Lai Tlang Peng Uk Zung Rian Ttuan Hna Cu Thai Zing Thawk In An Pu Le Nih Zungkai Ding In An Fial Cang Hna.

Kawl ralkap uk kan duh lonak langhternak caah duhlonak Sandah a piak ve mi Hakha Penguk Zung riantuan hna cu an pu le nih 2021 February 10 zaanlei sang ah an auh hna i, “Zung nan kai lai,” tiah an ti hna nain zungkai an i tim rih lo tiah theih a si.Cozah lei rianngei tu hna nih tuzaan an auh hna nak kong he pehtlai in rianngei tu min langhter duh lo pakhat nih, “2021 February 8 lio ahkhan Civil Disobedience Movement tuah ding in mizapi sin ah thanh dih cio a si.

Keimah zong hi CDM tuah ding an ti ca ah kha ni kha ka rak kai lo, inn ah ka um.Cun, midang keimah sin i a tuan mi hna zong hi CDM tuah ding ka hrihhawh hna fawn lo. Kha ni kha ka dam lo, ka lufah he aa tong ve. Ka naule ka chawnh hna tik ah nan kai maw ka ti hna i kan kai lo an ka ti ve. Kan kai lo tik ah kan pu ni an kan chawnh i rak ra ta uh an kan ti. Cozah riantuan kan si ca ah kan pu an kan auh mi cu zeidah a si hnga tiah ka va kal i zung a rak kai lomi hi kan dihlak ah minung 34 bak kan rak si.

Kan zung riantuan dihlak hi minung 280 leeng kan si. Nihin i lam kan zawhmi kong he kan pu le nih an kan auh i kan va kal tik ah, nan lungput, nan tuar ning kan in theihthiampiak hna.Asinain, atu lamzawh tiang nan tuah hi cu a luan deuh lo maw? Midang zung cu hmanthlak lawng an i post ko. Asinain, atu hi kan in ngaihthiam hna, thaizing zung rak kai uh an kan ti. Kanmah pumpak lei nih cun zungkai kan i tim lo,” tiah tuzaan i thawngfiannak a tuahnak hmun ah a chim.

Nihin i a voi linak Hakha khuapi chung lamzawhnak ah Cozah riantuan minung tampi an i tel i, hi chung ah Penguk Zung riantuan hna zong minung tampi an i tel ve.Sandah piak a dih le cangka in an auh hna i, atu bantuk in an pu le hmai zong ah biakhiahnak an tuah hi a si.

Credit: The Hakha Post

Be the first to comment

Leave a Reply

Your email address will not be published.