Lai Mi Nih Kani Bochan Tuk Mi Saya Van Tum A Sumkho Tilo, Kawl Ralkap Pawl Cu Faktuk In A Sawisel Cang Hna.

Kawlram a thleng taktak khawhnak ding caahcun: Kawlram, NLD cozah uknak chuh a sinak kong theih le ruah ahcun lung a der I thazaang a um lo. Kan lung a caw dih hna. Kan lau dih hna. Thinphang le ruahchannak a um tilo tluk bantuk in kan um dih hna. Aruang cu, kum 60 leng ralkap uknak tthalo nih a kan ukmi kan rak temtuar cang I cuhnu ah kum 10 nawn Democracy uknak in kan kal cang ruangah a si. Myint Aung Hlaing le ralbawi pawl muihmuh le an kongtheih cu huat an tlai bak, mit an kem tuk. Mah uknak an lak hi hruhthil an tuah a si I ningzah hngal loin sualnak nganpi an tuah a si. Kan biakmi Yahweh Pathian nih a let tampi in teirul cham ko hna seh.

Kan Lai phungthluk ah a ummi cu, “Derpheh chia paam pheh chia” ti asi. Kanmah tete hmanh, ralkap uknak tthalo kuttang ah kum 60 leng kan um ruangah a phun2 in harnak, sifaknak, thihnak, ttihnak, le ruahchannak nei loin kan temtuar I Kawlram cu a rawk dih I vawlei cungah a sifak bik ram ah a tel ve. Kum 10 nawn ram a ttha kan van ti vial ah atu bantuk in uknak chuh a si fawn. Kawlram chung I a ummi Khrihfa zatuak 6% I thlacamnak hi Pathian sinah a phan kholo I a si hnga maw ti hna ka ruat. Ttah aihram le lungkek kuai in thla kan cam rih a hau. Pathian nih thinlung kekkuai le aihram buin thla a cammi cu a leh lengmang ko hna/a ngaihpiak ko hna.

Aluancia thla 2/3 hrawngah Kawlram kong cu thimnak an tuah lai ah ka rak ttial lengmang ve voi tam nawn. Atutan zong news a phun2 ka rel I ka ngai ve. RFA, BBC, VOA, le DVB le a dangdang. Atu bantuk in zapi zaran zeithei lo pawl lungrethei le lungrawk in an um lioah thawngpang hman lo ttial ti bantuk kan I sum a hau, thawngpang ttial tikah kan I ralring taktak a hau lai. Biden cozah nih Kawlram ralkap a tuk hna lai ti bantuk in ttial lo ding. News minthang deuh ngaih khawh kan i zuam ah a ttha lai.

Minung hi harnak fakpi kan tong tikah thil fa tete zong kan caah ruahchannak nganpi a um bantuk in ruah a si ttheu. Asinain mah thil fa tete cu kan harnak caah bawmtu an rak si hlei lem lo. Keimah pumpak zong in voi tampi ka tong ve. Atu lio Kawlram sining bantuk ah thil fa tete an chimmi zong kan caah ruahchannak a nganpi bantuk a lo ko lai. Nan zei ngai an rak si lai lo. Keicu mah ti hin ka ruah ve. US a si ah, UN a si ah, Tuluk le Russia an si ah, ramleng le ramchung organization dangdang an si ah, Southeast Asia ram pawl an si ah, Kawlram a thlengnak ding ahcun mah hna sin in ruahchannak tamtuk neih ding a si lo ka ti. Mah hna I mawhchiatnak le soiselnak cu ralkap tthalo pawl caah cun zeihmanh an si lo. Zeihmanh ah an rello. Mah ruangah cun pei kum 60 leng zong cu an kan uk cang fom cu. Sipuazi phihkanhnak zong, ram a thlengnak ding taktak caahcun zeingai santlaihnak a nei lo. A tuartu cu mipi kan si ko. Atu le bang cu ralbawi pawl an rum tuk cang I Kawlram mirum pawl he hawikomh tthatuk an si fawn hna tikah sipuazi phihkanhnak cu an caah zeihmanh a si lo. Cang-ai sehtluk hmanh ah an ruat ti lo.

Ramkip, bu kip, biaknak kip, ramchung ramleng in kan si khawh tawk in mawtchiatnak biachim, non-violence, le social media hmang in a phunphun hehtiah kan I zuam cio ko hna lai. Nan a biapi bikmi cu ramchung I a ummi minung nan si ko. Ralkap kut in uknak kan lak tthan khawhnak ding caah cun ramchung ummi nih lam nan zawh a hau/sandah fak piin nan piah a hau. Non-violence tein nan kal ve a hau lai. Thisen tampi a luang hnu lawngah US le a hawi le ram pawl nih hriamnam he an zuan hnawh hna lai. Cuhnu lawngah kan duh taktakmi thlennak a um kho lai/a chuak lai. Uknak ttha lo I thlen hi thil fawite a si lo tihi kan I fiang a hau. Kum 60 leng kan si cang nan zeite hmanh thleng a tim lo hi aw. Curuangah cun fak deuh in ramchung ummi kan cawl a hau ko lai.

Sandah piahnak asiloah cawlcanghnak fak deuh in kan tuah lo ahcun, Kawlram cu ralkap kut chungah kum saupi a um rih ko lai a fiang ko. Ralkap bawi pawl caah cun lih le hrokhrawl chim le tuah cu fim le thil tikhawh bik ah an ruah. A dik a hmanning thiltuah cu hruh bik ah an ruah. US ram, EU ram vialte, Japan, India, le Tuluk, le UN zong a hlen lengmang ko hna. An sinah lih le hrokhrawl a chim peng ko I hi hnu zongah a chim lengmang rih ko lai. Ramdang le miphun dang zong zeite ah a rel ve hna lo. Kawlte zertiang le ngian hi a mak taktak pei a si ve cu. Vawlei cungah Kawlte zer le ngian hi a mak bik le a tthabik a si lai, thiltthalo tuahnak caah cun. Kum 60 leng hmuhtonnak an ngeih cang ruangah thiltthalo tuah le lih le hrokhrawl chim dan pawl cu an thiam tuk cang.

Ralkap cozah cu kan theih cio bang, thilttha tuah a thiam lomi, thilttha tuah a tim lomi, zeitluk in dah rammi hi kan sal ah kan ser khawh hna lai ti lawng a ruatmi, thilhrawk ding lawnglawng a ruatmi le a tuakmi an si. A tthangcho ter le a remh phun a timmi an si lo. Anmah ca tthatnak le hlawknak lawng an kawl ko lai. An biachim ning in an tuah bello I zeitin thil an tuah te lai ti zong chimchung awk a har tuk. Kumkhat an timi zong kum 10/15 rauh khawh a si ko. Asinain, keimah ka ruahnak ah cun kha hlan bantuk khan cun an sual tilai lo tiah ka ruah tiin a chim.Credit : Van Tum

Be the first to comment

Leave a Reply

Your email address will not be published.


*