Min Aung Hlaing Nih Tlangcungmi He Biaruah Ding In, A Cao Hlang Mi An Um

SAC haotu Min Aung Hlaing nih tlangcungmi hriamtlai hna he biaruahnak ngeih ding in sawmnak a tuah nain KIO (Kachin), KNU (Kayin), KNPP (Kaya/Karenni) le CNF (Chin) hriamtlai bu hna nih kai lo ding in awaan an langhter.KIO le KNPP nih cun SAC sawmmi biaruahnak ah kan kai lai lo, tiah May 5 ah cathanh an chuah cang.

CNF hruaitu lei zong nih SAC he pehtlaihnak ngeih lo ding in khahlan ah an rak chim lengmang nihin May 6 ah cathanh an chuah i, mipi he fek tein kan dir lai tiah an langhter.KNU chimnak nawlngei Padu Saw Toney nih, ÔÇťAhlan i kan rak chim bang khan a si ko. KNU kan dirhmun aa thleng lo, tiah a chim.

SAC nih remdaihnak biaruahnak tuah an duh ahcun Federal Democracy rampi ser ding in atak in an ttuan hmasa a herh. Cun, mipi cung ah thahnawnnak le serhsatnak a phunphun an tuahmi an ngol a hau i, Myanmar ram daihnak kong ah ramdangmi zong i tel ding in an cohlan hmasa a hau, tiah Padu Saw Toney nih NUG thawngzamhnak ah a chim.

Aluancia April 22 ah Min Aun Hlaing nih tlangcungmi hriamtlai hna he biaruahnak ngeih ding in sawmnak a tuah i, atu tiang ah aho hriamtlai bu hmanh nih kan kai lai, tiah phungning in an thanh rih lo.

Relchap,Min Aung Hlaing hnruai mi SAC hramhram in uknak lak an i zuam ni thok in a tutiang ah nu 170 leng an nunak a liam cang tiah Barmese Women’s Union(BWU) nih May 4 ah an thanh.

AAPP le BWU nih data an lak khawh mi ning ah 2021 February 1 in 2022 April thla tiang ah khuapau dohthlennak a nunnak liam le SAC ralkap meithal kuanvai nih a khen hna ruang le ralphaw caah tlaih i thah an ton ruang ah an nunnak liam mi an si hna tiah an langhter.

BWU nih a thanh ning ah tlaih a tong mi nu hi an dih lak ah 2055 an si i cu chung ah minung 153 cu sualphawt an si i Cu 153 chung ah minung 29 cu a a sang bik sualphawnak caah hrithlai, thih hlanlo thong le kum 10 leng thong thla ding in biaceih an si tiah theih a si.

CNF/A cawlcanghnak hmun ah April 22-30 tiang Chin National Army, Chinland Defense Force (CDF Hakha) Thilin PDF ( Magway) hna i fonh in SAC ralkap he kahdohnak voi 5 a chuak i SAC ralkap 61 an thi, Chin ralkap in minung 2 nih miphun le ram caah an nunnak an pek.

Kahdohnak a chuahnak hmun cu Magway ramthen, Gangaw le Chin ramkulh Hakha lampi SAC ralkap nih thazaang 200 hrawng chap in Hakha lei ah ke in a rak kai mi hna he an si.

Chin ramkulh thlanglei Matupi ah SAC ralkap nih thazaang chap in Magway ramthen, Pakoku in an i thawh i CDF-Mindat le CDF-Matupi hna he kahdohnak a chuak tiah Chin National Front General Headquarter nih May 6 ah cathanh an chuah. Crd: The Chin Post.