Lungthin Dawh Misual Phu le Taloh PDF Fonh In SAC Ralhrang 40 Leng An Thah Hna

Sagaing ramtthen, Myeong myone, Kyauk Sa Yit khua ah ummi Min Aung Hlaing ralhraang palik sakhan cu tuni October ni 9, kum 2021 zing suimilam 5:00AM ah khan MSPDF, 27 Revolution Forces, Lungthin Dawh Misual Phu le Taloh PDF hna fonh in an kah hna.

PDF nih ralhraang palik sakhan an kah hnanak le palik pawl bawm ding in motor pa 2 he vun rami ralhraang pawl bomb an puah hnanak kong kha tuan deuh zong ah kan rak thlah cang nain mah an rak thanh tiang ah khan palik sakhan an kahnak ah siseh bawmhnak pe ding in kalmi ralhraang motor pa 2 bom an puah hnanak ah thimi zat kha an rak langhter chih khawh rih lo caah kan rak langhter ve lo.

PDF phu 4 fonh in ralhraang palik sakhan an va kah hnanak ah hin ralhraang pa 10 nak tlawm lo an thi, cun an hawi le bawm ding in Chaung Oo khua in Myeong khua lei ah motor pa 2 he vun rami ralhraang pawl cu 27 Revolution Forces, MSPDF (Myeong) le CHURF (Chaung Oo) hna nih mine bom in an puah hna.

Mine bomb in an puah hnanak ah hin ralhraang motor pa 2 ning bak in an i hlorh hnu ah a thal in an tla i motor cung cuang ralhraang 30 nak tlawm lo an thi ti, hi kah dohnak hi Taloh PDF, CDSOM (Myeong), Minmu Rainbow, Lungthin Dawh Misual Phu, MGN Ranger le thisen ding tti (RF) hna nih an phomh hnami si tiah Yangon Khit Thit Media nih update an tuah tthan.

Update an hun tuah tthan ning ah cun Kyauk Sa Yit khua palik sakhan an kahnak le ralhraang motor pa 2 bomb an puahnak ah hin a pahnih fonh ah ralhraang 40 nak tlawm lo an thi timi a fiang.

Chin, Sagaing le Magwe ah SAC Ralhrang Thazang Chap kong ah UN Lungrethei

Chin ramkulh, Sagiang ramtthen le Magwe ramtthen ah SAC nih ralkap thazaang tam piin an chap thluahmahmi kong ah UN nih lungretheinak ca nihin zinglei ah a chuah.

“Aluancia zarh in nihin tiang Chin ramkulh, Hakha le Kanpetlet; Magwe ramtthen, Gangaw peng le Sagaing ramtthen, Kani le Mongywa ah Myanmar ralkap nih thazaang pehzul in a chap pin ah Internet zong a thah dih,” tiah UN Human Rights chimnak nawlngei Ravina Shamdasani nih a chim.

“Aluancia thla chung ah thahnawnnak le inn khanghnak pawl a tuahtu Myanmar ralkap nih atu bantuk in raldohnak ca ah fak piin timhtuahnak a ngei tthanmi kan theih tik ah kan lungre a thei tuk. Khuami innlo le thilri pawl zong hramhram in ralhriam ngan in an kah hna. Cucaah, Myanmar ralkap nih mipi cung ah nuhrin covo buarnak a tuah ti lo nakhnga vawleicung ram kip nih hmun khat te awaan khat in kan aupi a herh,” tiah nihin zinglei UN cachauhmi ah an langhter.

Nizaan ah SAC ralhrang nih Kalay ah ralkap motor 40 le raldohnak tank 2 thazaang an chap i, nihin chun sml. 12:30 hrawng ah Chin ramkulh, Taingen khua ah motor 15 hrawng le tank 2 an phan.

Taingen ah a phanmi SAC ralhrang pawl hi Tedim lei ah an kal i, Hingzing timi khua zong ah an phan cang. Khuachung thilri pawl zong an fir len hna, tiah khuami nih an chim.

Crd. The Chin Journal

Be the first to comment

Leave a Reply

Your email address will not be published.


*