Khrihfa Biaknak Lei I Mipi Nih An Upat Tuk Mi Pope Frencis Nih Sandah Piaktu Hna Kongah A Thin Hunnak Fak Taktak In A Chim Ve Cang.

Kawlram ralkap nih uknak alakmi cu vawlei cung nih upatmi hruaitu hna tiang an thin a phawt cang hna. UK Prime Minister pa le bang nih cun Kawlram mipi nih umkheng um in Civil Disobedience an tuahmi ka dirpi ti langhternak ah bongbong a tumnak hmanthlak in a langhter ve.

Tuzan lei cu Khrifa hruaitubik Pope zong nih Kawlram ralkap nih uknak a lakmi kong he pehtlaih in a lungput a langhter ve cang. Pope Francis nih cun Kawlram mipi an tuarnak ka tuarpi ve hna tiah a chim. BBC facebook page nih a tarlangh. Pope Francis cu nihin February 7, 2021 (Sunday) ni, pumhnak ah tu bantukin Kawlram kong a chim chih hi a si.

Pope Francis nih a chimmi cu, “Kawlram ah ralkap uknak lakmi dohkalhnak ah sandahpiahtu Kawlram mipi an intuarnak ka tuarpi ve hna” tiah a chim i, “Kawlram ralkap hna nih mipi thatnak ca ah an tuah awk le a tlinngmi democracy phung ning tein an i zuam awk a si” tiah forhfialnak a chim tiah theih a si.

Vatican City, Saint Peter’s Basilica ah Pope Francis nih tu bantukin a chim hi a si i, 2017 kum Kawlram a tlawn hnu in a thinlung chungah a cam pengmi Kawlram tu lio dirhmun cu thinphang buin ka cuanh ko ti in a chim tiah theih a si. BBC nih a tarlangh.

Kawlram ahhin a luancia 2007 kum, Shwe-wa-yaung sandahpiah puai hnu in, atu ralkap uknak lakmi duhlonak sandahpiahnak lawnglawng ahhin minung a sangsang in sandah an piah a si i, hi hnu zong pehzulh thluahmah kan piah rih lai tiah sandahpiahtu hna nih BBC ah an chim.

Ref: BBC

Be the first to comment

Leave a Reply

Your email address will not be published.