Min Aung Hlaing cu Baptist World Alliance(BWA) cathanhnak ruang ah a lau pah ko lai

Min Aung Hlaing cu Baptist World Alliance(BWA) cathanhnak ruang ah a lau pah ko lai
==============

Ralhrang nih an tlaihmi Mandlalay i Falam Baptist Church pastor Rev. Thian Lian Sang cu a rannak in thlah ding, Thantlang ah an kahmi Pastor Cung Biak Hum kongah tuanvo lak ding le a kaangmi inn hna cu a thar sakpiak than dingin Baptist World Allience Sept 20 ah halnak cathanh a chuah.

Baptist World Alliance (BWA) vawleicung ram 126 leng in Baptist Khrihfabu nuai 49 an i telnak bu nganpi a si.

Rev. Thian Lian Sang kongah a chungkhat pakhat nih “Atu tiang ralhrang lei nih zeihmanh an kan chim lo. Khoika dah an chiah i zeibantuk sualpuhnak dah an pek ti kan thei lo. Pastor pa caah kan lingerie a thei ko. Covid in a damnak a sau rih lo. A cuap a tha lomi a si tikah caan hmaan tein sii a dingmi a si. A din tawnmi sii le hnipuan zong kan pekchan kho lo, a luat zau khawhnak hnga thlacam lawng kan ti khawhmi a si” tiah a chim.

Rev. Thian Lian Sang cu Sept 16 ah, Mandalay i a umnak inn ah misawhsawh thuam aa hrukmi ralhrang 20 nih an kalhnawh i an tlaihmi a si. Amah an tlaih lioah phone 5 le tangka sing 40 zong an lakchih.

Pastor Cung Biak Hum cu Thantlang Centenary Baptist Church ah pastor pakhat a si. Sept 18 i Thantlang innkangmi hmih dingin a kal lioah ralhrang nih an kah i a nunnak a liammi a si.

Demawhsu kahdohnak chungah PDF in minung pakhat a nunnak a liam,hliamtuar le a tlau mi an um. Kaya ramkulh, Demawhsu in Meng 6 hlatnak khua ah nizaan September 20 chunhnu suimilam 12:00 hrawngah kaphnih kar kahdohnak a chuak, cu kahdohnak chung ahcun KPDF lei in minung pakhat a nunnak a liam, a tlau mi le hliamtuar zong an um tiah theih a si.

“Kahdohnak cu suimilam 12:00 in an thok i, chunhnu suimilam 2:00 ah an dih.Ralhrang phu lei in kahnak an thok hmasa, minung thazaang le hriam thazaang a dan tuk caah, kanmah phu lei cu hnu ah kan tolh. PDF in minung pakhat a nunnak a liam, minung pali nih hliam an tuar, minung pahnih cu pehtlaih khawhlo in an tlau, kahdohnak a chuah lo nak khua tiang hriamngan in an duhnak hmun an kah” tiah a chim chungtel pakhat nih a chim.

Ralhrang phu chungtel hna cu minung thazaang 200 leng an si, kahdohnak chungah ralhrang phu lei in hliamtuar le a thi mi zat cu kan theih rih lo tiah a chimchap. Kaya ramkulh chungah ralhrang nih nawlngeihnak an lak hnu ah nunnak liammi minung 93 an si, tlaihkhih a tong mi hi minung 138 an si tiah PKPF nih September 18 ah a langhter. Crd; The Chin Post

Be the first to comment

Leave a Reply

Your email address will not be published.


*