Min Aung Hlaing Le A Party Hna Nih Cun CRPH An Ttih Tuk Cang Hna.A Ruang Cu?

Uknak chut tu Min Aung Hlaing ralkap pawl nih Committee Representing Pyidaungsu Hluttaw (CRPH) an ttih tuk cang nak duhsah duhsah tein a hung lang thluahmah, a hmasa bik ah an ttihnak a langh ning cu Kawlram khuapi cheukhat chungah Min Aung Hlaing ralkap pawl kut ah nawl neihnak le biaceihnak tiang a pek hnami Martial Law hi si.

Martial Law an chuah ruangah hin zei hmanh ttih hlei ding um lo, a luan ciami kum 1988 lio le tu lio kan tonmi hi aa khat hrim hrim lo timi kan fian deuh lo ruangah Martial Law kan ttihnak hi si. A luan ciami kum 1988 lio ah khan cun mipi lei in dirpi tu ho hmanh an rak nei lo, UN nih cun a thinphannak kong a rak chimmi le a ngiatnak kong lawng kha si ko.

A si nain tu ah cun International nih an cohlanmi president kan nei, cun UN ah siseh vawlei cung ram hruaitu hna sin kip ah Kawlram mipi aiawh in biachim piak tu ding special palai simi doctor Sa Sa kan nei fawn, British ram cozah hmai ah dirpi tu Myanmar Ambassador kan nei rih.

A si nain cu lio ah USD 2 millions pe in an hlanchommi Ari Ben-Manashe ti dah lo cu uknak la tu Min Aung Hlaing le a ralkap paw hi vawlei pi theih in a dir pi tu dingmi palai an um lo, hi pa hmanh nih hin phaisa duh ruah ah dirpi a timh hnami si i a company umnak le a mah umnak Canada cozah tiang nih hlathlainak tuah in dantat an timh cang.

Cu ruangah mipi lei nih teinak hmuh ding hi a nai cuahmah ko ti hi philh bak hna hlah usih, mah belte tu ah cun lungdongh le lungrawh tuk ruangah uithah le ar thah zong in mipi an kan thah thluahmah rih ko lai. Zan tiang ah sang chungah lut in minung an tlaihmi te hna hi zei dang ruangah si loin CRPH an ttih ruangah si.

Zei tluk an cawlcangh len zongah Kawlram mipi aiawh in a kan dir piak tu palai simi doctor Sa Sa bantuk in tlangcung hriamtlai phu hna he siseh, international media hna he zong biaruahnak zei hmanh an nei kho lo, Min Aung Hlaing le ralkap hna nih an ti khawhmi cu Myanmar ram chungah duh poah in mi tlaih le thah lawng hi si, mah zong hi vawlei pi nih zoh sawh a tim ti hrim hrim lo.

Mipi nih kan i fian bak dingmi cu kan theih fian lomi thil ah duh tawk in bia chim lo ding, Min Aung Hlaing le a ralkap pawl nih an mah cohlang ding le CRPH zumh lo ding in policy an thlahmi hi zumh bak lo ding, teinak kan hmuh khawhnak ding caah zei bantuk lunghrinhnak hmanh nei lo tein CRPH hi zumhnak he karhlaang ko hna usih.

Be the first to comment

Leave a Reply

Your email address will not be published.


*