KNU Nih An Thawl Mi Pa Saw Ne Dar Mya Nih Ralkap Bur Thar A Dirh

KNU nih an thawl mi pa Saw Ne Dar Mya nih Ralkap Bur Thar A Dirh

KNU nih an thawl mi pa Saw Ne Dar Mya nih Ralkap Bur Thar A Dirh – KNU ralkap KNDO ralbawi sinak in an chuah mi Saw Ne Dar Mya nih Kaw Thoo Lay Amry cu felfai tein ka dirh khawn cang tiah mipi sinah theihternak a ngei cang i, KNU lei zongnih Saw Ne Dar Mya cu an chuah cang nak kong thawngthanh nak an tuah colh ve.

KNU nih hin ralkap phu hnih a ngeih hna i cu hna cu KNLA le KNDO an si. Cu hna tang ah cun ralkap phu tampi an um len ri. Saw Ne Dar Mya cu KNU ralkap phu KNDO ah hotu arak tuan lengmang tu a sinan , minung 25 ruangah KNU nih hin Saw Ne Dar Mya cu KNDO ralbawi sinak in an rak dinhter.Minung 25 an thah mi hna cu KNU ralkap KNDO hnanih an tlaih hna i mi ngia tu nan si, kan umnak pawngah nan ra i, kan sakhan cu athli tein niat hlai nak nan ngei. Cubantuk cu kan caah a him lo an ti hna caah an thah hna. Cu tikah ralhrang hnanih minung 25 nan thah mi pawl hna cu mi niahlai tu an silo, mipi menmen an si i, lam le hlei sersiam dingah ara mi an si tiah KNU hruaitu pawl sinah an ti hna. KNDO ralbawi Saw Ne Dar Mya cu mi 25 thihnak he pehtlai in mawhphurtu bik a si ruangah hremnak nan pek ding a si tiah ralhrang nih cun KNU sinah nawl nak an tuah.

KNU cunglei nawlngei tu hna nih cun can saupi hlathlai nak an tuah hnu ah, ralbawi Sa Ne Dar Mya cu KNDO ralbawi a sinak in an dinhter. Dinhter a si hnuah ralbawi Saw Ne Dar Mya cu ralhrang pawl lih chim sawhsawh le lih puhnak men i dantat nak cu ka cohlang lo a ti i, KNDO sinah aum rih i ralhrang doh cu apeh.Asinan, July 18 ahcun ralbawi Saw Ne Dar Mya cu KNU siseh, KNDO hotu pawl zong hi NCA lawnglawng buaipi i ralhrang doh a ngam taktak lo mi an si, cu caah KNDO chungah um hi arem lo, ralhrang pawl cihmih dingin doh hi kei I kaa timh mi cu asi, cu caah Kaw Thoo Lay Army kan dirh hi asi tiah mipi asin ah theih ter nak an ngeih i, ca thanh an chuah chih.

Ralbawi Saw ne Dar Mya nih Kaw Thoo Lay Army an dirh thawng an thanh hnuah KNU le KNLA zongnih July 20 ah thawng an chuah colh ve, Saw Ne Dar Mya cu KNU nih an dinhte nak kong le , Kaw Thoo Lay Army cu KNU le KNLA nih an theihpi mi asi lo nak kong zong mipi theihternak an ngei ve.

A tu lio hi cu Karen mipi an buai ngai i zei lei ah dah kan tan lai ti in an um. Dothlengnak ah acawl cang mi mipi pawl nih cun a takin ralhrang pawl a doh cuahmah tu Saw Ne Dar Mya cu an dirhpi nak kong cu an chim ve i Karen le karen lakah dohnak fakpi in achuak kho men ti hi phan aum tuk.

Ralhrang Mawtaw Bomb An Puah – Sagaing ramthen Mungzua Distick Chuang Oo myone chung lampi tluan ah akal mi ralhrang ralkap mawtaw pawl cu Chuang Oo PDF nih bomb an rak puah hna i, bomb a puaknak ah ralhrang 14 nak tam an thi tiah Chuang Oo PDF nihcun July 21 ah ca an chuah.

Chuang Oo PDF cu July 19 ah Mungzua in Chuang Oo leiah akal mi ralhrang rakap mipum 20 hrawng cu lamlak ah bomb kan rak puah hnawh hna i, ralhrang 14 an thih pinah hliamhma a pu mi an tam. Ralhrang mipum 20 hrawng cu ke in akal mi an si an hnu in azul tu ralhrang mawtaw cu a rawk i, ralhrang hliamhma pu pawl cu mawtaw 2 in an phur hna.

