Khah Relveh Uh Hih AA Armynih Cun UICO Pawl He Kahdohnak Biatak Tein A Chuah Lai Ca Ah Mipi Ralin In Um Ding In

Rakhine Ram Buainak A Chuah Ahcun Rak Kan Mawhchiat Hlah Uh Tiah Zaw Min Htun Ai Hrocer. Arakan(Rakhine) ramkulh ah kahdohnak a daih nakhnga biatak tein kan i zuam i, hiti buin kahdohnak le buainak a chuah ahcun rak kan mawhchiat hlah uh, tiah SAC chimphuannak nawl ngei Zaw Min Htun nih hrocernak bia a chim.

Arakan Army (AA) lutlai General Htun Myat Naing nih Online chung in SAC ralrin a pek hna le SAC nih sawm mi tonnak ah kal loin NUG he tonnak tu an ngeih ruangah atu bantuk in SAC nih lehnak an tuah hi a si. Rakhine ramkulh chung ah AA nih ukhruainak hna an kan hnawh i Regional Military Headquarters ralrin pek le hrocer kan ton caah hihi raltuk an kan sawm a si ko, tiah SAC nih cun a ti.

AA he kan i kahlonak a ruang hi Rakhine mizapi zawn kan ruah caah thinsau tein kan i innak a si tiah an ti fawn. Rakhine ramkulh chung ah SAC nih ralkap thazang tampi a chap caah zeitik poh ah kahdohnak a chuak kho, tiah AA nih May 15 ahkhan mizapi ralrin peknak cathanh an rak chuah ve. Source: The Chin Post

Relchap, Russia nih Ukraine a luhhnawhnak thla 3 a si cang nain, sunghlei nih a hmel cuahmah cang i, a nak in a ngandeuhmi NATO nih amah (Russia) a hmuhning zong a tha ti lo, cun Sunday in khan cun a ral Ukraine nih a nawr ngai cang i, raltuknak hmunhma in doi le zaam lawngte a rian cang, tiah theih a si.

Berlin ah NATO chief cu NATO top palai nih an ton i, Moscow tinh ningin hi ral hi a kal ti lo, tiin thanhnak an tuah.

Hi ral hi Ukraine nih a teikhawh ko. Kan dihlak in Kyiv hi pehzulh in hriamnaam kan bomh hrimhrim a hau, tiin NATO Secretary-General Jens Stoltenberg nih a chim. Covid-19 in a dam ka te lawng a si caah TV in meeting a kai.

Russia nih a kham len hna nain, Finland le Sweden cu NATO luh ding lawng khua an khang cang. Ukraine luhhnawh a tonmi nih kan Europe himbawmnak tampi a lehthlen cang caah, NATO ah kan lut lawlaw cang lai, tiin Sunday ah khan Finland nih thanhnak a tuah. Cu ti an thanh tlawmpal a rauh ah Sweden nih NATO luh ai timhnak kong a thanh colh ve.

Nordic ramhnih ningin NATO an luh a si ah cun, Cold War hnu i Eastern Europe ah NATO nih a member karhter a timhmi hi Russia hnursuan duh bia a si, tiin a titu Putin caah thilbuai ngai a si te, kho ti asi.

Ukraine nichuahlei ah Russia ralkap kan dawi khawh hna. Russia nih Kyiv la kho lo in a um ruangah Ukraine a tuknak a lohma hi dawkawng tluk in a hnum cang, tiin Western officials nih an chim.

Eurovision hlasak zuamnak i teinak an hmuhmi cu Ukraine nih a lomhpi lio pi a si. Stefania timi hla cu tlangparsang hla le rap cawhhrup in an sak. Cu hla cu ral thawh lio ah a lar ngaingai. Tutan hlasak zuamnak i pakhatnak hmutu kan si ruangah hin kumvui cu kanmah nih tluninn kan don lai, tiin Zelensky nih biakamnak a tuah.

Kar khat hnu khar khat in luhhnawhtu hna hi Ukraine vawlei in kan thawl cuahmah ko hna tiin Zelensky nih a chim.

Kan musicians pawl zong khua an kir le cangka raltuk dingin an i ready colh, tiin hlasak zuamnak ah hmai in mi a hruaitu Oleh Psiuk nih news conference ah a chim. Kum 18 in 60 karlak pa paohpaoh cu a ram chuahtak lo dingin Ukraine cozah nih a kham hna. Asinain, hi hlasak zuamnak ah ai telmi pa 6 hi cu an ram aiawh in Italy ah i zuam dingin a hleice in onh an si. Khua an kir in cun luatnak caah ral an tu ko rih lai.

Ukraine ram pumpi ah sehzung a tamnak bik Donbas ah Ukraine ralkap le Russia ralkap biatak tein an i kap. Ukraine ralkap lakah hmuhton a ngei tambik le hriamnaam thabik ai ngeihmi a ralkap pawl nih Russia a tanhtu hriamtlai pawl a doh hna nak hi kum 8 a si cang.

Sungh lawng a rian ko nain, Russia nih Ukraine pumpi ah thahnawnnak le inn le lo hrawhpiaknak lawngte a kalpi ko rih. Kan hnung zarh ah khan Ukraine chemical sehzung pakhat le Siverodonetsk, Donvas ah a ummi inndot sangpipi 11 a hrawh hna, tiah Gov. Serhii Haidaii nih a chim. Bomb nih civilian pahnih a thah hna, vawleitang ah i dup dingin mipi ralrin kan pek hna, tiah a chim.

