MAH Nih Arti Le Phaisa In Lem Cang( Artist) Pawl Alem Soi Cang Hna

Uknak a firtu ralhrang pawl nih Myanmar Motion Picture Organization cu kyat ting 100 hlut in le kum upa film artist pawl cu kyat ting 10, arti pum 50, facang le chiti hlut in an lemsoi hna tiah theih a si.

Ralhrang bawmhnak a cohlang mi tar film artist Daw Po Lay nih “ram pumpi vuanci nih hibantuk in an kan bawmhchanh lai kaa ruahchan ballo. Kan inn ah ralhrang bawi pawl an ra i kyat ting 10, facang, chiti le arti pum 50 an kan tthenh i kaa lawmh tuknak ah ka ngaih a chia tiah a chim” tiin ralhrang nih an newspaper ah an rak langhter.

Film artist Nway Nway San zong nih “tuni ah Chief Minister le a nupi Kyu Kyu nih Myanmar Motion Picture Organization ca kyat ting 100 an kan hlut caah kan i lawm tuk i kan lung a tling tuk fawn. Lawmhnak phun thum ka chung ah a um i cucu Chief Minister he kan i ton tikah ka chimh te lai. Atubantuk in tar film artist pawl an kan bawmh caah kan i lawm tuk” tiah a rak chim ve.

A hlan ahcun hi tar artist pawl conglawmhnak hi artist tling ngai in le hlunghlai ngaiin rak tuah a si tawn. Atutan a voi 44 nak camtuak tu ahcun tar artist cheukhat le ralhrang pawl lawng nih an tuah khawh.

Ralhrang misa U Maung Maung Ung nih cinema on tthan an timh cang nak kong le artist tampi an chuah cang ruangah a lung tthatlo nak kong a rak chim. NLD chan lio ah Myanamr cinema hi a hung tthangcho deuh ngai nain ralhrang uknak fir ruang le covid rai ruangah a thi beh ti awk tlak in a um.

Ralhrang uknak firmi kongah artist tampi mipi lei an dir hna i cu hna pawl cu ralhrang nih pohmah 505 in a tlaih hna pinah tlaih a timhmi hna zong an tam tuk rih tiah theih a si.

Be the first to comment

Leave a Reply

Your email address will not be published.


*