Mindat Le Matupi Karlak Kahdoh Nak Kongah CDF Mindat Chimnak Nawlngeitu Salai Yaw Mang Chim Mi Ngeihchia Pah Relnuam Pah

    Nov 2 in 10 tiang, ni 9 chung Chin ramkulh Mindat le Matupi karlak ah CDF-Mindat le ralhrang kahdohnak a um i ralhrang 70 hrawng an thi. Cu ni 9 chung kahdohnak kong cu CDF-Mindat in chimnak nawlngeitu Salai Yaw Mang nih a page ah a tawifiannak in a tial. Cucu mipi nih theih tlak a si kan ti caah Laiholh in kan vun lehmi a si. A tanglei hi amah tialning a si cang.

Anawyahta Oparation tiah min bunh in raltuk ah aa thawhmi kuan kham kho motor 2 le ralhrang phu motor 80 leng cu Mindat in Matupi lei ah an kai, hnahnawhnak tlawmpal an tong. An kirlei ah cun an i thawhlei bantukin hnahnawhnak fak in kan tong lai tiah an i ruah lo caah a si kho. Kuan khamkho motor, hriamngan  hna le hriam thatha he thazaang tampi in an umkal mi hi CDF-Mindat nih an kan tih lai tiah an i ruah.

Ralhrang motor 75 le kuan khamkho motor 2 hna he hriamthil tling te in October 31 ni ah Mindat khua tinhin an chuak. Chanpian khua ah zaan an riah hnu ah November 1 ah meng 70 ah zaan an riak than. November 2, ni thok in CDF-Mindat he kahdoh hram an thok.November 2 ni thok in meng 56 hmun kahdohnak ah ralhrang phu lei in minung 2 an thi. Hmaikal lamthianh tu ding ah chiahmi SAC phu ta si mi JCB pakhat cu meikhangh in an hrawh. November 3 ni ah Matupi in a tummi kuan khamkho motor 2 telh in ralhrang motor 75 cu CDF-Mindat nih zinglei Mindat-Matupi lamkar hmunhma pakhat ah an doh hna. Cu kahdohnak ah cun SAC lei in minung 10 hrawng an thi, hliamtuar an tam.

CDF-Mindat lei in minung 3 hliamhma an tuar i cu hliamhma a tuarmi hna chun in pakhat cu a hliamhma a fah caah a nunnak a liam. CDF-Mindat in nunnak a liammi pakhat cu kum-73 upa fimcawnnak lei zungin pensen a lami a si. Zaanlei hnu ah CDF-Mindat nih SAC motor cu an kah hna caah SAC lei in minung 2 an thi than. November 4 ni ah cun kahdohnak hmun hnih ah a cang. Zinglei ah nitlak lei Mindat-Matupi mengtung 6 lawnh ah zinglei suimilam 8:30 ah thok in CDF-Mindat le ralhrang phu kar kahdohnak a chuak. CDF-Mindat nih an hmanh mi pa-de-ta (ပဒေသာ) bomb a puah caah SAC lei in minung 5 hrawng an thi, hliamtuar an tam tiah theih a si. Mengtung 43 ah chunhnu suimilam 2:00 hrawngah kahdohnak a chuakthan. Matupi in kuan khamkho motor 2 he a rami SAC phu cu CDF-Mindat nih hnu hmai in an doh hna caah ralhrang phu lei minung 20 hrawng an thi.

November 5 ni mengtung 36 ah zaanlei hnu in kahdohnak a chuak than. Cu kahdohnak ah cun ralhrang lei in a thi le hliamhma tuar an um le um lo fiang in theih a si lo, CDF-Mindat in a thimi le hliamtuar an um lo. November 6 ni zinglei suimilam 11:30 hrawng ah meng 31 hmunhma ah khuachung mi hna le CDF-Mindat i fonh in ralhrang phu hna motor cu lai meithal he a neihnak in an doh hna caah ralhrang minung 8 hrawng an thi, tamngai nih hliamhma an tuar. A luancia zerh ah ralhrang phu hna nih Matupi kalnak lam lei ah khuami hna zuatmi Sia cu an thah i an ei, inn chung thilri an hrawh piak hna, Meng 31 lawnh ah SAC lei miruak pakhat cu lamkam an an phum tak.November 7 ni zong ah kahdohnak voi 2 a chuak, mengtung 26 hmunhma hrawng zinglei ah voikhat, chunhnu ah voikhat tiah kaphnihkar kahdohnak a chuak i ralhrang phu lei in minung 18 hrawng an thi. Cu kahdohnak ah cun CDF-Mindat in minung pakhat nih hliamhma a tuar, a hliamhma Kong ah thinphan ding a umlo tiah theih a si.

Ralhrang phu hna nih (စက်လတ်), 40mm, 60mm, 81mm, RPG, kuan khamkho (.5), hna he ngol lo in an kah hna. Mengtung 27 ah SAC lei miruak pakhat cu lamkam ah an phum than. Ralhrang phu  hna cu Ayetaya khua meng 23 ah zaan an riah hnu zinglei ah cuka khua inn hna cu mei in an khangh. November 8 chunhnu suimilam 1:00 luan ah kahdohnak a chuak than i ralhrang lei in minung 10 hrawng an thi.

November 9 ni meng 16 ah kahdohnak a chuak than i ralhrang phu lei in minung 5 hrawng an thi,  bomb puahhnawh ruangah hliamhma tuar zong an tam. CDF-Mindat nih meng 14 tiang dawi in an doh hna caah ralhrang lei in minung 2 an thi than, hlaimtuar zong an tam lai tiah ruahdamh a si.Lampi ah ralhrang phu hna nih thi a neh mi lampi cu an tawl, vawlei in an chilhnalh , thi a luangmi lampi cu hlauhthlau an i zuam. November 10 meng 11 hmunhma hrawng ah ralhrang phu le CDF-Mindat kar kahdohnak a chuak than, SAC phu hna cu CDF-Mindat nih an kah hna, bomb in an puah hnawh hna caah a thi mi le hliamtuar an um lai tiah ruah a si na in, fianghlang in chim khawh a si lo. Meng 11 zong ah kahdohnak a chuak na in ralhrang phu lei minung zeizah an thih le hliam an tuar theih a si lo.

Cu raltuknak ah CDF-Mindat le ralhrang phu kar kahdohnak voi 12 hrawng a chuak i, SAC ralhrang phu lei in minung 70 hrawng an thi, hliamhma tuar an tam lai tiah ruah a si. CDF-Mindat in minung 1 a nunnak a liam. SAC phu raltuk nak ding motor kalnak lamthluan ah hmunkip in le hnu hmai in kahdoh an tong. Khuachung mi hna zong cu raltuknak ah cun an i tel, SAC phu hna nih khuachung mi hna an Sia an thah, inn an hrawh caah Lai phungning in phuba kan hlam hi a si.

Be the first to comment

Leave a Reply

Your email address will not be published.