Poland ramri ah a ummi Yavoriv i ralkap inn le lo zong Russia bomb nih a hrawh hna, tiah Lviv governor nih a chim.

Lviv hi Western pawl nih Ukraine sin hriamnaam an kuatnak lampi a si. Donbas chungum Dontesk ah Russia pawl cu kan tei hna, tiah Ukraine lei nih an chim. Izyum pawng tiangin Russia nih hmunhma nawr ai tim ko nain, Ukraine ralkap nih an kham khawh hna, tiah Kharkiv governor Oleh Sinegubov nih a chim. Ukraine lei nih an chimmi hi fehter khawh in a um rih lo nain, Western lei nih cun Russia dirhmun an zoh tikah si dawhdang in an chim.

February i Ukraine lei a kuatmi a ralkap lakah cheuthum ah cheukhat tluk cu an thi cang i, hmunhma ngan ngaingai a lak khawhmi a um rih lo, tiah Britain defense ministry nih a chim.

A tu ning te a si ko rih ah cun, hihnu ni 30 chung zongah Russia hi hlawhtlin dawhdang a si thiam rih lo, tiah BDM nih a chim.

Russia ralkap pawl Kharkiv hrawng i hnungtolh lawng an renh in khan cun Russia nih ral a tuk dan biatak in cuaithlai khawh a hung si cang. Cuhlan ah cun hi khuapi hi fakpi in bomb in den a si i, a tu ah cun bomb thawngpang kan theih lo nak hi ni tamlak a si cang, tiah an governor nih a chim. Asinain, Kharkiv peng chungah a ummi kadang belte cu Russia nih a kah peng ko rih.

Cu ka i ral a tu pengmi Ukraine battalion pakhat zong cu Russia he an ramri lei tiang Sunday in khan an i thialkam cang i, Zelensky sin an kuatmi video ah teinak an hmuhnak kong a lang.

Cu an video cu Ukraine Ministry of Defense nih Facebook ah a tar i, a pia le a eng in ai telhmi intung pawngah Ukraine ralkap hlei 12 hrawng an cuang.

An ram a luhhnawhtu Russia he an i thennak hauka tiang an va kal i, ‘Mr. President, ramri kan phan cang. Hika ah kan um cang hih tiin an President cu thawng an hei thanh.

Cu ti bia a chim lio ah cun, a dang Ukraine ralkap pawl nih teinak aalan an hun thlir ve i an kuttum an thlir hna.

Kyiv a lak khawh ti lo in cun Putin cu Donbas ai hmaithlak cang i, Russia a tanhtu hriamtlak nih an lak khawh rih lo mi kiangkap hmunhma pawl lak ai tim.

Donbas in chaklei ah a ummi Azov Sea kam khua Mariupol tu cu Russia kut a phan ngawt cang. Amahbelte, Azovstal thir chuahnak sehzung ah hmunhma a khuar i a sungh a khan duh lo mi Ukraine ralkap dah ti lo cu, Russia kut an phan ngawt cang.

Mariupol ah a tang rih mi an pasal (ralkap) pawl chanhchuah dingin inn ah a tangmi an thaisung rual nih online news conference in global community sinah nawlnak an tuah. A chiakha tuk cangmi an va le an dirhmun cu hmanthlak in an suai i, tirawl, dinti le siiai an i tha ti lo, thlop lo mi hma zong septip an lut dih cang e, tiin an chim.

Thirchuahnak sehzung ah Russia nih khammi bomb a hman le hman lo hlathlai dingin raminn pa sihni pawl an kal, tiin Ukriane general sihni office nih a chim. Cu bantuk bomb (mei bomb) hi international law nih a onh ko nain, direct in mipi le ralkap cung i hman cu a onh lo, ti a si.

Azovstal hmun in hliamhma a pumi Ukraine ralkap pawl tilawng in vun thiar dingah kan duhnak kan langhter, tiin Turkey president aiawh biachimtu Ibrahim Kalin nih TRT ah a chim.

Ukraine luhhnawh a si hnu in cun, Russia ramri ah a ummi ram pawl hi Ukraine khawh in kanmah kan si te kho men, ti phun in an thin a phang ve cang i an lungre lawng a thei ko cang. Cu hna lakah cun Finland hi ai tel i, Russia he meng 830 ramri ai ngeihmi ram a si.

NATO luh nai timhmi cu ai palhmi thil a si, tiin Satuarday ah khan Putin nih phone in Finland President Sauli Niinisto a thihphaih.

A raminn pa Sweden zongah, Social Democratic Party nih NATO luh an duhnak Sunday ah an thanh cang i, cu an thanhmi cu Monday ah Parliament ah ceih a si lai, tiah theih a si. Cu hnu cun Cabinet nih an peh te lai.

Asinain, NATO nih zapi duhnak vote in thil an tuah tawn. A ruang cu hi Nordic ram pahnih NATO an luh ruangah Turkey a lungre an theih sual lai, ti an phang. Finland le Sweden nih Kurdish hriamtlai an dirkamhmi kong le Turkey sinah an hriamnaam zorh an duh lo nak kong i Turkey a lungre a theihnak kong NATO meeting ah an Foreign minister Mevlut Cavusoglu nih a chim.

Ukraine ah McConnell nih a GOP delegates pawl a kalpi hna. Ukraine an dirpinak kong langhter duh ah Saturday ah khan ruahlo piin Kyiv an va tlawng.Crd: Chelsea Bawi