KNU Ralkap Nih Kawl Ralkap Pawl An Phomh Tthan Cang Hna.

February 26 Ah KNU Ralkap Nih Kawl Ralkap An Phomh Taktak Cang Hna.Ralkap le Palik nih CDM ruangah minung an tlaih hna nak ah Gate an lawnh i, Kayin Pyine, Kawkareik Myone ah Kawl Ralkap le KNU Ralkap an i kap tiah thawngtheih a si. Kawl Ralkap le KNU Ralkap an i kahnak ruangah Kawl Ralkap hliamhma a pu mi an um tiah thawngtheih a si.

Nihin February 26 chun suimilaam 12:00pm hrawngah khan Kawl Ralkap Minung 50 leng cu Motor 5 in KNU Ralkap an hmunhma lei ah theihternak tuah hmasa loin an lut. Kawl Ralkap nih KNU Ralkap an umnak hmunhma an luh hlan ahhin theihternak an tuah hna lo caah KNU Ralkap nih an phomh hna hi a si.

Kawl Ralkap le KNU Ralkap cu Minute 15 hrawng an i kap tiah theih a si. Kawl Ralkap lei in hliamhma a pu mi an um tiah KNU Ralkap lei nih an langhter. A tu hi an i kahnak hmun ah Kawl Ralkap le KNU Ralkap cu an um rih ko hna tiah theih a si. Zuathartit Khua le Kawkareik Lampi cu humhimnak dingah an phihkhar dih tiah theih a si.

Kawkareik Myo ah mipi pawl nih Ralkap uk duh lo nak an langhternak hi Nii 17 a si cang. Ralkap uk duh lo nak a langhtertu mipi pawl cu KNU Ralkap nih an humhimnak dingah an kilven lengmang hna tiah theih a si. KNU nih tuandeuh ah an chim ning bang in Nihin ahcun Kawl Ralkap cu an phomh taktak cang ko hna i, Kawl Ralkap cu hliamhma a pu mi an um tiah theih a si.

Photo Credit: KNU Army

Ref: 7 Day TV

Be the first to comment

Leave a Reply

Your email address will not be published.