July 19, zanlei ah Aung Chan Thar veng i aum mi ralhrang minung 6 pawl bomb kan puah hna i an zaten in an thi dih. Ralhrang a thi mi hna an ruak  6 cu ralhrang minung 10 hrawng nih an phur i, bomb kan rak puah chih than hna tikah ralhrang mipum 4 an thi chap.July 19 thiamthiam ah Sagaing in Mungzua leiah akal mi ralhrang mawtaw 14 cu lamlak ah bomb kan rak puah i, ralhrang a thi mi zat cu kan fianh kho rih lo. Ralhrang mawtaw bomb kan puahnak hmun ahcun thisen le ralhrang mawtaw chiatnak pelpawl pawl a um tiah thawngpang kan theih.

Siangin Akai Lo mi  min Cazin An Lak – Ayeyarwaddy ramthen Zaluan myone ah ralhrang on mi siangin ah siangin akai  lo mi hngakchia pawl cu July thla zarh hnihnak in ralhrang lei nih min cazin an lak hna i fale siangin akai ter lomi nu le pa cu thinphang in an um.

Zaluan khua i um pakhat ni cun Khawbawi nih ahruai hna i Siangin kai lo hngaichia pawl min cazin an la cuahnah hna. Hmundang hin an tuah cio maw ti cu kan thei lo. Kan khua ahcun kan mithmuh hrimah  an min cazin an lak hna tikah hin nulepa pawl kan um a nuam hrim lo. Zei ruang ah ti ah cun, thil pakhat khat an tuah te lai ti hi  kan phan tiah khua mi nih cun an chim.Khaubawi lei ni an chim ning in asi ah cun cunglei nih an kan fial ruangah asi tiah an chim ve i atu tiang ah cun dantat le hremnak pek cu aum rih lo  nain , zeiruangah dah Siangin akai lo mi pawl min cazin hi an lak ti mi thei kan duh tiah mipi nih an hal len ve hna. Kan ram boruak cu umnak zong a tha ti lo. Zeiruang ah kan ti asi ah cun siangin akai mi nih an thin aphang i,  siangin akai lo mi zong nih kan thin aphang  ve. Khat lei khat lei in ttih anung mi an mipi cu kan um i cengceh le Sohawl karlak ah mipi cu kan um tiah an ti.

US Nih A Ram Mipi Pawl cu Myanmar Tlawn A Kham – US ramdang vuanci zung cun July 21 zingah a ram mipi pawl cah ramdang thawngpang theihter nak atuah hna i ram 6 pawl ah tlawn rih lo dingin, ati hna hi hna ram pawl cu tlawn dingah tih anun nak kong an langh ter. US in a ram mipi pawl tlawng rih lo dingin a timi ram pawl cu Myanmar, Hongkong, Iran, N.Korea, Russia le Venezuela ram pawl an si.Myanmar ram cu a tulio ah ralhrang ralkap nih rampi nawlngeihnak an lak ruangah Myanmar mipi ca hmah ah a him lo lio asi caah ramdang mi chin ahcun a him lo chinchin, ahleice in ralhrang le US cozah pehtlaih nak a tha lo. Hi bantuk ruangah US nih a ram mipi caah kuantlawn ding tihnung ram 6 ah Myanmar cu hmasabik ram ah achiah.

Hongkong zong China cozah he an buai hnuah US mipi caah a him lo i, Iran hrimhrim cu US cozah he tlawn hrim hrim lo dingin dnatat nak aa pe mi an si. N.Korea cu vawleicung ramdang caah tlawn a him lo hrimhrim i, Russia cu Ukraine an do hnuah US cozah he aaral mi le buainak ngei an si. Venezuela ram zong an ramchung ukhruainak a that lo tikah US cozah nih hremnak a rak pe i, a ram mipi pawl Venezuela ram ah tlawng lo dingin a theihter ve.

US nih cun ram 6 pawl cu tihnung Level 4 ah a chiah hna i, tihnung level 3 pawl ahcun China, Comlobia, Ivories Cote, Salvador, Mauritania, Sir Lanka le Uganda ram pawl an um. Level 3 i China a um cu mipi an khuaruah ahar ngai i Level 5 leiah um tlak an si tiah biahal nak ngei zong an um. Asinan, China le US cu cozah dirhmun ah aa rem lo mi le, aa do mi an si. Asi nain atu tiang ah an ram hnih i mipi pawl cu an mah le mah an I tlawng lenngmang rih in alang.