Min Aung Hlaing Cu A Duh Zong Duh Lo Zongah Cepa An Ti Tawn Lo Maw Kha, Atu Ah Cun A Cepa Diarhmun Ah A Um Cang Ko Hih,

Min Aung Hlaing nihhin tukum 2022 chung lawng kan ram a uk cang lai. Mah can chung lawng cu an mah ralhrang upadi ning zong in nawl a ngei cang.Min Aung Hlaing nih uknak a lak February 1,2021 khan kan ram cu a von hruai i Kawlram cu vawlei cung ram sifak bik ah a von chuah colh ko.

Kum 2008 phunghram pi ah uknak lak kong hi a um. Uknak an lak in thla 6 chung ah thla 6 can sauhnak nawl an ngei. Cu hnu ah thla ruk can sauhnak nawl an ngei rih. Cu hnu ah thla 6 can sauhnak nawl an ngei rih. Cu hnu cun can an ngei ti lo.

Kum 2022 hin an can sauh nak upadi cu a dih cang ding a si. Mah hnu ahcun an mah ralhrang upadi zong nih a onh ti lo. Ralhrang nih an duh zong duh lo zong ah thimnak an tuah a hau te lai.

Cu thimnak an tuah te ding mi ahcun thla 6 timhnak can upadi ning in a um. Cu chung zong cu an mah nih an uk rih lai tinak a si lai cu.

Ralhrang nih thimnak cu an van tuah lai i NLD ai zuam te lai lo. Party 50 hrawng cu thimnak ah an lut te men ko lai. Cucu ralhrang he UEC ah meeting a kai tawnmi party pawl kha an si i party fa tete an si hna. USDP party lawng hi a ngam mi a si.

Ralhrang nih thimnak cu an von tuah lai i USDP nih teinak a hmuh te ko lai. USDP kha teinak an pek te lai. USDP party chung in a ho dah Myanmar President a tuan te lai timi cu theih a si rih lo.

Mahhi zawn ahhin kum 2010 lio ah U Thein Sein nih a kalpi ning kha an i cawn te men lai tihi zumh a um. Democracy si ko tung i Myanmar Democracy timi kha a si te men lai.

A tu ah an tlaih mi hna Suu Kyi le NLD upa pawl zong hi an thlah dih te men hna lai. Hriamtlai cheukhat an tlaih mi hna zong an thlah dih te men hna lai. A tu lio ralhrang uknak nak in a von nem deuh mi khin an kan hruai te lai.

Cu tikah NUG cozah zeidah a tuah te lai timi theih a si lo. Ralhrang maw a doh peng rih lai. Ram chung ah lut in USDP party uknak tang ah dah an um ve te lai theih a si lo.

PDF le tlangcung miphun hriamtlai hna nih USDP uknak zong an duh hlei lai zumh a um lo. I kahnak cu a um thiamthiam te ko lai. Sinain TThein Sein cozah lio bantuk a si ahcun Kawl pawl hi cu an dai ngai te lai timi hi a fiang pah ko. Credit: Cung Boi lian.

Thawngdang, SAC Ralhrang ralkap Nih PDF-Kalay Battalion 3 Sakhan Cu Kan Laak, Hriamnam Tampi Kan Chuhsak Tiah An Thanh,Kalay peng nitlak chaklei sangah a ummi PDF-Kalay Battalion 3 sakhan pakhat cu SAC ralhrang ralkap nih April 12 zinglei ah an laak tiah thawng kan theih.

SAC ralhrang ralkap hna cu Kalaymyo Meng 9 leiin Tidim peng chungah an ke in an kai hna i, nitlaklei sangin sakhan an laak hi a si. SAC ralhrang ralkap he aa tongmi Sia a kawltu 2 hna zong zaankhat an tlaih hren hnuah an thlah than tiah kan theih.

SAC ralhrang ralkap nih PDF Kalay Battalion 3 sakhan chungin Thonghrolh 11, letmah pahnih Seing Paung 1, Seing Paung bomb 5, RPG bomb 4, kuanfang 2700, AK 47 kuanfang 50, kutin serchuahmi bomb 25, kutin chehkhawhmi bomb 8, mei peknak seh ngan 1, Aing Con 1, deu thlam 12 telh in hriamnam sernak thilri dangdang kan chuhsak tiah an langhter.

An tlaihmi hriamnam man hi sing 100 lengkai man a si pinah sakhan chungah a ummi eidin le thilpuan dangdang hna cu SAC ralhrang ralkap nih mei an kangh tiah kan theih,Sakhan laaksak an si tumah PDF Kalay (1) nunnak a liam pinah a dang 1 nih tlaih a tong.

Relchih Myanmar Plaza ah U Tyi Zah chungkhar ngeihmi Harry’s Bar ah April 11 zanlei sml 4:30 hrawngah bomb a puak tiah hmutu nih an chim.Thlalang an kuai, sihmanhsehlaw innchung ah a ummi minung cu ahohmanh hliam tuarmi an um lo tiah hmutu pakhat nih a chim.

Harry’s Bar cu Singapore hrambunh company pakhat a si nain Kawlram ralkap ralhrang caah hriamnam a cawkpiaktu U Tyi Zah chungkhar ngeihmi a si.Harry’s cu SAC ralhrang ralkap he aa pehtlai ruangah bomb an puahmi a si ko lai. Bomb a puah lecangka in palek ralkap nih lam phih hratin checking an tuah tiin Yan Kin ah a ummi pakhat nih a chim.

Yangon khuapi chungah pehzulh in bomb a puak lengmang tiah an chim. Yangon khuapi ah SAC ralhrang ralkap nih checking an tuah ko buin bomb a puak hi a si. Mipi vengtu ralkap hna nih SAC ralhrang ralkap hmuitimh in Pyauh Kyar system bakin biatak tein kahdohnak an tuah.