDF nih an tlaih khawh tiah NUG Ministry of Defense Permanent Secretary U Naing Htoo Aung nih a chim.

NUG Ministry of Defense nih a thanhmi mipi dothlennak report ah PDF nih an tlaihnak hmunhma ah caan karlak mipi uknak kan dirh khawh cang, timi biafang an telhmi he pehtlai in Mizzima nih an halmi a si.

Mipi hriamtlai phu nih an tlaihnak hmunhma hi a tutiang cun 10- 15 hrawng a si lai. Mah hmunhma pawl a feh khawhnak le hmunhma kau deuh kan tlaih khawhnak hnga kan i zuam lio a si, tiah U Naing Htoo Aung nih a chim.

Mipi hriamtlai phu pawl nih an tlaihnak hmunhma hna cu Sagaing ramṭhen, Karenni ram, Chin ramkulh, Magway ramṭhen chung hmunhma cheukhat hna an si. Cuka hmunhma hna ah caan karlak mipi uknak caah Ministry le Central Committee pawl dirh a si tiah a chim.

Tlangcung miphun hmunhma hna ahcun, a rak um ciami tlangcungmi uknak phung pawl hrambunh in tlangcung hriamtlai phu pawl le an nunphung le an tleihtleng sining uknak pawl he tamtling tein tawlrel khawh kan i zuam tiah U Naing Htoo Aung nih a chim.

2021 September 7 in thok a simi mipi dothlennak caan chungah mipi hriamtlai phu pawl nih tlaihnak hmunhma hna ah mipi uknak dirh khawh a si bantuk in, Yangon, Mandalay le Naypyidaw khuapi hna ah chikhat kahdohnak Python ṭha tein kan tuah khawh tiah Ministry of Defense report ah an langhter.

Thawng pang dang, April 11 – Magway ramṭhen, Pakokku peng, Zeetaw khua cu SAC ralkap nih April 10 zaan 8:30pm hrawng ah an luhhnawh hna i mei in an khangh lengah mipi 70 leng cu an tlaih hna tiah Yangon Khit Thit nih a langhter.

Cu SAC ralkap phu pawl sinah palik le pyusawhtee pawl an i tel. Pyusawhtee pawl lam hmuhsaknak in khua chungah an lut i Zeetaw sianginn ah mipi 70 leng an tlaih hna tiah a langhter.

Zeetaw khua cu SAC ralkap pawl nih mei in an khangh. Mipi hna cu himnak ah zaam a si. Khuachung sianginn ah mipi 70 leng tlaih an tong. A tangmi hi cu himnak ah zaam dih a si. Inn pawl zong an thlok i a ummi poah an i lak dih. A rawkmi le kan sunghmi hi zeizah dah a si cu theih a si rih lo.

tiah khuami pakhat nih Khit Thit ah a chim,Zeetaw khua hi inn 250 leng khuasa an si i SAC ralkap nih khua taw lei in khangh hram an thok tiah aa ṭial.